¹ Niyan bisperas na ng Pista ng Pagligad ng Anghel^a. Sayod ni Hesus nga nag-abot na ang oras ng iya paghalin diri sa kalibutan kag mabalik na siya sa Dios nga iya Amay. Palanggà gid niya ang iya mga disipulo diri sa kalibutan kag niyan, gusto niya nga ipakità kung mauno kadakò ang iya pagpalanggà sa inda.

² Nang adto nga gab-i, nagaihapon si Hesus kag ang iya mga disipulo. Gingbutang na ng Diyablo^b sa isip ni Judas nga ongà ni Simon Iscariote nga dapat niya traiduron si Hesus. ³ Pero sayod ni Hesus nga gingtao na ng Amay nga Dios ang tanan nga otoridad sa iya kag sayod da niya nga halin siya sa Dios kag magabalik da siya sa Dios.

⁴ Nganì, mintras nagakaon pa sinda, nagtindog si Hesus kag ging-uba niya ang iya pang-ibabaw nga barò. Tapos gingbuoy niya ang tualya kag gingbugkos ini sa iya hawak. ⁵ Pagkatapos nagbubò siya ning tubì sa planggana kag gingtunaan niya nga hugasan ang mga siki ng iya mga disipulo kag iya ini gingpunasan ng tualya nga nakabugkos sa iya hawak.

⁶ Paglapit niya kay Simon Pedro, naghambay si Pedro,^c “Ginoo, basì? Bukon dapat ikaw ang maghugas ng akon mga siki!”

⁷ Nagsabat si Hesus, “Ang akon ginahuman niyan hay indì mo pa maintindihan, pero sa ulihi maiintindihan mo da ini.”

⁸ Naghambay si Pedro, “Ayaw! Indì gid puydi nga ikaw ang maghugas ng akon mga siki!”

Nagsabat si Hesus, “Kung indì ka magpahugas sa akon, wayà ka ning relasyon sa akon.”

⁹ Nagsabat naman si Simon Pedro, “Ginoo, kung tiyad inà, bukon lang ang akon mga siki ang imo hugasan kundì patì ang akon mga kamot kag uyo.”

¹⁰ Pero naghambay si Hesus, “Ang tawo nga nakapaligos hay limpyo na ang iya bilog nga lawas kag indì na kahinangyan nga hugasan pa, puyra lang sa iya mga siki. Malimpyo na kamo pero bukon tanan sa indo.” ¹¹ Kay sayod niya kung sin-o ang magatraidor sa iya, nganì ginghambay niya, ‘Bukon tanan sa indo hay malimpyo.’

¹² Pagkatapos niya mahugasan ang inda mga siki, gingsuksok niya liwat ang iya barò nga pang-ibabaw kag nagbalik para kumaon. Nagpangutana siya, “Naintindihan ba nindo kung basì ginghuman ko ini sa indo? ¹³ Ginatawag nindo ako nga Maistro kag Ginoo; kag tamà kamo kay ako gida ang Maistro kag Ginoo. ¹⁴ Abir nganì ako nga indo Ginoo kag Maistro hay naghugas ng indo mga siki, nganì dapat da nga maghinugasan kamo ng indo mga siki sa isa kag isa. ¹⁵ Gingtaw-an ko kamo ning halimbawà agud indo patuyaran ang akon ginghuman sa indo. ¹⁶ Sa matuod lang, wayà ning ulipon nga mas mataas pa sa iya amo kag wayà ning gingsugò nga mas importante pa sa nagsugò sa iya. ¹⁷ Niyan nga naintindihan na nindo ini nga mga bagay, pakamaayuhon gid kamo kung humanon nindo ini.”

¹⁸ Hambay pa ni Hesus, “Ang akon ginahambay hay bukon para sa indo tanan, kay kilaya ko gid ang kada isa sa indo nga akon gingpilì. Pero dapat matabò ang nakasulat sa Kasulatan, ‘Ang tawo nga kaibahan ko nga nagakaon imaw ang magatraidor sa akon.’^{d 19} Tunà niyan, ginahambay ko ini sa indo bago matabò agud kung matabò na ini, magatuo kamo nga ako ang Dios.^{e 20} Sa matuod lang, ang abir sin-o nga nagabaton sa mga tawo nga suguon ko hay nagabaton sa akon kag ang bisan sin-o nga nagabaton sa akon hay nagabaton da sa nagsugò sa akon.”

