¹ Nɛ té codá nɛ cɔhɔ̀ka mɛ̀ǹǹ kú dandaní mun pú kpenì-ko, nɛ mɛ̀ɛ dá ò n'nɔ̀hù-nà k'òo yam̀màhàka pú pɛ́ɛ́ nà nɛ kpɛ́ɛká. ² K'yé n'yònà, òcɔ̰́ maàhu è yɔ̀ ò kó nɛɛ́ é dii-í-dà ye wɛǹni, kà tɔɔ̀o mɛ̀ǹǹ kú dandaní mun pú kpenì-ko, mɛnn ní n'yon kṵ́nkpeèti cɔ̰́ɔ̰̀di. ³ Mɛ̀ǹǹ yon-kó ye wɛǹni pú yònà é yɔ̰́sa mɛ̀ǹǹ pú yon-kó màǹci, mɛ̀ǹǹ mɛ̀ɛ pú yon-kó màǹci pú yònà é kɔ̰́ɔ̰́ yetádi mɛ̀ǹǹ yon-kó ye wɛǹni, mìì tee-sá Weèdi mɛ̀ɛ té ò codà-á-ma. ⁴ Fɔ̰́ń héé wodà è mɛ̀ɛ té kpɛ̀i é dɛ́há tɔɔ̀o deho yetádi? K'ò pa̰kú o tɔmú kà mù sudi yoo kà mù pú sudi, yè dìi o dakpɛ̰́ǹn-dà. Ò mɛ̀ɛ kó mù púsí-ma sukú mìì tee-sá Teó káá-ma nɔɔ̀ti è k'óò tempa-nà.

⁵ Òcɔ̰́ maàhu è yɔ̀ daàka kàcɔ̰́ yòǹ dasàka-dà kà tɔɔ̀ka pú yòǹ, é yídá kà tɔɔ̀o tonà ka wɛǹni sá̰á̰-dà. Yè békú bá pa mɛ̀ǹǹ dɛ̀ɛ̀-ko ní n'yá̰á̰-ma dɛ́dɛ́í o yàma mɛhɛká è yɔ̀ ò màhu-sá yòǹ bémú-dà. ⁶ Mɛ̀ǹǹ yá̰á̰-ko dasàka héé-ka nà mɛ̀ǹkà pú yòǹ-ka dasàka, ye yaǹn mà hɔ̰n Teó kpɛ́mú-dà. Mɛ̀ǹǹ yon-kó ye wɛǹni mɛ̀ɛ té mà hɔ̰n Teó kpɛ́mú-dà, è yá̰á̰ ò hɔ̰́ sɛda Weèdi-dà nà dipú n'ɔ̀ɔ̀ pɛ̰ḭ-pú. Mɛ̀ǹǹ pú yon-kó ye wɛǹni, mà hɔ̰n Teó kpɛ́mú-dà, ò mɛ̀ɛ té sɛdí Weèdi-dà. ⁷ T'oòcɔ̰́ǹ pú fòù o cɔ̰́ɔ̰̀di kpɛ́mú, t'oòcɔ̰́ǹ mɛ̀ɛ pú kɔ̰́n o cɔ̰́ɔ̰̀di kpɛ́mú. ⁸ Kà ti fòù, ti fòù Teó kpɛ́mú-dà, kà ti mɛ̀ɛ kpíi, ti kpíi Teó kpɛ́mú-dà. Ye kú kpɛ́mú, kà ti fòù yoo ti kpíi, ti yòǹ Teó kpɛ́ɛpá-dà, ⁹ è yá̰á̰ Kídísì kpíi, é tón é foùda, è kó n'yòǹ fòùpa nà kpíípa Teó-dà. ¹⁰ Fɔ̰́ń há̰kà, baà tee k'à dɛ́hù a tɔɔ̀o yetádi? Fɔ̰́ń tɔɔ̀o, baà tee k'à yɔ̰́si a tɔɔ̀o? Ti wɛǹni, ti kó wáńtá é nɛɛ̀hi Weèdi yìhìka-dà kà ní ti sída. ¹¹ Weèdi pɔ̀kàta mɛhɛká, pà wà̰tà è yɔ̀:

