¹ Niyan, nabatian ng mga Pinunò ng Relihiyon nga matutom sa Kasuguan^a nga mas madamò ang nadidisipulo ni Hesus kag nababawtismuhan kaysa kay Juan. ² (Sa matuod lang, bukon mismo si Hesus ang nagapangbawtismo kundì ang iya mga disipulo.) ³ Pagkasayod ni Hesus nga nabatian da ng mga Pinunò ng Relihiyon ang balità parti sa iya, naghalin siya sa probinsya ng Judea kag nagkadto sa Galilea.

⁴ Kahinangyan niya nga mag-agi sa probinsya ng Samarya. ⁵ Niyan nag-abot sinda sa isa ka siyudad sa Samarya nga ginatawag nga Sikar. Malapit didto ang uma nga gingtao ni Jacob sa iya ongà nga si Jose, ⁶ kag didto nga lugar yadto ang balon ni Jacob. Budlay na si Hesus sa pagpanaw, nganì nagpungkò siya sa alihid ng balon. Adto hay mga alas 12 na.

^7,8 Ang mga disipulo ni Hesus hay nagkadto sa banwa agud magbakay ning pagkaon. Mintras nagapungkò siya, may isa ka Samaritana nga nag-abot para mag-sayok. Nagsiling si Hesus, “Painom abi.”

⁹ Nagsabat ang babayi, “Ikaw hay Judio, Samaritana ako, basì ginapangayuan mo ako ning tubì?” (Imaw ini ang ginghambay ng babayi kay wayà nagapakig-imaw ang mga Judio sa mga taga-Samarya.)

¹⁰ Nagsabat si Hesus, “Kung nakasayod ka lang sa regalo nga halin sa Dios kag kung sin-o ako nga nagahambay sa imo, ‘Painom abi’, ikaw pa ang mangayo sa akon agud taw-an ta ning tubì nga nagatao kabuhì.”

¹¹ Naghambay naman ang babayi, “Nong, madayom ang balon kag wayà ka ning pangsandok. Pauno ka makabuoy ning tubì nga nagatao kabuhì? ¹² Basì, subra ka pa ba sa amon kalulo-lulohan nga si Jacob nga nagtao ini nga balon sa amon? Nag-inom siya diri, ang iya mga ongà kag imaw da ang iya mga alila nga hayop! ”

¹³ Nagsabat si Hesus, “Ang kada mag-inom sa ini nga tubì hay mauuhaw liwat, ¹⁴ pero ang abir sin-o nga mag-inom ng tubì nga itao ko hay indì na gid mauuhaw abir san-o. Kay ang tubì nga akon itao hay maging kapareho ng tuburan sa suyod niya nga nagaawas kag nagatao sa iya ning kabuhì nga wayà katapusan.”

¹⁵ Nganì naghambay ang babayi, “Nong, taw-i abi ako inà nga tubì agud indì na ako mauhaw o magbinalikbalik diri para magsayok.”

¹⁶ Nagsabat si Hesus, “Balik anay sa indo kag day-a diri ang imo asawa.”

¹⁷ Nagsiling ang babayi, “Wayà ako ning asawa.”

Nagsiling naman si Hesus, “Tamà ang siling mo nga, ‘Wayà ako ning asawa’, ¹⁸ kay igwa ka na ning lima nga naging asawa kag niyan bukon mo asawa ang imo ginaiba. Matuod gid ang ginghambay mo.”

¹⁹ Tapos naghambay ang babayi, “Nong, sa sirò ko propeta ka. Puydi mangutana sa imo? ²⁰ Basì ang amon mga kalulo-lulohan hay nagsamba sa Dios sa ini nga bukid? Pero kamo nga mga Judio nagahambay nga sa lugar ng Jerusalem kahinangyan sambahon ng mga tawo ang Dios.”

²¹ Nagsiling Si Hesus, “Nang, magpati ka sa akon hambayon! Nagaabot na ang oras nga sambahon nindo ang Dios nga Amay bukon sa ini nga bukid o sa Jerusalem. ²² Kamo nga mga taga-Samarya, wayà gid nindo nakikilaya kung sin-o ang indo ginasamba. Pero kami nga mga Judio, kilaya namon ang amon ginasamba kay ang manluluwas sa mga tawo hay halin sa mga Judio^b. ²³ Pero nag-abot na ang oras kag imaw na nganì ini, nga ang mga matuod nga nagasamba sa Dios nga Tayay hay magasamba paagi sa bulig ng Espiritu kag sunò sa kamatuuran kung sin-o gid siya.^c Kay imaw ini ang ginapangità ng Dios sa mga nagasamba sa iya. ²⁴ Ang Dios hay espiritu, nganì ang mga nagasamba sa iya hay kahinangyan magsamba sa iya paagi sa bulig ng Espiritu kag sunò sa kamatuuran kung sin-o gid siya.”

²⁵ Nagsabat naman ang babayi, “Sayod ko nga magaabot ang Mesias^d nga ginatawag da nga Kristo. Pag-abot niya, ipapasayod niya sa amon ang tanan nga bagay.”

²⁶ Nagsiling naman si Hesus, “Ako mismo nga nagapakig-istorya sa imo ang Kristo^e.”

