¹ [Pero nagkadto si Hesus sa Bakuyod ng Olibo^a. ² Aga pa gid nagkadto siya liwat sa templo, kag tanan nga mga tawo nagpalapit sa iya. Nagpungkò siya kag gingtudluan sinda. ³ Niyan, ang mga manunudlò ng Kasuguan kag mga Pinunò ng Relihiyon nga matutom sa Kasuguan^b hay nagdaya ning babayi nga naabutan nga nagapangawatan, kag gingpatindog ninda siya sa atubangan ng madamò nga tawo.

⁴ Nagsiling sinda kay Hesus, “Maistro, naabot ini nga babayi sa akto nga nagapangawatan. ⁵ Niyan sunò sa Kasuguan ni Moises, dapat buguyon ang tiyad ini nga babayi hasta sa mamatay. Para sa imo, ano ang imo mahahambay?”

⁶ Imaw ini ang inda gingsiling para tistingon si Hesus, agud igwa sinda ning maiakusar kuntra sa iya. Pero wayà nagsabat si Hesus, nagdukò siya kag nagsulat sa dutà paagi sa iya tudlò. ⁷ Kay padayon gihapon ang inda kapapangutana sa iya, nagtindog siya kag naghambay sa inda, “O sige, kung sin-o sa indo ang wayà ning salà, imaw ang una nga magbugoy ning bato sa iya.” ⁸ Pagkatapos, nagdukò siya kag nagsulat liwat sa dutà.

⁹ Nang nabatian ninda adto, isa-isa sinda nga naghalin, magtunà sa pinakamaguyang hasta nga si Hesus na lang ang nabilin kag ang babayi nga nagatindog sa iya atubangan. ¹⁰ Pagkatapos, nagtindog si Hesus kag naghambay sa babayi, “Diin na sinda? Wayà ba ning may nagparusa sa imo?”

¹¹ Nagsabat siya, “Wayà, Nong.”

Nagsiling si Hesus, “Indì ko da ikaw parusahan. Umulì ka na kag tunà niyan ayaw na magpakasalà liwat.”]^c

¹² Pagkatapos naghambay liwat si Hesus sa mga Pinunò ng Relihiyon nga matutom sa Kasuguan, “Ako ang iwag nga nagatao ning kahayag sa mga tawo diri sa kalibutan. Ang abir sin-o nga nagasunod sa akon agud maging disipulo ko hay igwa ning iwag nga nagatuytoy sa iya sa kabuhì kag indì na magkabuhì sa kaduyom.”

¹³ Tapos naghambay sinda, “Ikaw lang da ang nagapamatuod parti sa imo sarili. Nganì indì mapatihan ang imo pamatuod.”

¹⁴ Nagsabat si Hesus, “Pero abir ako lang ang nagapamatuod parti sa akon sarili, matuod gid ang pamatuod ko, kay sayod ko kung diin ako naghalin kag kung diin ako pakadto. Pero kamo wayà makakasayod kung diin ako naghalin kag kung diin ako pakadto. ¹⁵ Ang paghusga nindo hay indì masaligan kay sunò ini sa panghunahunà ng tawo, pero ako wayà nagahusga abir kanin-o. ¹⁶ Bisan maghusga ako, tamà ang paghusga ko, kay bukon lang ako ang magahusga kundì ako kag ang akon Amay nga nagsugò sa akon. ¹⁷ Dì ba nakasulat sa indo Kasuguan nga masaligan kung pareho ang pamatuod ng duha ka tawo? ¹⁸ Ako ang nagapamatuod sa akon sarili kag nagapamatuod da parti sa akon ang akon Amay nga nagsugò sa akon.”

¹⁹ Nganì nagpangutana sinda, “Diin ang imo Amay?”

Nagsabat si Hesus, “Wayà nindo ako makilaya o ang akon Amay. Kung kilaya kuntà nindo ako, nakilaya da nindo ang akon Amay.” ²⁰ Ini nga mga ginghambay ni Hesus hay gingtudlò niya didto hampig sa ginabutangan ning ginahalad nga kuwarta sa Templo. Pero wayà siya gingdakpa kay wayà pa nag-abot ang iya oras.

