^1-2 Igwa ning magmanghod nga taga-Betania^a, sina Marta, Maria kag Lasaro. Si Maria imaw ang magabubò ning pahumot sa siki ng Ginoo sa ulihi kag magapahid ng iya buhok. Niyan nagkasakit si Lasaro, ³ nganì nagsugò sina Maria kag Marta ning tawo kay Hesus kag ginapahambay, “Ginoo, ang imo palanggà nga amigo hay grabi ang sakit.”

⁴ Pagkabatì ni Hesus sa pasayod, hambay niya, “Ini nga sakit indì niya ikamamatay, kundì natabò ini agud madayaw ang Dios kag paagi diri madayaw da ako nga Ongà ng Dios.”

⁵ Palanggà gid ni Hesus ang tuyo nga magmanghod nga sina Marta, Maria kag Lasaro. ⁶ Pero abir nabatian niya nga grabi si Lasaro, nagtinir siya ning duha pa ka adlaw sa lugar kung sa diin siya. ⁷ Pagkatapos naghambay siya sa iya mga disipulo, “Mos, makadto kita liwat sa probinsya ng Judea.”

⁸ Pero naghambay ang iya mga disipulo, “Maistro, dì ba mga pila pa lang ka adlaw ang nagligad gingtinguhà ka nga buguyon ng mga Judio didto? Tapos gusto mo naman nga magkadto liwat!”

⁹ Nagsabat si Hesus paagi sa parabola, “Dì ba, igwa ning 12 ka oras ang isa ka adlaw? Ang abir sin-o nga nagapanaw kung adlaw, indì mapasuyaod kay nakikità niya ang kahayag diri sa kalibutan. ¹⁰ Pero ang abir sin-o nga nagapanaw kung gab-i, mapapasuyaod kay wayà sa iya ang kahayag.”

¹¹ Pagkatapos naghambay pa gid si Hesus, “Ang aton amigo nga si Lasaro hay nagakatuyog lang, nganì makadto ako agud pukawon siya.”

¹² Nagsabat ang iya mga disipulo, “Ginoo, kung nagakatuyog siya, maayo nganì adto agud magaayo gid siya.” ¹³ Ang kalaom ng mga disipulo sa ginghambay ni Hesus hay nagakatuyog lang matuod si Lasaro, pero ang gusto silingon niya, patay na siya.

¹⁴ Nganì gingklaro gid ni Hesus sa inda, “Patay na gida si Lasaro. ¹⁵ Pero nalilipay ako para sa indo, nga wayà ako didto nang namatay siya, agud magtuo kamo sa akon. Mos, makadto na kita sa iya.”

¹⁶ Si Tomas nga may hayò nga ‘Kapid’ naghambay sa iban nga mga disipulo, “Manunot kita agud mamatay kaibahan niya!”

¹⁷ Niyan pag-abot nina Hesus, gingpasayod sa iya nga upat na ka adlaw nga nakalubong sa kuyba nga lubungan ang lawas ni Lasaro. ¹⁸ Ang Betania hay mga tuyo lang ka kilomitro^b sa Jerusalem, ¹⁹ kag madamò nga mga Judio ang nagkadto kana Marta kag Maria, agud magdamay sa pagkamatay ng inda manghod.

²⁰ Pagkabatì ni Marta nga paabuton si Hesus, nagpanaw siya agud sugaton si Hesus, pero nagpabilin si Maria sa suyod ng bayay nga nagapungkò. ²¹ Pagkakità ni Marta kay Hesus, naghambay siya, “Ginoo, kung yari ka lang, wayà kuntà namatay ang manghod ko! ²² Pero sayod ko nga bisan arinyan, itatao sa imo ng Dios ang abir ano nga pangayuon mo sa iya.”

²³ Naghambay si Hesus, “Mabubuhì liwat ang imo manghod.”

²⁴ Nagsiling naman si Marta, “Sayod ko nga mabubuhì siya liwat sa ulihi nga adlaw, pagbuhion liwat ang tanan nga mga patay.”

²⁵ Tapos naghambay si Hesus, “Ako ang nagabuhì sa mga patay kag nagatao ning kabuhì. Ang nagatuo sa akon abir siya mamatay, mabubuhì liwat. ²⁶ Ang bisan sin-o nga may kabuhì abir san-o kag nagatuo sa akon hay indì gid makabaton ning parusa nga wayà katapusan. Nagapati ka ba diri?”

²⁷ Nagsabat si Marta, “Huo, Ginoo. Nagapati gid ako nga ikaw ang Kristo, ang Ongà ng Dios nga nagkari diri sa kalibutan.”

²⁸ Pagkahambay adto ni Marta, nagbalik siya sa inda bayay agud tawagon si Maria. Ginghutikan niya, “Yari ang Maistro kag ginapatawag ka.” ²⁹ Nang nabatian niya ini, nagtindog siya nga daan kag nagkadto kay Hesus.

³⁰ Wayà pa makasuyod si Hesus sa baryo ng Betania, yadto pa siya sa lugar nga gingsumpungan ninda ni Marta. ³¹ Pagkakità ng mga Judio nga yadto sa suyod ng bayay nga nagadamay kay Maria nga siya nagtindog nga daan kag nagluwas, nagsunod sinda sa iya. Ang kalaom ninda makadto siya sa kuyba nga lubungan agud didto magtangis.

³² Niyan pag-abot ni Maria sa lugar kung diin si Hesus, nagluhod siya sa atubangan ng siki niya kag naghambay, “Ginoo, kung yari ka lang, wayà kuntà namatay ang akon manghod!”

