Hɔ̀dɔ́m̀pa 12

Fòùmu pàmu Kídísì kóoó yònà é n'fòù-mu.

¹ N kúcàpa nà n potɔ̰ɔ̰̀pa-nà, Weèdi pa̰á̰suumá wɛhi sàma-dà ti hḭ́ǹka. Ye kú kpɛ́mú, n nɛ cɔɔ̀hu è yɔ̀ nɛ́ nì kɔ̰́ɔ̰́ nɛ cɔ̰́ɔ̰̀di dɛ́dɛ́í, kà nɛ fòùmu ní n'yòǹ dɔ̀hàdi mɔ́nní, nɛ pa̰à̰-di ni kpɛ́mú, kà ní nì teha. Mií-dà héé weèdɔɔ̀mu mɔ́mmú nɛ yònà m'pa̰kú-pu. ² Nɛ dá tṵṵ̀na fòùkù mɛnkù kú nìpa pa̰á̰ma. Àmá nɛ́ hédá kà Weèdi é nɛ peǹta, é nɛ pa̰a̰ yam̀màhàpàka, k'yé teha kà nɛ́ m'bahiní nì kpɛ̀i-sá, mìì suu-sá, nì naanà-sa, k'yè yòǹ dɛ́dɛ́í.

³ Nà pa̰á̰suumá Weèdi n pa̰à̰-ma kpɛ́mú, n cakú bá nɛ mɛ̀ǹǹ dɛ̀ɛ̀-ko è yɔ̀, nɛ dá n'wɛkànì nɛ cɔ̰́ɔ̰̀di é ha̰tá-nà nɛ yòm̀pu nà mɔ́ma. Àmá, bá nɛ mɛ̀ǹǹ dɛ̀ɛ̀-ko ní n'wɛì o cɔ̰́ɔ̰̀di hḭ́ǹka è sá̰hú ò yòm̀pu, k'yé n'nɔɔ̀-nà dandaní Weèdi ò pɛ̰ḭ-dí sá̰á̰pu. ⁴ Nìi wɔ̰̀ǹku yòǹ kùcɔ̰́-dà, è há̰ káá bɛ̀m̀bɛ̀ka dɔ́ɔ́di, bɛ̀m̀bɛ̀ni bá mɛ̀nì dɛ̀ɛ̀-di nà ni tɔmú. ⁵ Ma cɔ̰́ɔ̰̀di-dà nà tḭ́ńti. Ti yòǹ dɔ́ɔ́di-dà, è há̰ yòǹ wɔ̰̀ǹku kùcɔ̰́ mìì tee-sá ti múń-nà Kídísì. Ti wɛnnì, ti tusí-nà ti tɔɔ̀pa-dà, è yònà wɔ̰̀ǹku kùcɔ̰́ bɛ̀m̀bɛ̀ka yòm̀pu. ⁶ Weèdi há̰ pɛ̰ḭ bá ti mɛ̀ǹǹ dɛ̀ɛ̀-ko pa̰a̰ká-dà fàdà, kà kà ceń ceń. Nì pɛ̰ḭ-kó pa̰a̰dí k'ò tà̰ni Weèdi wɛmá è mà tɛ̰́nì tɔɔ̀pa, ó deha-nà ye pa̰a̰dí k'yé n'nɔɔ́-nà ti wɛǹni dań-sa. ⁷ Kà nì pɛ̰ḭ tɔɔ̀o è yɔ̀ ó n'dehú tɔɔ̀pa kpɛ́mú, k'ó kɔ̰́ɔ̰́ o cɔ̰́ɔ̰̀di ye dehèmu mɛhɛká. Kà nì pɛ̰ḭ tɔɔ̀o è yɔ̀ ó m'biɔhànì, k'ó m'biɔhànì. ⁸ Kà nì pɛ̰ḭ-kó è yɔ̀ ó n'yakànì tɔɔ̀pa wɔ̰̀ǹti, k'ó tì n'yakànì. Kà nì pɛ̰ḭ-kó è yɔ̀ ó m'pɔ̰n, k'ó m'pɔ̰n n'ɔ̀ɔ yàma wɛǹni. Kà nì pɛ̰ḭ-kó è yɔ̀ ó n'nihí tɔɔ̀pa, k'ó pà n'nihí nà wɔ̰ǹyahití. Kà nì pɛ̰ḭ-kó è yɔ̀ ó n'tempá-nà sɔ̰̀m̀ma, k'ó pà n'tempú-nà nà yaǹnaakú.

