¹ Pagkatapos adto nga mga natabò, nagtabok sina Hesus sa Dagat ng Galilea nga ginatawag da, ‘Dagat ng Tiberias’. ² Kag kadamo-damò gid nga mga tawo ang nagasinunod sa iya, kay nakità ninda ang mga makatitingaya nga iya gingpanghuman sa mga may sakit. ³ Niyan nagtukad si Hesus kag ang iya mga disipulo sa bakuyod kag nagpungkò didto. ⁴ Malapit na adto ang pista ng mga Judio nga ginatawag, ‘Pagligad ng Anghel’^a. ⁵ Pagtan-aw ni Hesus, nakità niya ang kadamo-damò nga mga tawo nga nagapalapit sa iya. Nganì naghambay siya kay Felipe, “Sa diin baya kita makabakay ning pagkaon agud makakaon ini tanan nga tawo?” ⁶ Imaw ini ang pangutana ni Hesus kay gusto lang niya nga tistingon si Felipe. Pero sayod na ni Hesus kung ano ang iya humanon.

⁷ Nagsabat si Felipe, “Ini nga kadamò nga mga tawo, abir wayo pa ka bulan nga suweldo ng ordinaryo nga trabahador, kuyang pa ini nga ibakay ning inda pagkaon abir tig-maintik!”

⁸ Pagkatapos, si Andres nga manghod ni Simon Pedro,^b isa da sa mga disipulo ni Hesus naghambay, ⁹ “Igwa diri ning binatilyo nga may bayon nga lima ka bilog nga tinapay kag duha ka bilog nga maintik nga isdà. Pero ano lang ini sa tiyad inà kadamò nga mga tawo?”

¹⁰ Hambay ni Hesus, “Papungkua nindo ang mga tawo.” Nganì gingpapungkò ninda sinda kay malapad da ang gunahon didto nga lugar. Sa kadamò ng tawo, mga 5,000 ang lyaki. ¹¹ Pagkatapos, gingbuoy ni Hesus ang tinapay kag nagpasalamat sa Dios kag gingpapatao niya ini sa mga tawo. Imaw da ang iya ginghuman sa isdà, kag gingpapataw-an ang tanan hasta gusto ninda. ¹² Nang mabusog na sinda, naghambay si Hesus sa iya mga disipulo, “Tipuna nindo ang mga nabilin agud wayà ning uyak.” ¹³ Nganì gingtipon ninda ang tanan nga nabilin, kag nakatipon pa sinda ning 12 ka tabig nga tinapay nga subra ng mga nagkaon.

¹⁴ Pagkakità ng mga tawo sa makatitingaya nga ginghuman ni Hesus, naghambay sinda, “Imaw na gida ini ang gingsiling nga Miyugbalità ng mensahe ng Dios nga maabot sa kalibutan!”^{c 15} Nahalatà nga daan ni Hesus nga gusto ng mga tawo nga piliton siya nga maging inda harì, nganì naghalin siya liwat nga mag-isa pakadto sa bukid.

¹⁶ Nang manayumsom na, naglusob sa baybay ang mga disipulo ni Hesus, ¹⁷ kag nagsakay sa mabahoy nga baruto agud magtabok pakadto sa Capernaum. Maduyom na pero wayà pa nag-abot si Hesus. ¹⁸ Mintras nagabiyahe sinda, nagkusog ang hangin kag nagdagkò ang humbak. ¹⁹ Nang makabugsay na sinda ning mga lima o unom ka kilometro, nakità ninda si Hesus nga nagapanaw sa ibabaw ng dagat nga nagapalapit sa inda. Nganì ginghadlukan gid sinda. ²⁰ Pero naghambay si Hesus, “Ako ini! Ayaw kamo mahadlok!” ²¹ Nganì nalipay gid sinda nga gingpasakay si Hesus. Pagkasakay ni Hesus, nakaabot nga daan sinda sa piliw nga inda kadtuan.

²² Pagkaaga, nakità ng mga tawo nga nabilin sa kabuak ng Dagat ng Galilea nga yadto ang isa lang nga baruto. Sayod ninda nga bukon kaibahan si Hesus ng mga disipulo kay sinda lang ang nagsakay sa baruto nang naglarga. ²³ Niyan, halin sa Tiberias may nag-abot nga iban nga mga baruto didto sa lugar nga nagpakaon ang Ginoo ning pagkaon nga iya gingpasalamatan sa Dios. ²⁴ Nang makità ng mga tawo nga si Hesus wayà didto o ang iya mga disipulo, nagsakay sinda sa mga baruto kag nagkadto sa Capernaum agud pangitaon si Hesus.

²⁵ Nang makità ninda si Hesus sa kabuak ng Dagat ng Galilea, hambay ninda, “Maistro, kasan-o ka pa nag-abot diri?”