²¹ Pagkahambay ini ni Hesus, ang iya tagipusuon hay tudo ang kalisod, nganì gingluwas niya ang iya nababatyagan sa inda, “Sa matuod lang, isa sa indo ang magatraidor sa akon.”

²² Ang mga disipulo hay nagsiniruan sa isa kag isa, kay wayà sinda makasayod kung sin-o sa inda ang ginahambay ni Hesus. ²³ Isa sa mga disipulo nga pinalanggà gid niya ang nagapungkò hampig sa iya alihid. ²⁴ Nganì gingsinyasan siya ni Simon Pedro nga pangutan-on si Hesus kung sin-o sa inda ang iya ginahambay.

²⁵ Nganì nag-islog pa gid siya kay Hesus, naghilig sa iya dughan kag nagpangutana, “Ginoo, sin-o adto?”

²⁶ Nagsabat si Hesus, “Kung sin-o ang taw-an ko ning tinapay nga akon isaw-saw, siya ang magatraidor sa akon.” Nganì gingsaw-saw niya ang tinapay kag gingtao kay Judas nga ongà ni Simon Iscariote. ²⁷ Pagkabaton niya ng tinapay, nagsuyod si Satanas sa iya.

Nganì naghambay si Hesus kay Judas, “Himua na nga daan ang imo gusto nga humanon.” ²⁸ Didto sa mga nagaihapon, wayà gid ning may nakasayod kung basì ginghambay adto ni Hesus kay Judas. ²⁹ Ang kalaom ng iban gingsugò lang ni Hesus si Judas para magbakay ng inda mga kahinangyanon sa pista, o magtao ning abir ano sa mga pubre kay siya ang miyughawid ng inda butangan ning kuwarta. ³⁰ Nganì pagkakaon ni Judas ng tinapay, nagluwas siya nga daan. Adto hay gab-i na.

³¹ Pagkahalin ni Judas, naghambay si Hesus, “Niyan mapapadunggan na ako nga Ongà ng Tawo kag mapapadunggan da ang Dios paagi sa matatabò sa akon. ³² Kung mapadunggan ang Dios paagi sa akon, padunggan da niya ako didto sa langit kag ini hay humanon niya nga daan.

³³ “Mga pinalanggà ko, matag-od na lang gid ang oras nga makaibahan nindo ako. Pangitaon nindo ako, pero pareho ng akon ginghambay sa mga Judio kag niyan ginahambay ko da sa indo, ‘Indì kamo makakadto sa akon kadtuan.’ ³⁴ Nganì ginatao ko sa indo ini nga bag-o nga sugò: maghigugmaanan kamo sa isa kag isa. Kung pauno ginghigugmà ko kamo, dapat da maghigugmaanan kamo sa isa kag isa. ³⁵ Masasayuran ng tanan nga kamo ang akon mga disipulo, kung magahigugmaanan kamo sa isa kag isa.”

³⁶ Pagkatapos nagpangutana si Simon Pedro kay Hesus, “Ginoo, sa diin ka ba makadto?”

Nagsabat si Hesus, “Indì ka niyan makakadto sa akon kadtuan, pero sa ulihi makakasunod ka da.”

³⁷ Nagpangutana liwat si Pedro, “Ginoo, basì indì ako makanunot sa imo niyan? Isakripisyo ko ang akon kabuhì para sa imo, abir mamatay pa ako.”

³⁸ Pero nagpangutana si Hesus, “Isakripsyo mo ang imo kabuhì para sa akon, abir mamatay ka pa? Sa matuod lang, bago magtuktuyaok ang suyog, tuyo ka beses maghambay ka nga wayà ka nakakilaya sa akon.”