¹ Nagtudlò si Hesus paagi sa ini nga parabola^a, “Sa matuod lang, ang abir sin-o nga nagasuyod sa kulungan ng karnero nga wayà nagaagi sa puwertahan, kundì nagasakà sa kuray hay miyugpangawat kag tulisan! ² Kay ang matuod nga pastor^b ng karnero hay nagasuyod paagi sa puwertahan. ³ Ginaabrihan ng miyugbantay ang puwertahan para sa pastor kag ang mga karnero nagapamatì sa iya bosis. Ginatawag ng pastor ang iya sarili nga mga karnero sa inda mga pangayan kag nagauna siya sa inda paluwas. ⁴ Pag mailuwas na tanan, nagapanaw siya nga nauuna sa inda. Ang mga karnero hay nagasunod sa iya kay kilaya gid ninda ang iya bosis. ⁵ Pero indì sinda magsunod sa tawo nga bukon ninda kilaya, kundì madyagan sinda palayò sa iya kay wayà ninda nakilaya ang iya bosis.”

⁶ Gingtudluan ni Hesus ang mga tawo paagi sa ini nga parabola, pero wayà sinda makaintindi sa mga bagay nga iya ginghambay. ⁷ Nganì naghambay siya liwat sa inda, siling niya, “Sa matuod lang, ako hay pareho sa puwertahan para sa mga karnero. ⁸ Ang tanan nga nauuna sa akon hay mga miyugpangawat kag tulisan. Pero ang akon mga karnero hay wayà nagpamatì sa inda. ⁹ Ako ang puwertahan. Ang abir sin-o nga nagasuyod paagi sa akon hay magkaigwa ning kaluwasan. Bantayan ko gid siya sa iya pagsuyod kag pagluwas, pareho siya sa karnero nga makakakità ning maayo nga sabsabon. ¹⁰ Ang miyugpangawat hay nagakari agud mangawat, mangpatay kag mangsirà. Pero ako hay nagkari agud magkaigwa ang akon mga karnero ning pambihirà nga kaayo-ayo nga kabuhì.

¹¹ “Ako ang maayo nga pastor. Ang maayo nga pastor hay isakripisyo niya abir ang iya kabuhì para sa mga karnero. ¹² Ang ginasuhuyan hay madyagan palayò, kung makità niya nga may nagapalapit nga mapintas nga hayop. Ginabayaan lang niya ang mga karnero kay bukon ini sa iya kag bukon siya ang inda pastor. Nganì ang mapintas nga hayop hay ginapanglahay ang mga karnero para kaunon kag nagakabuyag-buyag ang mga karnero. ¹³ Ang ginasuhuyan hay madyagan palayò kay suhuyan lang siya, nganì wayà ning kabayaka sa mga karnero.

^14,15 “Ako ang maayo nga pastor. Kung pauno ang pagkakilaya ng Amay sa akon kag ang akon pagkakilaya sa iya, pareho da ini ng akon pagkakilaya sa akon mga karnero kag ng inda pagkakilaya sa akon. Kag isakripisyo ko abir ang akon kabuhì para sa mga karnero. ¹⁶ Igwa da ako ning iban nga mga karnero nga wayà sa ini nga kulungan. Kahinangyan day-on ko da sinda pasuyo. Pamatian da ninda ang akon bosis, ang resulta maging isa ka puna sinda kag mabantayan sinda ng isa nga pastor.

¹⁷ “Ang rason nga ginahigugmà ako ng akon Amay, hay tungod isakripisyo ko ang akon kabuhì para pagkatapos buhion ko ini liwat. ¹⁸ Wayà gid ning tawo nga makapatay sa akon kung indì ko gusto isakripisyo ang akon kabuhì. Pero buluntarya ko nga ginatao ang akon kabuhì. Igwa ako ning otoridad nga isakripisyo ang akon sarili nga kabuhì kag igwa da ako ning otoridad nga buhion ko ini liwat; kay imaw ini ang gingsugò ng Amay ko sa akon.”

¹⁹ Tungod sa mga ginghambay ni Hesus wayà nagkaisa ang mga Judio. ²⁰ Madamò sa inda ang naghambay, “Siya hay ginasapian ng malain nga espiritu kag buang; basì kamo mamatì sa iya?”