²⁶ Nagsabat si Hesus, “Sa matuod lang, ginapinangità nindo ako bukon kay nakità nindo ang mga makatitingaya nga akon ginghuman, kundì kay nakakaon kamo ning tinapay kag nabusog. ²⁷ Ayaw kamo magpangabudlay para sa pagkaon nga nasisirà lang da, kundì ang tinguhaon nindo hay ang pagkaon nga indì masirà. Ako nga Ongà ng Tawo, ang magtao ini sa indo, para mabuhì kamo abir san-o. Kay gingpakità ng Dios nga Amay nga ako ang gingtaw-an niya ning otoridad.”

²⁸ Nganì nagpangutana sinda, “Ano ang dapat namon nga humanon, agud masunod namon ang kabubut-on ng Dios?”

²⁹ Nagsabat si Hesus, “Imaw ini ang gusto ng Dios nga humanon nindo, magtuo kamo sa akon nga iya gingsugò.”

^30-31 Pero naghambay sinda, “Niyan ano nga makatitingaya ang imo mahuman agud makità namon para magtuo kami sa imo? Ang amon mga kalulo-lulohan hay nagkaon ning pagkaon nga ginatawag ‘mana’^d didto sa malangkag nga lugar, sunò sa gingsulat, ‘Gingtaw-an sinda ni Moises ning pagkaon nga halin sa langit agud kaunon!’ Niyan, ano ang imo humanon?”

³² Nagsabat si Hesus, “Sa matuod lang, bukon si Moises ang nagtao sa inda ning pagkaon nga halin sa langit, kundì ang akon Amay. Niyan siya da ang nagatao sa indo ning matuod nga pagkaon nga halin sa langit. ³³ Kay ang matuod nga pagkaon nga ginatao ng Dios, wayà ning iban kundì siya nga naghalin sa langit kag nagatao ning kabuhì nga wayà katapusan sa mga tawo diri sa kalibutan.”

³⁴ Tapos naghambay sinda, “Nong, taw-i abi kami permi inà nga pagkaon.”

³⁵ Naghambay si Hesus, “Ako mismo ang pagkaon^e nga nagatao ning kabuhì. Ang abir sin-o nga nagapalapit sa akon hay indì na magutom kag ang nagatuo sa akon hay indì na mauhaw abir san-o. ³⁶ Pero pareho ng ginghambay ko sa indo, abir nakità na nindo ang mga makatitingaya nga ginghuman ko^f, wayà pa gihapon kamo nagatuo sa akon. ³⁷ Ang tanan nga ginatao ng Amay sa akon hay magapalapit sa akon kag ang abir sin-o nga magatuo sa akon hay indì ko gid pagasikwayon. ³⁸ Kay nagkari ako halin sa langit, bukon para humanon ang akon kagustuhan, kundì ang kabubut-on ng nagsugò sa akon. ³⁹ Niyan imaw ini ang kabubut-on ng nagsugò sa akon, indì ko gid pabay-an ang mga tawo nga gingtao ng Dios sa akon, para wayà ning may maduyà abir isa, kundì akon sinda pagabuhion liwat sa ulihi nga adlaw. ⁴⁰ Kay ini ang kabubut-on ng akon Amay, ang abir sin-o nga nagakilaya kag nagatuo sa akon nga Ongà ng Dios hay magkaigwa ning kabuhì nga wayà katapusan kag pagabuhion ko siya liwat sa ulihi nga adlaw.”

⁴¹ Nganì nagminuyo-muyo ang mga Judio parti sa ginghambay ni Hesus kay siling niya, “Ako ang pagkaon nga naghalin sa langit.” ⁴² Naghambay sinda, “Dì ba ini si Hesus nga ongà ni Jose? Kilaya gid naton ang iya tatay kag nanay. Basì ginghambay niya nga nagbabà siya halin sa langit?”

⁴³ Nagsabat si Hesus, “Ayaw kamo magminuyo-muyo sa isa kag isa. ⁴⁴ Wayà ning abir isa nga makapalapit sa akon para magtuo, mintras indì day-on sa akon ng Amay nga nagsugò sa akon. Kag pagabuhion ko siya liwat sa ulihi nga adlaw. ⁴⁵ Ini ang gingsulat ng mga miyugbalità ng mensahe ng Dios, ‘Tutudluan ng Dios ang tanan nga mga tawo.’ Nganì ang tanan nga nagapamatì kag nagatuon sa ginatudlò ng akon Amay hay nagapalapit sa akon. ⁴⁶ Wayà ning tawo nga nakakità sa Dios nga Amay, puyra lang sa akon nga naghalin sa Dios, ang nakakità sa iya.