³³ Nang makità ni Hesus nga nagatangis siya kag imaw da ang mga kaibahan niya, nabug-atan gid ang iya tagipusuon kag nalisod gid siya. ³⁴ Nganì nagpangutana si Hesus, “Sa diin nindo ginglubong ang lawas ni Lasaro?”

Nagsabat sinda, “Ginoo, kari agud makità mo.”

³⁵ Nagtangis si Hesus. ³⁶ Nganì naghambay ang mga Judio sa isa kag isa, “Tan-awa, subra gid ang iya pagpalanggà kay Lasaro!”

³⁷ Pero ang iban naghambay, “Dì ba napaayo niya adtong mga mata ng buta? Basì wayà niya napigahi ang pagkamatay ni Lasaro?”

³⁸ Mintras nagapalapit si Hesus sa lubungan, nabug-atan gid liwat ang iya tagipusuon.

Ini hay kuyba kag nasarhan ning kabahoy nga bato. ³⁹ Nganì gingsugò ni Hesus ang mga tawo didto, “Paligira nindo ang sara nga bato.”

Hambay ni Marta nga maguyang ng namatay, “Ginoo, mabaho na inà kay upat na ka adlaw nga nalubong.”

⁴⁰ Nagasabat si Hesus, “Dì ba ginghambay ko sa imo nga kung magpati ka, makikità mo ang gahom ng Dios?” ⁴¹ Nganì gingpaligid ninda ang bato. Naghangad si Hesus sa langit kag nagpangamuyò, “Amay nakon sa langit, nagapasalamat ako kay ginapamatian mo ako. ⁴² Kag sayod ko nga permi ka nagapamatì sa akon. Pero ginahambay ko ini para sa mga tawo nga nagatindog diri agud magpati sinda nga ikaw ang nagsugò sa akon.”

⁴³ Pagkahambay niya ini, nagsinggit siya, “Lasaro, luwas dirà!” ⁴⁴ Nagluwas ang namatay! Nasasamburan pa ning mahabà nga tela ang iya mga kamot kag siki. Kag ang iya uyo hay napuputos pa ning tela. Hambay ni Hesus sa inda, “Hubara nindo ang tela, agud makapanaw siya.”

⁴⁵ Madamò ang mga Judio nga nagbisita kay Maria kag nakakità ng ginghuman ni Hesus, nganì nagtuo sinda sa iya. ⁴⁶ Pero ang iban sa inda hay nagkadto sa mga Pinunò ng Relihiyon nga matutom sa Kasuguan^c, kag gingbalità sa inda ang ginghuman ni Hesus parti kay Lasaro. ⁴⁷ Nganì nagtipon-tipon ang mga pinunò nga parì ng mga Judio kag ang mga Pinunò ng Relihiyon nga matutom sa Kasuguan sa Kurti ng mg Judio^d kag naghambay sinda, “Ano ang dapat naton nga humanon? Kay naghuman ning madamò nga makatitingaya nga bagay ini nga tawo! ⁴⁸ Kung pabay-an lang naton siya nga humanon ini, magapati ang tanan sa iya. Kung tiyad ini, isipon ng gobyerno ng Roma nga nagarebeldi kita kuntra sa inda. Tapos, girahon kita diri kag gubaon ang aton nasyon kag ang aton templo.”

⁴⁹ Pero isa sa inda, ang pangayan hay Kaipas nga Pinakapunò ng mga Parì adto nga tuig, naghambay, “Ay, kamo! Wayà gid kamo kasayod kung ano ang indo ginapanghahambay! ⁵⁰ Wayà ba nindo naiisip nga mas maayo sa aton nga isa lang ang mamatay para sa mga tawo, kaysa masirà ang bilog nga nasyon?” ⁵¹ Gingsiling niya ini bukon halin sa iya sarili nga hunahunà, kundì bilang Pinakapunò ng mga Parì adto nga tuig, gingpasayod ng Dios paagi sa iya nga kahinangyan mamatay si Hesus para sa nasyon ng Judio; ⁵² kag bukon lang para sa inda nasyon kundì para sa tanan nga magiging ongà ng Dios nga nagaistar sa iba-iba nga mga nasyon, agud magiging isa sinda tanan.

⁵³ Magtunà adto, nagaplano ang mga pinunò ng Judio kung pauno patyon si Hesus. ⁵⁴ Nganì wayà na si Hesus nagapanaw ning lantaran sa Judea, kundì naghalin siya didto kag nagkadto sa baryo malapit sa malangkag nga lugar, nga sakop ng siyudad nga ginatawag ‘Epraim’. Kag didto siya nagtinir kaibahan ang iya mga disipulo.

⁵⁵ Niyan malapit na adto ang Pista ng Pagligad ng Anghel^e. Nganì madamò nga mga Judio halin sa iba-iba nga mga probinsya ang nagtukad pakadto sa Jerusalem, agud bago mag-abot ang Pista, malimpyo na ninda ang inda kaugalingon sa templo sunò sa layi ng inda relihiyon. ⁵⁶ Ginapinangità ng mga tawo si Hesus mintras nagatindog sinda sa templo kag nagpingangutan-an sinda sa isa kag isa, “Ano sa imo hunahunà? Makari ba arà siya ini nga Pista?” ⁵⁷ Ginahambay ninda ini kay nagsugò ang mga pinunò nga parì ng mga Judio kag ang mga Pinunò ng Relihiyon nga matutom sa Kasuguan nga kung sin-o man ang makasayod kung diin si Hesus, dapat ipasayod sa inda agud maaristo ninda siya.