¹ Niyan unom na lang ka adlaw kag Pista na ng Pagligad ng Anghel^a. Nagkadto sina Hesus sa Betania, kung sa diin nagaistar si Lasaro nga iya gingbuhì liwat. ² Didto nagpreparar sina Marta ning ihapon ning dakò para mapadungan si Hesus. Si Lasaro hay nagakaon kaibahan si Hesus kag si Marta ang nagatahaw. ³ Mintras nagakaon sinda, si Maria hay nagbuoy naman ning bali tungà sa litro nga kamahay kag maayo nga klasi nga pahumot. Ini nga pahumot halin sa mahumot nga tanom nga ginatawag ‘nardo’. Gingbubò niya ini sa mga siki ni Hesus kag gingpahid ng iya buhok. Kag napunò ning kahumot ang suyod ng bayay.

⁴ Pero si Judas Iscariote, isa sa mga disipulo ni Hesus, (nga sa ulihi imaw ang magatraidor sa iya) hay naghambay, ⁵ “Ang kantidad adto nga pahumot hay bali isa ka tuig nga suweldo ng isa ka tawo^b, basì wayà adto pagbaligyaan kag itao ang kuwarta sa mga pubre?” ⁶ Ginghambay niya ini, bukon kay nagakabayaka siya sa mga pubre, kundì siya hay miyugpangawat kay siya ang miyughawid ng inda butangan ning kuwarta kag permi siya diri nagakupit.

⁷ Niyan naghambay si Hesus, “Pabay-i lang siya, gingtagò niya inà para ipreparar ang akon lawas sa adlaw ng akon paglubong. ⁸ Ang mga pubre yarà lang kag puydi nindo mabuligan abir ano nga oras, pero ako indì nindo permi makaibahan.”

⁹ Pagkasayod ng madamò nga mga Judio nga yadto si Hesus sa Betania, nagkadto sinda bukon lang para makità si Hesus, kundì gusto da ninda makità si Lasaro nga iya gingbuhì liwat. ¹⁰ Nganì ang mga pinunò nga parì ng mga Judio hay nagplano nga patì si Lasaro hay patyon da, ¹¹ kay siya ang naging kabangdanan kung basì ang madamò nga mga Judio hay nagbuyag sa inda grupo kag nagtuo kay Hesus.

¹² Nang masunod nga adlaw, kadamo-damò nga mga tawo nga nagapamista ang nakabatì nga si Hesus paabuton sa Jerusalem. ¹³ Nganì nagbuoy sinda ning mga dahon ng palma agud sugaton siya, nga nagasinggit,

¹⁴ May nakità si Hesus nga batà nga asno kag iya ini gingsakyan. Sa iya ginghuman, natabò ang nakasulat sa Kasulatan nga nagahambay,

¹⁷ Niyan ang madamò nga Judio nga kaibahan ni Hesus nang gingtawag niya si Lasaro sa lubungan nga kuyba, kag gingbuhì niya liwat hay nagapamatuod sa natabò. ¹⁸ Nganì kadamo-damò nga mga tawo ang nagsugat kay Hesus kay nabalitaan ninda adto nga makatitingaya nga iya ginghuman. ¹⁹ Nganì ang mga Pinunò ng Relihiyon nga matutom sa Kasuguan^g hay naghambay sa isa kag isa, “Tan-awa nindo! Ang tanan nga mga tawo hay nagasunod na gid sa iya. Wayà na gid kita ning abir ano pa nga mahuhuman!”

²⁰ Niyan igwa ning pila nga mga Griego nga kaibahan sa mga nagtukad sa Jerusalem agud magsamba sa Dios sa Pista. ²¹ Nagpalapit sinda kay Felipe nga taga-Betsaida nga sakop sa probinsya ng Galilea kag naghambay sa iya, “Nong, nagahandom kuntà kami nga mapakigkità kay Hesus.” ²² Nagkadto si Felipe kag gingbalità ini kay Andres. Tapos nagkadto sinda nga duha kag ginghambay ini kay Hesus.

²³ Nagsabat si Hesus, “Nag-abot na ang tamà nga oras nga ako nga Ongà ng Tawo hay madadayaw, tungod sa akon pagkamatay. ²⁴ Sa matuod lang, ang akon kabuhì hay pareho sa binhì nga humay. Kung indì ini ipugas sa dutà, indì ini magtubò; magapabilin ini nga isa lang ka binhì. Pero kung ini nga binhì ipugas, daw pareho ng ilubong kag mamatay, ini hay magatubò kag magauhay ning madamò. ²⁵ Ang abir sin-o nga mas nagapalabi ng iya kabuhì hay maduyaan ini; pero ang bisan sin-o nga wayà nagapalabi ng iya kabuhì diri sa kalibutan tungod sa akon, imaw ang makabaton ning kabuhì nga wayà katapusan. ²⁶ Ang abir sin-o nga nagaserbisyo sa akon hay kahinangyan nga magsunod sa akon, kag kung diin ako, yadto da ang akon kabulig. Ang bisan sin-o nga nagaserbisyo sa akon hay padunggan ng akon Amay.”

