¹ Pagkatapos adto, ginglibot ni Hesus ang mga baryo sa probinsya ng Galilea. Indì niya gusto magkadto sa probinsya ng Judea, kay ang mga pinunò nga Judio didto ginatinguhà siya nga patyon. ² Niyan malapit na ang pista ng mga Judio nga ginatawag ‘Pista ng mga Tolda’^a. ³ Nganì naghambay ang mga manghod nga lyaki ni Hesus sa iya, “Sige! Panaw na kag magkadto sa Judea agud makità ng imo mga disipulo ang mga makatitingaya nga imo ginahuman. ⁴ Kay kung gusto ng tawo makilaya ng tanan, wayà niya nga ginatagua ang iya mga ginahuman. Nagahuman ka lang da ning mga makatitingaya, aba basì indì ka magpakilaya sa bilog nga kalibutan?” ⁵ Ginghambay ini ng mga manghod ni Hesus nga lyaki kay abir sinda hay wayà nagatuo sa iya.

⁶ Nagsabat si Hesus sa inda, “Wayà pa nagaabot ang akon oras, pero sa indo, puydi kamo magkadto abir ano nga oras. ⁷ Wayà nahahangit sa indo ang mga tawo diri sa kalibutan nga wayà relasyon sa Dios. Pero sa akon gid sinda nahahangit, kay ginabisto ko ang inda malain nga mga ginahuman. ⁸ Kamo lang ang tukad sa pista, indì ako magtukad kay wayà pa nagaabot ang akon oras.” ⁹ Pagkahambay ini ni Hesus, nagpabilin siya sa Galilea.

¹⁰ Pero pagkahalin ng mga manghod ni Hesus, nagkadto da siya sa pista, ugaling patagò lang. ¹¹ Ginapinangità siya ng mga pinunò nga Judio sa pista. Nagsiling sinda, “Diin baya adto nga tawo?” ¹² May ginahinambay ang kada grupo ng mga tawo parti kay Hesus. Ang iban naghambay, “Maayo siya nga tawo.” Ang siling naman ng iban, “Bukon! Ginapatayang lang niya ang mga tawo.” ¹³ Pero wayà gid sinda nagahambay ning makusog parti sa iya tungod sa kahadlok sa mga pinunò nga Judio.

¹⁴ Sa tungà-tungà ng kapistahan, nagsuyod si Hesus sa templo kag nagtudlò. ¹⁵ Natingaya gid ang mga pinunò nga Judio kag naghambay, “Pauno baya ini nga tawo nakatuon? Wayà nganì siya ning mataas nga iniskwelahan, basì madamò siya ning tinun-an?”

¹⁶ Nganì nagsabat si Hesus sa inda, “Ang akon ginatudlò hay bukon halin sa akon, kundì halin sa Dios nga nagsugò sa akon. ¹⁷ Ang abir sin-o nga nagahandom nga humanon ang kabubut-on ng Dios, hay masasayuran gid niya kung ang akon ginatudlò hay halin sa Dios o akon-akon lang. ¹⁸ Ang tawo nga nagatudlò sa iya sarili nga kamayad hay nagahandom ng pagdayaw sa iya sarili. Pero ang nagatinguhà ng pagdayaw sa nagsugò sa iya hay nagatudlò ning matuod kag wayà siya nagapinusong. ¹⁹ Dì ba gingtao ni Moises sa indo ang Kasuguan? Pero wayà gid abir isa sa indo nga nagatuman. Kay kung nagatuman kamo, basì gusto nindo ako nga patyon?”

²⁰ Ang sabat ng mga tawo, “Ikaw hay ginasapian ng malain nga espiritu! Sin-o ang gusto nga magpatay sa imo?”

²¹ Nagsabat si Hesus, “Natingaya gid kamo tanan kay may isa ka tawo nga ging-ayo nakon sa Adlaw nga Inugpahuway. ²² Pero kamo da nagatrabaho sa Adlaw nga Inugpahuway sa pagsunod nindo sa Kasuguan ni Moises parti sa pagpaltak sa lapsag. (Bukon ini naghalin kay Moises kundì sa indo mga kalulo-lulohan). ²³ Kay ginapaltak nindo ang lapsag,^b pero wayà nindo ini ginabilang nga pagsuway sa Kasuguan ni Moises. Kung tiyad ini, basì nahahangit kamo sa akon kay ging-ayo ko ning kumplito ang isa ka tawo sa Adlaw nga Inugpahuway? ²⁴ Ayaw magpanghusga sunò sa pangluwas nga indo nakikità, kundì hunahunaa ini anay ning maayo, agud makahusga kamo ning tamà.”

²⁵ Niyan naghambay ang iban nga mga taga-Jerusalem, “Dì ba, imaw ini ang tawo nga ginapinangità ng mga pinunò naton kag gusto siya patyon? ²⁶ Yarà siya ho, nagahambay sa publiko, basì wayà ning may nagahambay kuntra sa iya? Siguro nagapati na ang mga pinunò nga siya ang Kristo^c. ²⁷ Pero imposibli, kay sayod naton kung diin naghalin ini nga tawo. Pag mag-abot ang Kristo, wayà ning abir sin-o nga makasayod kung diin siya maghalin.”

