¹ Niyan igwa ning isa ka tawo nga ang pangayan hay si Nikodemo. Siya hay miyembro ng grupo ng mga Pinunò ng Relihiyon nga matutom sa Kasuguan^a kag isa sa mga miyugdumaya ng mga Judio. ² Isa ka gab-i, nagkadto siya kay Hesus kag naghambay, “Maistro, sayod namon nga manunudlò ka nga gingsugò ng Dios. Kay wayà ning may makahuman ng mga makatitingaya nga pareho ng imo ginahuman, kung wayà sa iya kabuhì ang Dios.”

³ Nagsabat si Hesus, “Sa matuod lang, kung indì matawo liwat^b ang abir sin-o, indì sa iya magharì ang Dios.”

⁴ Nagsabat si Nikodemo, “Pauno baya ang tawo matawo liwat kung maguyang na siya? Imposibli nga makasuyod pa siya liwat sa tiyan ng iya nanay agud maiongà ng pangaduha ka beses!”

⁵ Nagsabat naman si Hesus, “Sa matuod lang, kung indì maiongà ang tawo sa tubì kag sa Espiritu, indì sa iya magharì ang Dios. ⁶ Kay ang aton kabuhì hay halin sa ginakinan naton, pero ang kabuhì nga espiritu hay halin sa Espiritu ng Dios.

⁷ Ayaw na matingaya sa gingsiling ko sa imo, ‘Kahinangyan tanan matawo liwat.’ ⁸ Nagahuyop ang hangin abir diin niya gusto kag nabatian mo ang huni, pero indì mo masayuran kung sa diin ini nagahalin kag kung sa diin nagapakadto. Nganì imaw da ang abir sin-o nga ging-ongà liwat paagi sa Espiritu hay indì masayuran kung pauno ang natatabò.”

⁹ Nagpangutana si Nikodemo, “Imposibli! Pauno baya ini nga mga bagay matabò?”

¹⁰ Nagsabat si Hesus, “Dì ba manunudlò ka ng mga Israelita? Basì wayà mo pa ini maintindihi? ¹¹ Sa matuod lang, ginahambay namon ang amon nasayuran kag ginapamatuuran namon ang amon nakità, ugaling wayà nindo ginapatihi ang amon pamatuod. ¹² Kung indì nganì nindo mapatihan ang akon ginghambay sa indo parti sa mga bagay diri sa kalibutan, pauno nindo mapatihan kung ihambay nakon sa indo ang mga bagay parti sa langit? ¹³ Wayà gid ning tawo nga nakapaibabaw palangit, kundì ako lang, ang Ongà ng Tawo nga nagpanaog halin sa langit. ¹⁴ Pareho nang gingpataas ni Moises ang sawa nga himò sa bronsi^c sa punta ng sungkod sa malangkag nga lugar, kahinangyan da nga itaas ang Ongà ng Tawo sa kahoy. ¹⁵ Agud ang abir sin-o nga magtuo sa iya hay magkaigwa ning kabuhì nga wayà katapusan.

¹⁶ “Kay ginghigugmà ng Dios ning subra nga kadakò ang mga tawo sa kalibutan, nganì gingtao niya ang iya bugtong nga Ongà, agud ang abir sin-o nga magtuo sa iya hay indì mamatay^d kundì magkaigwa ning kabuhì nga wayà katapusan. ¹⁷ Kay gingsugò ng Dios ang iya Ongà diri sa kalibutan, indì para husgahan ning kamatayon ang mga tawo, kundì luwason sinda paagi sa iya.

¹⁸ “Ang abir sin-o nga nagatuo sa iya hay wayà na ginahusgahi, pero ang abir sin-o ang wayà nagatuo hay nahusgahan na, kay wayà siya nagtuo sa bugtong nga Ongà ng Dios^e. ¹⁹ Kag imaw ini ang basihan ng paghusga, nag-abot ang kahayag sa kalibutan, pero mas gingpalabi ng mga tawo ang kaduyom kaysa kahayag, kay malain ang inda mga ginghuman. ²⁰ Ang abir sin-o nga nagahuman ning malain hay indì gusto sa iwag kay masasayuran nga malain ang inda mga ginahuman kung magpalapit sa iwag. ²¹ Pero ang abir sin-o nga nagakabuhì sa kamatuuran hay nagapalapit sa iwag, agud makikità ng mga tawo ang inda maayo nga ginahuman nga sinda hay nagasunod sa kabubut-on ng Dios.”

²² Pagkatapos adto, nagkadto sina Hesus sa probinsya ng Judea. Didto siya nagtinir kaibahan ng iya mga disipulo kag nagabawtismo siya sa mga tawo.

²³ Si Juan^f hay nagabawtismo da didto sa Enon nga malapit sa Salim, kay dakò ang tubì didto, kag nagakadto ang mga tawo para magpabawtismo. ²⁴ (Nang adto nga tiyempo, wayà pa napipriso si Juan.)

²⁵ Niyan, nagdiskusyon ang mga disipulo ni Juan kag isa ka Judio parti sa paglimpyo sunò sa layi ng inda relihiyon. ²⁶ Nganì nagpalapit sinda kay Juan kag naghambay, “Maistro, adtong nakaibahan mo sa kabuak ng Jordan nga gingpamatuuran mo sa amon, niyan nagabawtismo siya kag kadamo-damò ang nagakadto sa iya para magpabawtismo.”

²⁷ Nagsabat si Juan, “Wayà ning abir ano nga mababaton ang tawo, kung indì ini itao ng Dios sa iya. ²⁸ Kamo mismo ang makapamatuod nang akon ginghambay nga bukon ako ang Kristo^g, kundì gingsugò ako ng Dios para ipreparar ang iya pag-abot. ²⁹ Pareho sa ginakasay, ang babayi nga kiyasayon hay para sa lyaki nga kiyasayon, pero ang amigo ng lyaki nga nagabulig sa inda pagpakasay hay nalilipay gid kung mababatian ang bosis ng lyaki. Nganì pareho sa amigo ng lyaki nga kiyasayon, tudo gid ang akon kalipay. ³⁰ Kahinangyan nga si Hesus mabantog, pero ako dapat na kalimtan.”

³¹ Ang himò sa dutà hay taga-kalibutan, nganì ang iya ginahambay hay parti sa mga bagay sa kalibutan. Pero ang halin sa langit hay makagagahom sa tanan. ³² Abir pa ginapamatuuran niya ang iya nakità kag nabatian, pero wayà ning may nagapati sa iya ginapamatuod. ³³ Pero ang abir sin-o nga nagapati sa iya ginghambay hay nagapamatuod nga ang hambay ng Dios hay matuod gid. ³⁴ Kay ang gingsugò ng Dios hay nagahambay ng mensahe nga halin sa Dios, kay wayà gid ning limitasyon ang pagtao ng Dios sa iya ng Espiritu. ³⁵ Ginahigugmà ng Amay nga Dios ang iya Ongà kag gingtao sa iya ang otoridad nga maggahom sa tanan. ³⁶ Ang abir sin-o nga nagatuo sa Ongà, igwa ning kabuhì nga wayà katapusan. Pero ang wayà nagatuman sa Ongà hay wayà ning kabuhì, kundì magapadayon sa iya ang kahangit ng Dios.