¹ Mintras nagapanaw si Hesus kag ang iya mga disipulo, nakità ninda ang isa ka tawo nga buta tunà nang ging-ongà. ² Nagpangutana ang mga disipulo sa iya, “Maistro, sin-o ang naghuman ning salà nganì ging-ongà nga buta ini nga tawo, siya o ang iya mga ginikanan?”

³ Nagsabat si Hesus, “Bukon tungod sa iya salà o sa salà ng iya mga ginikanan. Natabò ini sa iya, agud makikità ng mga tawo ang gahom ng Dios paagi sa pag-ayo sa iya . ⁴ Mintras may adlaw pa, kahinangyan nga trabahuon naton ang mga ginapatrabaho sa aton ng Dios nga nagsugò sa akon. Kay kung gab-i na, indì na naton mahuman ang iya ginapahuman. ⁵ Mintras yari pa ako sa kalibutan, ako ang iwag nga nagatao ning kahayag sa mga tawo.”

⁶ Pagkahambay ini ni Hesus, nagpilà siya sa dutà kag ginghuman niya nga lunang ang pilà kag gingpahid niya ini sa mga mata ng tawo. ⁷ Hambay ni Hesus, “Kadto ka sa dipusito ng tubì sa Siloam kag manghilam-os ka.” (Ang gusto silingon ng Siloam, ‘Gingsugò’.) Nganì nagkadto siya kag nagpanghilam-os, kag nagbalik siya nga nakakakità na.

⁸ Nagpinangutan-an ang iya mga kalapit kag ang mga nakakakità sa iya dati nga nagapinalimos pa siya, “Dì ba imaw ini ang tawo nga nagapungkò kag nagapinalimos dati?”

⁹ Nagsiling ang iban, “Siya nganì!”

Pero naghambay naman ang iban, “Bukon, kahitsura lang niya.”

Nganì nagsabat ang tawo, “Ako gida ang tawo nga indo ginahambay.”

¹⁰ Nganì nagpangutana sinda sa iya, “Kung imaw, pauno ka nakakità?”

¹¹ Nagsabat siya, “Ang tawo nga ang pangayan Hesus hay naghuman ning lunang kag gingpahid sa akon mga mata kag naghambay sa akon, ‘Kadto ka sa dipusito ng tubì sa Siloam kag manghilam-os ka.’ Nganì nagkadto ako kag nagpanghilam-os, tapos nakakità na ako.”

¹² Nagpangutana pa gid sinda, “Diin na ang tawo nga nagpaayo sa imo?”

Nagsabat siya, “Ilam kung diin, wayà ako kasayod.”

¹³ Pagkatapos, gingdaya ninda ang tawo nga dati buta sa mga Pinunò ng Relihiyon nga matutom sa Kasuguan^a. ¹⁴ Adto hay Adlaw nga Inugpahuway nang ginghuman ni Hesus ang lunang kag ging-ayo niya ang buta. ¹⁵ Nganì nagpangutana da ang mga Pinunò ng Relihiyon nga matutom sa Kasuguan sa iya kung pauno siya nakakità. Nagsabat siya, “Gingpahiran niya ning lunang ang akon mga mata, pagkatapos nagpanghilam-os ako kag nakakakità na ako.”

¹⁶ Naghambay ang iban nga mga Pinunò ng Relihiyon nga matutom sa Kasuguan, “Bukon halin sa Dios adto nga tawo kay wayà siya nagasunod sa kasuguan parti sa Adlaw nga Inugpahuway.”

Pero naghambay ang iban, “Pauno ang tawo nga makasal-anan makahuman ning mga makatitingaya?” Kag wayà sinda nagkaisa.

¹⁷ Nganì, nagpangutana sinda liwat sa tawo nga dati buta, “Ano ang mahahambay mo sa adto nga tawo, kay gingsiling mo nga ging-ayo niya ang imo mga mata?”

Nagsabat ang tawo, “Siya hay miyugbalità ng mensahe ng Dios.”

¹⁸ Pero wayà nagpati ang mga pinunò ng Judio nga buta siya dati kag niyan hay nakakakità na. Nganì gingpatawag ninda ang iya mga ginikanan. ¹⁹ Pagkatapos, gingpangutana ninda sinda, “Imaw ba ini ang indo ongà? Matuod gida ba nga ging-ongà siya nga buta? Basì nakakakità na siya niyan?”