²¹ Naghambay si Hesus liwat sa mga pinunò ng Judio, “Indì na ako magdugay, mahalin ako kag pangitaon nindo ako. Pero mamamatay kamo nga nagapadayon kamo sa pagpakasalà. Indì kamo makakadto sa akon kadtuan.”

²² Nganì naghambay sinda sa isa kag isa, “Basì naghambay siya, ‘Indì kamo makakadto sa akon kadtuan?’ Mabikti ba arà siya?”

²³ Naghambay siya, “Kamo hay halin sa kalibutan pero ako halin sa langit. Nganì kamo hay taga-diri sa ini nga kalibutan, pero ako hay bukon. ²⁴ Imaw ini ang rason sa ginghambay ko sa indo nga mamamatay kamo nga nagapadayon kamo sa pagpakasalà. Sigurado nga matatabò ini sa indo kung kamo indì magtuo nga ako ang Dios^d.”

²⁵ Nagpangutana sinda, “Sin-o ka gid baya?”

Nagsabat si Hesus, “Ginghambay ko na sa indo tunà pa nang una kung sin-o ako. ²⁶ Madamò pa ako ning maihahambay kag maihuhusga kuntra sa indo ginahuman. Pero ang akon lang ginahambay sa mga tawo diri sa kalibutan hay ang akon nabatian sa iya nga nagsugò sa akon. Kag ang iya ginahambay hay matuod.”

²⁷ Wayà gid sinda makaintindi nga parti sa iya Amay sa langit ang ginghambay ni Hesus. ²⁸ Nganì naghambay si Hesus, “Pag itaas na nindo ang Ongà ng Tawo sa kahoy, masasayuran nindo nga ako ang Dios^e. Wayà ako nagahuman paagi sa akon sarili nga otoridad, kundì kung ano ang gingtudlò ng akon Amay, imaw lang ang akon ginahambay. ²⁹ Kag siya nga nagsugò sa akon hay kaibahan ko, wayà gid niya ako ginabayai kay kung ano ang makapalipay sa iya imaw gid permi ang akon ginahuman.” ³⁰ Pagkabatì ng mga tawo sa mga ginghambay ni Hesus, madamò ang nagtuo sa iya.

³¹ Nganì naghambay si Hesus sa mga Judio nga nagatuo sa iya, “Kung padayon nindo nga sundon ang akon ginatudlò, matuod gid kamo nga akon mga disipulo. ³² Kag maintindihan nindo ang kamatuuran kag ang kamatuuran imaw ang makapahilway sa indo.”

³³ Nagsabat sinda, “Ang kalulo-lulohan namon si Abraham kag wayà gid kami naulipon abir kanin-o. Basì gingsiling mo nga, ‘ang kamatuuran ang makapahilway sa indo?’ ”

³⁴ Nagsabat si Hesus, “Sa matuod lang, ang abir sin-o nga nagapadayon sa pagpakasalà hay ulipon ng salà. ³⁵ Ang ulipon hay bukon permamenti nga miyembro sa panimayay pero ang ongà hay permamenti gid. ³⁶ Nganì kung pagahilwayon kamo ng Ongà ng Dios, matuod gid nga mahihilway kamo!

³⁷ “Sayod ko nga halin kamo sa inapo ni Abraham, pero basì ginatinguhà gid nindo nga ako patyon? Kay wayà nindo ginabatuna ang akon ginatudlò. ³⁸ Ginahambay ko ang mga bagay nga akon nakità nang kaibahan ko ang akon Amay. Pero kamo, ginahuman nindo kung ano ang nabatian nindo sa indo tatay.”

³⁹ Naghambay ang mga pinunò ng Judio, “Ang amon kalulo-lulohan si Abraham!”

Nagsabat si Hesus, “Kung halin kamo sa inapo ni Abraham, dapat sundon kuntà nindo ang iya maayo nga halimbawà. ⁴⁰ Pero ang indo ginahuman hay ginatinguhà gid nindo ako nga patyon, abir ginahambay ko lang da ang kamatuuran nga akon nabatian sa Dios. Wayà ginghumana ni Abraham ang ginahuman nindo! ⁴¹ Ang indo ginahuman hay pareho da ng ginahuman ng indo tatay.”