²⁷ Naghambay pa gid si Hesus, “Ang akon tagipusuon hay tudo ang kalisod! Amay nakon sa langit, ano ang akon ipangamuyò? Puydi ba luwason mo ako sa kahugaan? Pero indì puydi kay imaw ini ang kabangdanan ng akon pagkari diri sa kalibutan nga magtiis ng mga kasakit sa ini nga oras.” ²⁸ Tapos naghambay si Hesus, “Amay nakon sa langit, ipakità mo sa mga tawo kung mauno kaayo ang imo himayà!”

Pagkatapos may bosis nga naghambay halin sa langit, “Gingpakità ko na ang akon himayà paagi sa imo kag ipakità ko pa gid liwat.” ²⁹ Nang nabatian ang bosis ng madamò nga mga tawo nga nagatindog didto, ang kalaom ng iban hay dayugdog, pero ang iban naghambay, “May anghel nga naghambay sa iya.”

³⁰ Pero nagsabat si Hesus, “Gingpabati sa indo ng Dios ang bosis, bukon para sa akon kundì para sa indo. ³¹ Imaw na ini ang oras nga husgahan ang mga tawo nga wayà relasyon sa akon kag oras na da nga si Satanas, ang nagagahom sa kalibutan^h hay maperdi. ³² Kag pag itaas ako halin sa kalibutan, papalapiton ko ang madamò nga tawo nga magsunod sa akon.” ³³ (Sa iya paghambay adto, gingpasayod niya kung ano nga klasi nga kamatayon ang iya pagaagihan.)

³⁴ Nganì nagsabat ang mga tawo, “Sayod namon nga sunò sa Kasuguan, ang Kristo hay magakabuhì abir san-o. Pauno mo mahambay nga ang Ongà ng Tawo hay kahinangyan mamatay sa kahoy?” Nagpangutana pa gid sinda, “Sin-o gid ba ini nga Ongà ng Tawo?”

³⁵ Nganì nagsabat si Hesus liwat, “Madalì na lang maduyà ang iwag nga kaibahan nindo. Nganì magpadayon kamo nga magkabuhì kaibahan ng iwag mintras yari pa, kay basì kung maabutan kamo ning duyom. Kay ang nagapanaw sa maduyom hay wayà makasayod kung diin pakadto. ³⁶ Mintras kaibahan nindo ako, nga imaw ang iwag, magpati kamo sa akon agud magkabuhì kamo ning matarongⁱ.”

Pagkatapos ni Hesus mahambay adto, nagpanaw siya kag nagpanagò sa mga tawo. ³⁷ Abir nakità na ninda ang madamò nga makatitingaya nga bagay nga gingpanghuman ni Hesus, pero wayà gihapon sinda nagtuo sa iya. ³⁸ Natabò ini agud matuman ang gingsulat nang una ni Isaias, nga miyubalità ng mensahe ng Dios,

⁴¹ Ginghambay ini ni Isaias nang una, kay nakità niya ang himayà ni Hesus kag nagsulat siya parti sa iya.

⁴² Maskin tiyad adto ang ginghambay ni Isaias, madamò sa mga pinunò ng Judio ang nagtuo kay Hesus. Pero wayà ninda ini ginabalità sa iban, kay nahadlok sinda sa mga Pinunò ng Relihiyon, basì kung sinda hay indì na ibilang nga miyembro sa sinagoga. ⁴³ Kay mas ginapalabi pa ninda ang pagdayaw ng mga tawo kaysa pagdayaw ng Dios.

⁴⁴ Pagkatapos naghambay ning makusog si Hesus sa madamò nga tawo, “Ang bisan sin-o nga nagatuo sa akon, bukon lang ako ang ginatuuhan, kundì patì ang nagsugò sa akon. ⁴⁵ Ang abir sin-o nga nakakità sa akon, nakakità da sa nagsugò sa akon. ⁴⁶ Nagkari ako bilang iwag sa mga tawo diri sa kalibutan, agud ang abir sin-o ang magtuo sa akon, indì magpadayon sa pagkabuhì sa kaduyom.

⁴⁷ “Ang bisan sin-o nga nagapamatì ng akon mga ginahambay pero wayà nagatuman, bukon ako ang magahusga sa iya. Kay wayà ako nagkari sa kalibutan para husgahan ang mga tawo, kundì agud sinda luwason. ⁴⁸ Pero may magahusga sa abir sin-o nga wayà nagabaton sa akon kag wayà nagapati sa akon mga ginahambay. Ang akon mismo hambay nga ginatudlò, imaw ang magahusga sa iya sa ulihi nga adlaw! ⁴⁹ Kay ang akon ginatudlò hay bukon halin sa sarili ko nga otoridad, kundì ang Amay ko nga nagpadaya sa akon, imaw ang nagsugò kung ano ang akon dapat nga ihambay kag itudlò. ⁵⁰ Nganì ginahambay ko lang kung ano ang gingsugò ng akon Amay sa akon, kay sayod ko gid nga ang iya ginasugò hay imaw ang ginahalinan ng kabuhì nga wayà katapusan.”