¹ Nang pangtuyo ka adlaw, igwa ning kasayan sa banwa ng Kana sa probinsya ng Galilea. Kag yadto ang nanay ni Hesus. ² Ging-imbitar da sa kasayan si Hesus kag ang iya mga disipulo. ³ Nang malapit na maubos ang ilimnanon, naghambay ang nanay ni Hesus sa iya, “Ubos na ang inda ning ilimnanon.”

⁴ Nagsabat si Hesus, “Nay, basì ginahambay mo inà sa akon? Bukon pa ini ang oras agud ipakità ang akon gahom.”

⁵ Pagkatapos naghambay ang iya nanay sa mga nagabulig, “Tumana lang nindo ano man ang iya ihambay.”

⁶ Igwa didto ning mabahoy nga mga tadyaw nga unom ka bilog. Nagasuyod ang kada isa ning baynti o traynta ka galon. Ginagamit ini nga panglimpyo sunò sa tradisyon ng relihiyon ng mga Judio. ⁷ Nagsiling si Hesus sa mga nagabulig, “Pun-a nindo ning tubì ang mga tadyaw.” Nganì gingpunò ninda ini hasta sa babà. ⁸ Pagkatapos naghambay si Hesus sa inda, “Magsandok na kamo kag day-on sa nagadumaya sa punsyon.” Nganì gingday-an ninda ang nagadumaya.

⁹ Nang gingtigsiman ng nagadumaya ang tubì nga nahuman nga ilimnanon, wayà siya makasayod kung diin ini halin, kundì adto lang ang mga nagsandok ang nakakasayod. Gingtawag niya ang lyaki nga kinasay, ¹⁰ kag siling niya, “Kadamuan nga tawo, ang kaayo-ayo nga ilimnanon anay ang ginapainom. Pag bayong na ang mga bisita, imaw pa lang ang pagtao ng ordinaryo nga ilimnanon. Pero ikaw, ginapaulihi mo galì ang pinakamaayo nga ilimnanon.”

¹¹ Natabò ini sa Kana nga sakop sa probinsya ng Galilea. Imaw ini ang una sa mga makatitingaya nga ginghuman ni Hesus. Paagi diri, gingpakità niya ang iya gahom kag nagtuo ang mga disipulo sa iya.

¹² Pagkatapos ng kasayan, nagkadto sa Capernaum si Hesus, ang iya nanay, ang iya mga manghod nga lylaki kag mga disipulo, kag nagtinir sinda didto ning pila ka adlaw.

¹³ Malapit na adto ang Pista ng mga Judio nga ginatawag, ‘Pagligad ng Anghel’^a, nganì nagtukad si Hesus pakadto sa Jerusalem. ¹⁴ Pag-abot niya sa Templo, nakità niya nga may mga tawo nga nagabaligyà ning mga baka, karnero kag salampati, kag mga miyugbaylo ning kuwarta^b. ¹⁵ Nganì naghuman siya ning pangbunay nga pisì, kag gingpalayas niya sinda tanan sa templo. Gingpangbugaw niya paluwas ang mga karnero kag baka, gingpangpilak naman niya ang mga kuwarta nga sinsilyo ng mga miyugbaylo ning kuwarta. Tapos gingpangtumba niya ang inda mga lamisa. ¹⁶ Kag hambay niya sa mga miyugbaligyà ning salampati, “Day-a nindo ini tanan paluwas! Ayaw nindo paghumana nga baligyaan ang bayay ng akon Amay.”

¹⁷ Nang makità ini ng iya mga disipulo, nadumduman ninda ang nakasulat sa Kasulatan, “Tungod sa kadakò ng akon paghigugmà sa bayay ng akon Amay, ini ang magiging rason ng kamatayan ko.”^c

¹⁸ Tungod sa ginghuman ni Hesus, nagpangutana ang mga miyugdumaya ng mga Judio sa iya, “Ano ang makatitingaya nga bagay ang imo maipapakità sa amon para pamatuuran nga ikaw hay may otoridad sa paghuman ini?”

¹⁹ Nagsabat si Hesus, “Gubaa nindo ini nga templo kag sa suyod ng tuyo ka adlaw patindugon ko ini liwat!”

²⁰ Nagsiling ang mga Judio, “Aba! 46 ka tuig ang pagpatindog ini nga templo, niyan nagahambay ka nga kaya mo patindugon liwat sa tuyo lang ka adlaw?” ²¹ Pero ang templo nga iya gingmitlang hay ang iya lawas. ²² Nganì nang nabuhì si Hesus liwat, nadumduman ng iya mga disipulo ang ginghambay niya. Nganì nagpati sinda sa Kasulatan kag sa hambay nga gingsiling niya.

²³ Mintras yadto si Hesus sa Jerusalem, nang pista ng Pagligad ng Anghel, madamò ang nagtuo sa iya nang makità ninda ang mga makatitingaya nga iya ginghuman. ²⁴ Pero wayà gid nagsalig si Hesus sa inda kay sayod niya ang pagkatawo ng tanan. ²⁵ Nganì indì na kahinangyan nga balitaan ng abir sin-o parti sa kinaugalì ng tawo kay sayod gid niya ang inda tagipusuon.