¹ Bá mɛ̀ǹǹ dɛ̀ɛ̀-ko é n'you-nà toòka yɔtí kpɛ̰́m̀ma, è yá̰á̰ òcɔ̰́ǹ kɔ́ɔ́ è dɛ́tà kpɛ̰́ǹti kà Weèdi pú tì n'ɔ̀ɔ̀ kɔ̰́ɔ̰̀. Kpɛ̰́ǹti kààka mɛ̀ǹkà mɛ̀ɛ péé-kà wɛnnì, Weèdi-dà kà hḭ́nà. ² Ye kú kpɛ́mú-dà tee, kà nìi pú you-nà toòka yɔtí kpɛ̰́m̀ma, ye yaǹn mɔù-nà pa̰á̰ma Weèdi hḭ́nà-ma-dà. Mɛ̀m̀pà mɛ̀ɛ hɔ̰n-pá mɛma, pà yún-ní pa hḭ́ǹka toyɔ̰́ńti-dà. ³ Mɛ̀m̀pà pa̰kú-pa suumá pú yònà é n'wani yɔtí kpɛ̰́m̀ma. Àmá mɛ̀m̀pà pa̰kú-pa kpákpààma-dà hɔ̰́ pà n'wani. A kpɛ̀i è pú n'wani yɔtí kpɛ̰́m̀ma? Ní m'pa̰kú suumá, mɛma pà kó nà n'sɛdí-ma, ⁴ è yá̰á̰ pà dehú Weèdi kpɛ́mú-dà, è k'áa túdí suumá mɛhɛká. K'à há̰ pa̰à̰ kpákpààma, a kó pà n'wani-í-ma, è yá̰á̰ hécí dɔ pà káá-ma nɔɔ̀ti è kó nɛɛ́ yɔ̰́ń nìi toòka. Kà pà yɔ̰́ń nìi toòka, pà dehú Weèdi kpɛ́mú-dà, è bɛkú ni fɔ̰́di sá̰á̰pu ye yaǹn mɛ̀ǹǹ pa̰à̰-ko kpákpààma hḭ́ǹka. ⁵ Ye kú kpɛ́mú-dà tee ti yònà é n'you-nà-ma toòka yɔtí kpɛ̰́m̀ma. Yè pú yòǹ ti kó mà n'hɔ̰n è kpɛ̀i é yentá Weèdi fɔ̰́di cɔ̰́ɔ̰̀di-dà, àmá tí mà n'hɔ̰n kà ti yàma dá ti n'kɔkapú.

⁶ Ye kú kpɛ́mú-dà tṵ́mà tee kà nɛ bopù dàm̀póòpa. Mɛ̀m̀pà pa̰kú-pa ye kú tɔmù, Weèdi-dà mɛ̀ɛ té mù pà kɔ̰́ɔ̰̀ kà pà mù pa̰kú sukú. ⁷ Nɛ́ bodá bá mɛ̀ǹǹ dɛ̀ɛ̀-ko n'ɔɔ̀ bàn-sá. Nɛ́ bodá dàm̀póò nɛ yònà óò bodá-ko, é bobá kaàcáhàdící nɛ yònà é cì bodá-ko. Nɛ́ n'káá wantafɔ̰̀di nɛ yònà é nì n'káá-ko, é n'cuunì nɛ yònà é n'cuunì-ko.

⁸ Nɛ dá n'káá nɛ tɔɔ̀o bàǹti, k'yè pú yòǹ dɔ́kàma kú bàǹti cɔ̰́ɔ̰̀di nɛ tɔɔ̀pa hḭ́ǹka. Mɛ̀ǹǹ dɔ́sí-ko o tɔɔ̀pa, mɛnń-dà pa̰kú kpɛ̰́ńtìnùka hḭ́mpú wɛǹni. ⁹ Kpɛ̰́ńtìnùkà mɛnkà mɛ̀ɛkà: A dá yetá é cɔ̰ha dɔɔdí, a dá kɔ̀ù tɔɔ̀o, a dá yódá, a dá pa̰á̰ bìnɔ tɔɔ̀o kpɛ́ɛsá hḭ́ǹka, nà tɔɔ̀ka wɛǹni, pɛ́dà è péé wɛnɔ̀dì mɛnì kú cɔ̰́ɔ̰̀di mɛhɛká-dà: Á n'dɔ́sí a tɔɔ̀o é n'yònà a mɔ́nń. ¹⁰ Mɛ̀ǹǹ dɔ́sí-ko o tɔɔ̀o ò pú k'óò pa̰á̰ sḭ̀ḭ̀ma. K'à dɔ́sí a tɔɔ̀o, a tṵ̀n kpɛ̰́ńtìnùka wɛǹni-dà dɛ́dɛ́í.

¹¹ Nɛ́ m'pa̰kú miya̰, mìì tee-sá nɛ yá̰á̰-dà wɔ̀ni ti péé-di kú mɛhɛká. Wɔ̀ni-dà tɛ̀i k'yè békú nɛ́ heǹta nɛ nuǹdɔmú mɛhɛká. Ti de taà tḭ́ń wɔ̀ni ti dandaní Kídísì hḭ́ǹka, kà fḭ́hìnamá káà ti dɛu-nà-á-ma, sá̰mà-ní mà dɔ̀haà é ti hɛ́tá-ma-ní. ¹² Yèǹka kɔ́dí yɔ̀ɔpú-dà, kà daadí kó fodá-ní. Tí wɛ́í pa̰á̰kpákpààma wɛǹni pà pa̰kú-ma yḭ́ḭ̀pu mɛhɛká. Tí hɛɛ̀da wenkú ta̰nɛǹti é bádí. ¹³ Tí n'fòù fòùmu mɛ̀mù coó-pu, é n'yònà mɛ̀m̀pà cèǹtì-pa wenkú mɛhɛká. Tí wɛ́í dikádɛ́nkú, nà naàyà̰pu, nà t'aa n'dáhàta-má ti tɔɔ̀pa è yònà mɔhí, nà yáyámú. Tí wɛ́í kɔ̰ɔ̰̀ka, nà yantimú. ¹⁴ Nɛ dá teha kà nɛ yam̀màhàka é n'cɔ̰mú wɔ̰̀ǹku kpɛ̀i-sá hḭ́ǹka. Nɛ́ hédá kà nɛ fòùmu ní n'yònà Teó Sèsí-Kídísì kpɛ́mú.