²⁷ Pagkatapos hambay ni Hesus, nag-abot ang niya mga disipulo halin sa banwa nga nagbakay ning pagkaon. Natingaya sinda kung basì nagapakig-istorya siya sa adto nga babayi. Pero wayà gid may nagpangutana sa iya, ‘Ano ang imo ginapangayò?’ o ‘Basì nagapakig-istorya ka sa iya?’ ²⁸ Tapos gingbilin ng babayi ang iya bangà kag nagbalik siya sa banwa. Pag-abot niya didto, gingpinamalità niya sa mga tawo, ²⁹ hambay niya, “Kari anay kamo! Tan-awa nindo adtong tawo nga nakasayod ng tanan nga akon ginghuman! Siya na ba arà ang Kristo?” ³⁰ Nganì nagluwas ang mga tawo sa banwa kag nagkadto kay Hesus.

³¹ Mintras wayà pa nag-abot ang mga tawo didto kana Hesus, ginainagda ng mga disipulo si Hesus nga magkaon kag hambay ninda, “Maistro, kaon na.”

³² Pero nagsabat si Hesus, “Igwa ako ning pagkaon nga wayà nindo nasasayuri.”

³³ Nganì nagpinangutan-an ang mga disipulo, “Sin-o baya ang nagdaya sa iya ning pagkaon?”

³⁴ Nagsabat si Hesus, “Ang pagkaon ko hay wayà ning iba kundì tumanon ang kabubut-on ng nagsugò sa akon kag tapuson ang ginapahuman niya sa akon. ³⁵ Dì ba hambay nindo, ‘Upat ka bulan pa bago ang tig-ayani?’ Pero ginahambay ko sa indo, lantawa nindo kag siroa ang mga tawo nga nagaabot. Daw sinda ang mga uhay sa mga uma nga maduyaw na kag kahinangyan na nga anihon. ³⁶ Pareho kamo ng mga miyug-ani nga suhuyan ng Dios. Ang mga tawo naman hay daw mga anihon, pagataw-an sinda ning kabuhì nga wayà katapusan. Nganì ang mga miyugtanom ng mga mensahe ng Dios kag ang mga miyug-ani hay pareho nga malilipay. ³⁷ Matuod gid ang hambayanon, ‘Iba ang miyugtanom kag iba naman ang miyug-ani.’ ³⁸ Pareho kamo ng mga miyug-ani nga akon ginasugò agud anihon ang bukon nindo gingpangabudlayan. Iban ang nagpangabudlay kag kamo ang nagaani sa inda gingpangabudlayan.”

³⁹ Madamò ang taga-Samarya sa adto nga banwa ang nagtuo kay Hesus tungod sa gingpamatuod ng babayi, ‘Siya ang nakasayod ng tanan nga akon ginghuman.’ ⁴⁰ Nganì pag-abot ng mga taga-Samarya kay Hesus, nagpangabay sinda sa iya nga magtinir anay didto sa inda. Kag nagtinir siya didto ning duha ka adlaw. ⁴¹ Tungod sa iya mensahe, mas kadamò ang nagtuo sa iya. ⁴² Hambay ninda sa babayi, “Nagatuo kami niyan, bukon lang tungod sa imo ginghambay, kundì kami mismo ang nakabatì ng iya mensahe kag sayod namon nga siya gida ang Manluluwas ng mga tawo sa kalibutan.”

⁴³ Pagkatapos nang duha ka adlaw nga pagtinir didto ni Hesus, naghalin siya kag nagkadto sa Galilea. ⁴⁴ (Si Hesus mismo ang nagpamatuod nga wayà ning miyugbalità ng mensahe ng Dios nga ginatahod sa kaugalingon niya nga banwa.) ⁴⁵ Nang pag-abot niya sa probinsya ng Galilea, maayo gid ang pagbaton sa iya ng mga tawo. Kay yadto da sinda sa pista sa Jerusalem kag nakità ninda ang tanan nga gingpanghuman niya didto.

⁴⁶ Nagkadto liwat si Hesus sa Kana nga sakop ng Galilea, kung sa diin ginghuman niya ang ilimnanon halin sa tubì nang una. Niyan sa banwa ng Capernaum, igwa ning isa ka opisyales ng gobyerno nga ang iya ongà nga lyaki may sakit. ⁴⁷ Nang nabatian niya nga nag-abot si Hesus sa Galilea, nagkadto siya kag nagpakitluoy sa iya nga kung puydi magtugbong siya kag paayuhon ang iya ongà nga lyaki, kay nagaagunisar na siya.

⁴⁸ Naghambay si Hesus sa iya, “Mintras indì kamo makakità ning mga makatitingaya nga milagro, indì kamo magtuo sa akon.”

⁴⁹ Nagsabat ang opisyales, “Nong, lusob na abi bago mamatay ang akon ongà.”

⁵⁰ Nagsiling si Hesus, “Balik na ikaw, kay nag-ayo na ang imo ongà.” Nagpati ang opisyales sa ginghambay ni Hesus, nganì nagpaulì na siya.

⁵¹ Mintras nagatugbong siya, nasumpong niya ang iya mga ulipon kag gingbalità nga maayo na ang iya ongà. ⁵² Nganì nagpangutana siya sa iya mga ulipon kung ano ang oras nag-ayo ang iya ongà. Kag nagsabat sinda, “Kahapon, mga ala una nang hapon nahuwasan siya sa iya sagnat.”

⁵³ Nadumduman ng tatay nga imaw adto nga oras nang ginghambay ni Hesus, ‘Nag-ayo na ang imo ongà.’ Nganì nagtuo siya kay Hesus kag imaw da ang iya bilog nga panimayay.

⁵⁴ Imaw ini ang pangaduha nga makatitingaya nga ginghuman ni Hesus sa Galilea nang paghalin niya sa probinsya ng Judea.