⁹ Nɛ dɔ́kàma ní n'yòǹ mɔ́ma, mà dá n'yòǹ nà nùdi. Nɛ́ yeda kpákpààma pépédí. Daàdi-nà suumá tenten. ¹⁰ Nɛ́ n'dɔ́sí nɛ tɔɔ̀pa nà nɛ yàma wɛǹni, mìì tee-sá nɛ yòǹ kúcàpa nà potɔ̰ɔ̰̀pa-dà. Nɛ wɔ̰̀ǹti é n'wáhi nɛ kó n'cunì-ma nɛ tɔɔ̀pa. ¹¹ Nɛ́ n'dɔ́sí tɔmú dɛ́dɛ́í, nɛ dá n'dóú. Nɛ́ n'dehú Teó kpɛ́mú nà nɛ yàma wɛǹni. ¹² Nɛ́ m'péé yaǹnaakú mɛhɛká nà nɛ daḿma kpɛ́mú. Nɛ́ n'káá mùyɔ̰ náńkú mɛhɛká. Nɛ́ n'wɛ̰́dì weèdɔɔ̀pu mɛhɛká. ¹³ Nɛ́ n'tempú-nà nɛ kúcàpa weèdɔɔ̀pa yè pà békú-sá mɛhɛká. Nɛ́ n'coní sukú mɛ̀m̀pà nɛ báákú-pa.

¹⁴ Nɛ́ n'cɔɔ̀hu Weèdi è yɔ̀ ní kóná mɛ̀m̀pà nɛ fá̰kápú-pa. Nɛ́ nì n'cɔ̀hu è yɔ̀ ní pà kóná, nì dá pà nɔda. ¹⁵ Nɛ́ pɛ́ɛ́ é dii-nà yaǹnaakú nà mɛ̀m̀pà péé-pa yaǹnaakú mɛhɛká. Nɛ́ pɛ́ɛ́ é kɔń nà mɛ̀m̀pà kɔǹ-pa. ¹⁶ Nɛ́ n'you-nà nɛ tɔɔ̀pa. Nɛ dá m'bɔhɔ̀ta yèdi dontáma, àmá nɛ́ n'naanà tɔná bá nìpa pú kɛɛ̀hi-ná pa̰á̰pu. Nɛ dá n'tóńkú nɛ cɔ̰́ɔ̰̀di yaǹfòùma yam̀ma. ¹⁷ Nɛ dá tɛ̰́ná tɔɔ̀o sḭ̀ḭ̀ma ò nɛ pa̰à̰-ma. Nɛ́ m'pɛnti suumá pa̰á̰ma nìpa wɛǹni yìhìka. ¹⁸ K'yè kó teha, k'yè mɛ̀ɛ békú nɛ́na kú wɛ̰́ɛ̰́ma-dà, kà nɛ́ m'péé wɛ̀ɛ̀di nà tɔɔ̀pa. ¹⁹ N dópòbɔ̀ɔ̀ka-nà, nɛ dá m'bopù nɛ mɔ́mpá bàka tɔɔ̀pa nɛ pa̰kú-ka, àmá nɛ́ hédá kà Weèdi é kà pà bodá, è yá̰á̰ pà wà̰tà Weèdi pɔ̀kàta mɛhɛká è yɔ̀ Kɔ́yɔ̀ɔ Weèdi yɔ̀:

Mmí-dà bopù bàka.

Mmí-dà kó bodá bá mɛ̀ǹǹ dɛ̀ɛ̀-ko ò sànà-sa.

²⁰ Nì de tṵ́mà yɔ̀:

Kà kòni káá a kà̰à̰tɔɔ̀o, k'á ò pa̰a̰ kó dii.

Kà nɛ́yà̰hakú-dà ò káá, k'á ò pa̰a̰ k'ó nìì.

K'à hḭn mɛma, yè yònà a tódà-ma-dà ha̰nkɔ̰ká nà ha̰mú,

é cówá o yudí hḭ́ǹka.

²¹ A dá teha kà sḭ̀ḭ̀ma áa nɛdá, àmá fɔ̰́ń mà nɛdá nà suumá pa̰á̰ma.