¹³ Ye kú kpɛ́mú, tí hédá ti kó n'dɛ́hù-ma ti tɔɔ̀pa yetáka. Ti múńtà dá pa̰á̰ yècḭ́ḭ̀, mìì kó nɛɛ́ yehèna-sá ti kúcàa, yoo óò hɛ́í sḭ̀ḭ̀ma mɛhɛká. ¹⁴ N yá̰á̰-ma sukú, yè mɛ̀ɛ yòǹ bemú-dà, è yɔ̀ n daàdi-nà-mà Teó Sèsíì, yècḭ́ḭ̀ pú cií. Há̰kà, kà nìi maàhu è toò miì cií-dà, yè cií o kú pesá-dà. ¹⁵ K'à kɔkapáà a tɔɔ̀o yàma nà dimá a yon-má kú kpɛ́mú, a koò pú tṵ̀n dɔ́kàma hḭ́mpú. A dá teha é sehèna òcɔ̰́ǹ, Kídísì kpíi-kó kú kpɛ́mú nà dimá kú nɔɔ̀ti. ¹⁶ Fɔ̰́ń dìi è yɔ̀ mìì suu-sá a kpɛ́mú, kà tɔɔ̀pa dìi è yɔ̀ yè pú sudi, dá yè pa̰ná, k'yé teha kà pà dá n'wɛì kpákpààma a hḭ́ǹka. ¹⁷ Weèdi wóòti pú yòǹ dipú nà yà̰à̰ma wɛkú. Weèdi wóòti yòǹ niìya̰ Weèdi Sèdi ti pɔ̰n-sá-dà, mií-dà mɛ̀ɛ héé coóma, nà wɛ̀ɛ̀di, nà yaǹnaakú. ¹⁸ Mɛ̀ǹǹ dehú-ko Kídísì kpɛ́mú ma kú bookù, Weèdi k'óò n'naanà-á-ma, kà nìpa óò n'sɛdí.

¹⁹ Ye kú kpɛ́mú, tí m'pɛnti mìì kó nɛɛ́ ti tɛɛ̀-sa-ní wɛ̀ɛ̀di, nà mìì kó nɛɛ́ ti tempa-nà-sa kà tí kpɛ̰́ń dandaní hḭ́ǹka. ²⁰ Dá cɔ̰ha Weèdi dehèmu nà dipú kú nɔɔ̀ti. Mɔ́masí-dà dipú mùcɔ̰́mù pú cií-ma. Àmá, k'à kó dii yècḭ́ḭ̀, k'yé n'tee k'á hɛ́í tɔɔ̀o sḭ̀ḭ̀ma mɛhɛká, yè pú sudi. ²¹ Mìì suu-sá, á cɛ̰ɛ̰́ a cɔ̰́ɔ̰̀di-dà, a dá cécí màǹci, a dá yà̰à̰ naàma, á nakadá fɔ̰́ń baà kó nɛɛ́ pḭ́ń-sa wɛǹni k'yé hɛ́í a kóoó sḭ̀ḭ̀ma mɛhɛká. ²² Fɔ̰́ń yá̰á̰-sa ye hḭ́ǹka, yè púsí a cɔ̰́ɔ̰̀di kpɛ́mú Weèdi yìhìka. Wɛ̀ɛ̀di-dà péé-nà mɛ̀ǹǹ kú yàma pú cakú-ko è yɔ̀ ò yeekú o pa̰á̰ma mɛhɛká. ²³ Mɛ̀ǹǹ há̰ yon-kó dipú k'òo yàma ò kɔkapú, Weèdi ò yɔ̀ɔ kɔ̰́ɔ̰́pu-dà yetádi, mìì tee-sá o pa̰á̰ma pú nɔɔ̀-nà o yàma. Mìì há̰ pú nɔɔ̀-nà-sa wɛǹni nìi yàma, yòǹ sḭ̀ḭ̀ma-dà.