²⁸ Nganì nang nagatudlò gihapon si Hesus sa Templo, naghambay siya ning makusog, “Kilaya gida ba nindo kung sin-o gid ako kag sayod gida ba nindo kung sa diin ako naghalin? Sa matuod lang, nagkari ako bukon sa akon sarili nga kagustuhan, kundì ang matuod nga Dios imaw ang nagsugò sa akon. Wayà nindo siya nakikilaya, ²⁹ pero ako, kilaya ko gid siya, kay halin ako sa iya kag siya mismo ang nagsugò sa akon.” ³⁰ Nganì nang nabatian ini ng mga pinunò ng Judio, gingtinguhà ninda nga dakpon si Hesus. Pero wayà ning may nag-aristo sa iya kay wayà pa nag-abot ang iya oras. ³¹ Abir tiyad ini, madamò nga mga tawo ang nagtuo sa iya, hambay ninda, “Pag mag-abot ang Kristo, makakahuman arà siya ning mas labaw nga mga makaititingaya kaysa ginghuman ng ini nga tawo?”

³² Nang nabatian ng mga Pinunò ng Relihiyon nga matutom sa Kasuguan^d ang ginahinutikan ng mga tawo parti kay Hesus, nagsugò sinda kag ang mga pinunò nga parì ng mga Judio ning mga guwardya ng templo para dakpon siya. ³³ Nagsiling si Hesus, “Matag-od na lang ang oras nga makaibahan ako nindo, pagkatapos mabalik na ako sa nagsugò sa akon. ³⁴ Pangitaon nindo ako, pero indì nindo ako makità, kay indì kamo makakadto sa akon kadtuan.”

³⁵ Nganì nagpinangutan-an ang mga pinunò ng Judio sa isa kag isa, “Diin baya ini nga tawo makadto? Basì indì naton siya makità? Makadto ba arà siya sa mga malayo nga lugar nga ginaistaran ng iban nga mga kasimanwa naton agud magtudlò sa mga Griego? ³⁶ Ano ang gusto niya silingon, ‘Pangitaon nindo ako pero indì nindo ako makità, kay indì kamo makakadto sa akon kadtuan’?”

³⁷ Niyan sa ulihi nga adlaw ng pista, imaw ini ang pinakaimportante nga adlaw, nagtindog si Hesus kag naghambay ning makusog, “Ang bisan sin-o nga ginauhaw hay magpalapit sa akon kag mag-inom. ³⁸ Kay nakasulat sa Kasulatan, ‘Ang abir sin-o nga nagatuo sa akon, may tubì nga nagatao ning kabuhì nga nagailig daw tuburan halin sa iya tagipusuon.’^e” ³⁹ (Ang gusto hambayon ni Hesus sa tubì nga nagatao ning kabuhì hay ang Espiritu Santo nga malapit na itao sa mga nagatuo sa iya. Kay nang adto nga tiyempo wayà pa maitao ang Espiritu Santo kay wayà pa si Hesus gingdaya palangit kag gingtaw-an ning pinakamataas nga pagdayaw.)

⁴⁰ Nang nabatian ng kadam-an ang mga ginghambay ni Hesus, ang iban naghambay, “Imaw na gida ini ang matuod nga Miyugbalità ng mensahe ng Dios.” ⁴¹ Ang iban naghambay, “Siya ang Kristo!” Pero naghambay pa gid ang iban, “Bukon! Kay indì puydi nga maghalin ang Kristo sa Galilea! ⁴² Dì ba nakasulat sa Kasulatan nga ang Kristo hay halin sa inapo ni David kag magahalin sa Betlehim, ang banwa nga ging-ungaan kay David?” ⁴³ Nganì wayà nagkaisa ang mga tawo kung sin-o gid si Hesus. ⁴⁴ Ang iban gusto siya dakpon, pero wayà ning may nag-aristo sa iya.

⁴⁵ Niyan, nagbalik ang mga guwardya ng templo sa mga pinunò nga parì ng mga Judio kag sa mga Pinunò ng Relihiyon nga matutom sa Kasuguan nga nagsugò sa inda agud dakpon si Hesus. Nagpangutana ang nagsugò sa inda, “Basì wayà nindo siya pagday-a diri?”

⁴⁶ Nagsabat ang mga guwardya ng templo, “Wayà pa ning abir sin-o nga nakahambay pareho ng adto nga tawo!”

⁴⁷ Nagsiling ang mga Pinunò ng Relihiyon, “Ang gusto nindo hambayon patì kamo, naluko na da niya? ⁴⁸ Nakakità na ba kamo ning abir isa sa amon nga pinunò ng banwa o Pinunò ng Relihiyon nga matutom sa Kasuguan nga nagatuo sa iya? Wayà gid! ⁴⁹ Ang mga tawo lang gid nga wayà kasayod sa Kasuguan ang nagatuo sa iya. Busungon gid sinda ng Dios!”

⁵⁰ Ang isa diri sa mga Pinunò ng Relihiyon nga matutom sa Kasuguan hay si Nikodemo^f nga dati anay nagpakigkità kay Hesus. Niyan naghambay siya sa inda, ⁵¹ “Dì ba, ginabawal ng aton Kasuguan nga husgahan ang isa ka tawo nga wayà pa maimbistigahi? Dapat anay mapamatian naton siya agud masayuran naton kung ano ang iya ginghuman.”

⁵² Nagsabat sinda, “Basì, taga-Galilea da ba ikaw? Usisaa ang mga Kasulatan kag masayuran mo nga wayà ning miyugbalità ng mensahe ng Dios nga magahalin sa Galilea!”

⁵³ [Pagkatapos adto, nagbalik sinda tanan sa inda nga mga bayay.] ^g