⁴⁷ “Sa matuod lang, ang nagatuo sa akon hay igwa ning kabuhì nga wayà katapusan. ⁴⁸ Ako ang pagkaon nga nagatao ning kabuhì. ⁴⁹ Nagkaon ang indo mga kalulo-lulohan ning pagkaon nga ginatawag ‘mana’ didto sa malangkag nga lugar, pero nagkamatay gihapon sinda. ⁵⁰ Pero ang abir sin-o nga magkaon ini nga pagkaon nga nagbàbà halin sa langit hay indì na mamatay. ⁵¹ Ako ang pagkaon nga nagatao ning kabuhì nga nagbàbà halin sa langit. Ang abir sin-o nga magkaon ini nga pagkaon hay mabubuhì abir san-o. Ini nga pagkaon nga itatao ko para sa mga tawo sa kalibutan hay wayà ning iban kundì ang akon lawas.”

⁵² Niyan nagdiniskusyon ang mga Judio sa isa kag isa nga nagasiling, “Imposibli! Pauno niya itao ang iya lawas para kaunon naton?”

⁵³ Nganì naghambay si Hesus, “Sa matuod lang, mintras indì nindo kaunon ang lawas ng Ongà ng Tawo kag inumon nindo ang iya dugò, indì gid kamo magkaigwa ning kabuhì. ⁵⁴ Pero ang abir sin-o nga magkaon ng akon lawas kag mag-inom ng akon dugò hay igwa ning kabuhì nga wayà katapusan kag pagabuhion ko siya liwat sa ulihi nga adlaw. ⁵⁵ Kay ang akon lawas ang matuod lang gid nga pagkaon kag ang akon dugò ang matuod lang gid nga inumon. ⁵⁶ Ang bisan sin-o nga nagakaon ng akon lawas kag nagainom ng akon dugò hay nagapabilin nga nagapakig-isa sa akon kag ako sa iya. ⁵⁷ Ang akon Amay nga nagsugò sa akon ang ginahalinan ng kabuhì kag nagakabuhì ako tungod sa iya; imaw da ang nagakaon sa akon magakabuhì tungod sa akon. ⁵⁸ Ako ang pagkaon nga nagbàbà halin sa langit. Bukon ini pareho sa pagkaon nga ginatawag ‘mana’ nga gingkaon ng indo mga kalulo-lulohan, kay nagkamatay gihapon sinda. Pero ang nagakaon ng pagkaon nga akon ginahambay sa indo hay magakabuhì abir san-o.”

⁵⁹ Gingtudlò ini ni Hesus didto sa sinagoga sa Capernaum.

⁶⁰ Nang nabatian ini ng madamò nga disipulo ni Hesus, hambay ninda, “Kahuga-hugà ang iya ginatudlò, sin-o ang makabaton ini?”

⁶¹ Abir wayà ning may nagbalità kay Hesus, sayod niya nga nagariklamo ang iya mga disipulo, nganì naghambay siya, “Basì naglain ang indo buot ang akon ginatudlò? ⁶² Ano baya kung makità nindo ang Ongà ng Tawo nga nagabalik paibabaw sa iya ginghalinan? ⁶³ Ang Espiritu ang nagatao ning espirituhanon nga kabuhì, bukon ang lawas ng tawo. Kay wayà ning gahom ang lawas para magtao ini nga kabuhì. Ang akon mga ginghambay sa indo hay halin sa Espiritu kag nagatao ning kabuhì. ⁶⁴ Pero igwa dirà ning pila sa indo nga wayà nagatuo sa akon.” Ginghambay ini ni Hesus kay nang una pa lang sayod niya kung sin-o ang wayà nagatuo sa iya kag kung sin-o ang magatraidor sa iya. ⁶⁵ Nagsiling pa siya, “Nganì naghambay ako sa indo nga wayà ning abir isa nga makapalapit sa akon mintras indì itugot sa iya ng akon Amay.”

⁶⁶ Tunà adto, madamò sa mga disipulo ni Hesus ang nagbayà kag wayà na nagsunod sa iya. ⁶⁷ Nganì nagpangutana si Hesus sa iya 12 nga apostol, “Kamo, gusto da ba nindo nga baya-an ako?”

⁶⁸ Nagsabat si Simon Pedro, “Ginoo, kanin-o pa kami makadto? Ikaw lang ang may mga hambay nga nagatao ning kabuhì nga wayà katapusan. ⁶⁹ Nagatuo kami sa imo mga ginghambay kag sayod namon nga ikaw ang Banal nga gingsugò ng Dios.”

⁷⁰ Nagsiling si Hesus, “Dì ba 12 kamo nga akon gingpilì? Pero ang isa sa indo hay ginasapian ng diyablo!” ⁷¹ Si Judas nga ongà ni Simon Iscariote ang ginamitlang niya. Siya hay isa sa 12 nga apostol nga sa ulihi imaw ang magatraidor kay Hesus.