Nganì nagsabat sinda, “Bukon kami mga ongà sa luwas. Ang Dios lang mismo ang amon Amay.”

⁴² Naghambay si Hesus, “Kung ang Dios ang indo Amay, dapat higugmaon kuntà nindo ako kay naghalin ako sa Dios. Nagkari ako bukon sa akon sarili nga kagustuhan kundì sa iya nga nagsugò sa akon. ⁴³ Basì indì nindo maintindihan ang akon ginahambay? Kay indì nindo gusto batunon ang akon mensahe. ⁴⁴ Kamo hay ongà ng Diyablo^f! Kag ang gusto nindo humanon hay ang mga hilig ng indo tatay. Miyugpamatay siya tunà pa nang una kag permi siya nagakuntra sa kamatuuran, kay ginabilang niya nga wayà puyos ang kamatuuran. Pag gahambay siya ning binakak, sunò ini sa iya kinaugalì, kay pusong siya kag tatay ng tanan nga bakakon. ⁴⁵ Pero ako, ang ginahambay ko sa indo hay ang kamatuuran gid, kag ina ang rason nga wayà nindo ako ginapatihi. ⁴⁶ Sin-o sa indo ang makakapamatuod nga nakahuman ako salà? Wayà! Kung ginahambay ko ang kamatuuran, basì wayà kamo nagatuo sa akon? ⁴⁷ Ang mga ongà ng Dios hay nagapamatì sa iya mensahe. Indì kamo gusto magpamatì kay bukon kamo mga ongà ng Dios.”

⁴⁸ Nagsabat ang mga pinunò ng Judio kay Hesus, “Matuod gid ang ginahambay namon nga ikaw hay Samaritano^g kag ginasapian ng malain nga espiritu.”

⁴⁹ Nagsabat si Hesus, “Wayà ako ginagamhi ng malain nga espiritu. Kundì ginapadunggan ko ang akon Amay, pero ginapakahuy-an nindo ako. ⁵⁰ Wayà ako nagatinguhà ng pagdayaw para sa akon sarili, pero ang Dios imaw ang nagahandom ng pagdayaw para sa akon kag siya ang magahusga kuntra sa indo. ⁵¹ Sa matuod lang, ang abir sin-o nga nagatuman ng akon ginatudlò, hay indì na makaagi ning kamatayon.”

⁵² Nagsiling ang mga pinunò ng Judio, “Niyan sigurado gid kami nga ginasapian ka ng malain nga espiritu. Kay namatay na si Abraham kag imaw da ang mga miyugbalità ng mensahe ng Dios, pero ikaw nagahambay, ‘Ang abir sin-o nga nagatuman ng akon ginatudlò, hay indì na makaagi ning kamatayon.’ ⁵³ Aba! Subra ka pa ba sa amon kalulo-lulohan nga si Abraham nga namatay? Namatay da ang mga miyugbalità ng mensahe ng Dios, kanin-o mo ginapapareho ang imo sarili?”

⁵⁴ Nagsabat si Hesus, “Kung ginabuhat ko ang akon sarili nga bangkò, wayà gid ini puyos. Ang akon Amay imaw ang nagadayaw sa akon. Siya ang ginahambay nindo nga indo Dios. ⁵⁵ Wayà nindo siya nakikilaya, pero ako, kilaya ko gid siya! Kung ginahambay ko nga wayà ko siya nakikilaya, pusong ako pareho nindo. Pero kilaya ko gid siya kag ginatuman ko ang iya ginasugò sa akon. ⁵⁶ Nalipay gid si Abraham nga indo kalulo-lulohan nang nasayuran niya nga makikità niya ang akon pag-abot. Nakità galì niya ini kag nalipay gid siya.”

⁵⁷ Nganì naghambay ang mga pinunò ng Judio, “Pauno mo mahambay nga nakità mo na si Abraham? Wayà ka pa nganì ning 50 anyos!”

⁵⁸ Nagsabat si Hesus, “Sa matuod lang, bago natawo si Abraham, yari na ako^h.” ⁵⁹ Tungod sa iya gingsiling, nagpuyot sinda ning bato agud buguyon siya, pero nakapanagò siya kag nakaluwas sa templo.