²¹ Ang iban nagasiling, “Ini nga mga hambay niya hay bukon halin sa ginasapian ng malain nga espiritu. Makakapaayo ba ang malain nga espiritu ng mga mata nga buta?”

²² Pagkatapos adto, nag-abot ang Pista ng Pagdumdom sa Pagbendisyon ng Templo nang una^c sa Jerusalem. Adto hay tiglalamig. ²³ Mintras nagapanaw si Hesus sa templo sa may lugar nga ginatawag ‘Pasilungan ni Solomon’, ²⁴ may pila nga mga Judio ang nagatipon palibot sa iya kag naghambay sinda, “Hasta san-o mo kami padudahon kung sin-o ka gid? Kung ikaw ang Kristo, balitai na kami ning diritso!”

²⁵ Nagsabat si Hesus, “Gingbalitaan ko na kamo, pero wayà kamo nagapati. Ang mga makatitingaya nga ginahuman ko, paagi sa otoridad ng akon Amay hay nagapamatuod kung sin-o ako. ²⁶ Pero wayà kamo nagapati, kay bukon kamo ang akon mga karnero. ²⁷ Ang akon mga karnero hay nagapamatì sa akon bosis, kilaya ko sinda kag ginasunod ninda ako. ²⁸ Taw-an ko sinda ning kabuhì nga wayà katapusan kag indì sinda mamatay.^d Kag wayà gid ning abir sin-o nga makaagaw sa inda sa akon kamot. ²⁹ Ang mga karnero nga gingtao sa akon ng akon Amay ang pinakaimportante kaysa tanan^e, nganì indì gid sinda maaagaw sa mga kamot ng akon Amay. ³⁰ Ako kag ang akon Amay hay isa lang.”

³¹ Pagkabatì adto ng mga Judio, nagpuyot liwat sinda ning mga bato agud buguyon siya. ³² Pero naghambay si Hesus sa inda, “Gingpakità ko sa indo ang madamò nga maayo nga mga ginghuman ko nga gingsugò ng akon Amay. Diin sa mga ini ang kabangdanan nga gusto nindo ako buguyon?”

³³ Nagsabat ang mga Judio, “Bukon sa maayo nga ginghuman mo buguyon ka namon, kundì ginainsulto mo ang Dios, kay ikaw bilang tawo, ginahuman mo ang sarili mo nga Dios!”

³⁴ Nagsabat naman si Hesus, “Dì ba gingsulat sa indo Kasulatan nga gingsiling ng Dios, ‘Ginahambay ko, kamo hay mga dios’?^{f 35} Sayod nindo nga matuod ang Kasulatan kag indì puydi baliwayaon. Nganì kung gingtawag ng Dios ang mga tawo nga nagbaton sa iya mensahe, ‘mga dios’, ³⁶ basì ako nga gingpilì kag gingsugò ng Dios diri sa kalibutan, hay indo ginahambay nga ginainsulto ko ang Dios, kay ginghambay ko nga ako Ongà ng Dios? ³⁷ Kung wayà ko ginahumana ang mga ginasugò sa akon ng Amay ko, ayaw kamo magtuo sa akon. ³⁸ Pero kung ginatuman ko ini, abir indì kamo magtuo sa akon, dapat magpati na lang kamo sa mga makatitingaya nga ginghuman ko. Paagi diri masayuran kag maintindihan gid nindo nga ako kag ang Amay hay nagapakig-isa^g.”

³⁹ Nang inda ini nabatian, gingtinguhà liwat ninda nga dakpon si Hesus pero nakahuyagpos siya sa inda pagdakop.

⁴⁰ Pagkatapos adto, nagkadto liwat si Hesus sa kabuak nga subà ng Jordan kung diin una nga nagpangbawtismo si Juan. Kag didto siya nagtinir. ⁴¹ Madamò nga tawo ang nagakinadto sa iya kag nagahinambay sa isa kag isa, “Abir si Juan, wayà gid nakahuman ning makatitingaya nga bagay, pero matuod gid ang tanan niya nga ginghambay parti sa ini nga tawo.” ⁴² Kag madamò ang nagtuo kay Hesus didto.