²⁰ Nagsabat ang iya mga ginikanan, “Huo, ongà namon siya kag matuod gid nga natawo siya nga buta. ²¹ Pero wayà na kami makasayod kung pauno siya nakakità niyan, kag wayà da kami makasayod kung sin-o ang nagpaayo sa iya mga mata. Pangutan-a na lang nindo siya kay may edad na da siya, makakasabat na siya para sa iya sarili.” ²² Imaw ini ang sabat ng iya mga ginikanan kay nahadlok sinda sa mga pinunò ng Judio. Kay nagkinasugtanan ang mga pinunò ng Judio nga ang abir sin-o nga magkilaya nga si Hesus ang Kristo hay indì na ibilang nga miyembro sa sinagoga. ²³ Nganì gingsiling ng mga ginikanan ng tawo, “May edad na da siya, makakasabat na siya para sa iya sarili.”

²⁴ Nganì sa pangaduha nga beses, gingpatawag ninda ang tawo nga dati buta kag ginghambayan, “Magbalità ka ning matuod kay nagapamatì ang Dios^b. Sayod namon makasasalà adto nga tawo.”

²⁵ Nagsabat siya, “Wayà ako makasayod kung siya hay makasasalà o bukon. Isa lang ang sayod ko, buta ako dati, pero niyan nakakakità na.”

²⁶ Nagpangutana sinda liwat, “Ano ang ginghuman niya sa imo? Pauno niya ging-ayo ang imo mga mata?”

²⁷ Nagsabat naman siya, “Gingbalità ko na sa indo, pero wayà kamo nagpati. Basì gusto na naman nindo nga mabatian liwat? Gusto da ba nindo nga maging disipulo niya?”

²⁸ Tungod diri, tudo ang kahangit ng mga pinunò kag gingmuyay ninda siya, “Ikaw ang disipulo ng adto nga tawo! Pero kami hay mga disipulo ni Moises. ²⁹ Sayod namon nga nagpakig-istorya ang Dios kay Moises nang una, pero adto nga tawo wayà nganì kami makasayod kung diin siya naghalin!”

³⁰ Nagsabat ang tawo nga dati buta, “Taya! Imaw nganì inà ang makatitingaya! Ging-ayo ng adto nga tawo ang akon mga mata, pero wayà kamo makasayod kung diin siya naghalin. ³¹ Sayod naton nga ang Dios wayà nagapamatì sa mga makasal-anan, pero nagasabat siya sa abir sin-o nga matutom nga nagahigugmà sa iya kag nagasunod sa iya kabubut-on. ³² Tunà pa nang ginghuman ang kalibutan, wayà pa gid kita nakabatì nga may tawo nga nakapaayo sa ging-ongà nga buta. ³³ Kung adto nga tawo bukon halin sa Dios, indì siya makakahuman ning tiyad ini.”

³⁴ Nagsabat ang mga pinunò ng Judio, “Ikaw hay makasasalà gid tunà nang ging-ongà. Tapos ikaw pa ba ang magtudlò sa amon?” Kag adto nga daan gingpalayas ninda siya paluwas sa sinagoga.

³⁵ Nabatian ni Hesus nga inda gingpalayas sa sinagoga ang tawo nga dati buta. Nganì gingpangità niya siya kag ging-istorya, “Ikaw, nagatuo ka ba sa Ongà ng Tawo?”

³⁶ Nagsabat ang tawo, “Nong, sin-o siya? Balitai abi ako agud magtuo ako sa iya.”

³⁷ Nagsiling si Hesus, “Nakità mo na siya kag siya ang nagapakig-istorya sa imo niyan.”

³⁸ Naghambay ang tawo, “Ginoo, nagatuo ako sa imo!” Kag nagsamba siya kay Hesus.

³⁹ Nagsiling naman si Hesus, “Nagkari ako diri sa kalibutan para husgahan ang mga tawo, agud makakakità ang mga nakakasayod nga sinda buta sa kamatuuran, kag mabubuta ang mga nagahunahunà nga sinda hay nakakasayod ng kamatuuran.”

⁴⁰ Niyan, may iban nga mga Pinunò ng Relihiyon nga matutom sa Kasuguan nga malapit hampig kay Hesus kag nakabatì sinda sa iya ginahambay. Nagsiling sinda sa iya, “Basì? Gusto mo ba silingon nga kami da hay mga buta?”

⁴¹ Nagsabat si Hesus, “Kung mga buta kamo, mapatawad kuntà ang indo kasal-anan. Pero kay ginahambay nindo nga nakakakità kamo, imaw ang nagapamatuod nga may mga salà gihapon kamo.”