¹ Pagkahambay adto ni Hesus, naghangad siya kag naghambay, “Amay nakon sa langit, nag-abot na ang oras. Padunggi ako nga imo Ongà agud padunggan ko da ikaw. ² Kay gingtaw-an mo ako ning otoridad para magdumaya sa tanan nga tawo, agud taw-an ko ning kabuhì nga wayà katapusan ang tanan nga tawo nga gingtao mo sa akon. ³ Imaw ini ang paagi para magkaigwa ning kabuhì nga wayà katapusan: igwa sinda ning relasyon sa imo nga imaw lang ang matuod nga Dios kag sa akon^a nga imo gingsugò. ⁴ Gingpadunggan ko ikaw sa mga tawo diri sa kalibutan paagi sa pagtapos ng gingpahuman mo sa akon. ⁵ Nganì niyan, Amay nakon sa langit, pag kaibahan ta na ikaw, itao sa akon ang himayà^b nga igwa ako nang kaibahan ko ikaw bago pa nahuman ang kalibutan.

⁶ “Gingpakilaya ko ikaw sa mga tawo nga ginglain mo sa kalibutan kag gingtao mo sa akon. Dati imo sinda kag gingsalig mo sinda sa akon. Kag ginatuman ninda ang imo gingpanudlò. ⁷ Niyan sayod ninda nga ang tanan nga imo gingsalig sa akon hay halin sa imo. ⁸ Kay gingtudlò ko sa inda ang ginghambay mo sa akon kag gingbaton ninda ini. Nganì sayod gid ninda nga ako hay naghalin sa imo kag gingpatihan ninda nga ikaw ang nagsugò sa akon.

⁹ “Amay nakon, nagapangamuyò ako para sa ini nga mga disipulo ko, bukon para sa mga tawo nga wayà relasyon sa akon, kundì para sa mga tawo nga gingsalig mo sa akon kay imo sinda. ¹⁰ Ang tanan nga tawo nga may relasyon sa akon hay sa imo kag ang tanan sa imo hay sa akon. Kag ako hay ginapadunggan tungod sa inda. ¹¹ Niyan mahalin na ako diri sa kalibutan kag mabalik na ako sa imo, pero mabilin pa sinda sa kalibutan. Akon Amay nga Banal, bantayi sinda paagi sa imo gahom^c nga gingtao mo sa akon, agud magakaisa sinda pareho naton nga nagakaisa. ¹² Mintras kaibahan nakon sinda, gingbantayan ko gid sinda paagi sa imo gahom nga gingtao mo sa akon. Gingbantayan ko gid sinda, nganì abir isa sa inda wayà ning may namatay, puyra lang sa tawo nga ang destinasyon hay sa impyerno, agud matabò ang nakasulat sa Kasulatan.

¹³ “Niyan mabalik na ako sa imo. Ini nga mga bagay hay akon ginapangamuyò mintras yari pa ako sa kalibutan, agud magkaigwa sinda ning kalipay nga halin sa akon, kag makumplito ini nga kalipay sa inda.

¹⁴ “Ginghambay ko na sa inda ang imo mensahe, nganì nahangit sa inda ang mga tawo nga wayà relasyon sa imo. Kay wayà na sinda nagapasakop sa ini nga kalibutan, pareho ko da nga wayà nagapasakop sa kalibutan. ¹⁵ Wayà ko ginapangamuyua nga buy-on mo na sinda diri sa kalibutan, kundì protiksyunan mo sinda kuntra kay Satanas. ¹⁶ Wayà na sinda nagapasakop sa ini nga kalibutan, pareho ko da nga wayà nagapasakop sa kalibutan. ¹⁷ Ilain mo sinda para sa pagserbisyo sa imo paagi sa pagtudlò ng kamatuuran. Ang imo hambay imaw ang kamatuuran. ¹⁸ Kung pauno gingsugò mo ako diri sa mga tawo sa kalibutan para humanon ang imo kabubut-on, ginasugò ko da sinda diri sa kalibutan. ¹⁹ Ginalain ko ang akon sarili para sa pagserbisyo sa imo, agud mailain da ninda ang inda sarili paagi sa pagtudlò ng kamatuuran.

²⁰ “Bukon lang ang akon mga disipulo ang akon ginapangamuyò, kundì ang tanan da nga magatuo sa akon paagi sa inda pamatuod. ²¹ Amay nakon sa langit, ang akon pangamuyò sa imo nga kabay pa sinda tanan hay magakaisa. Kung pauno nga ikaw nagapakig-isa sa akon kag ako sa imo, kabay pa imaw da sinda hay magapakig-isa sa aton, agud magpati ang mga tawo nga wayà relasyon sa imo nga ikaw ang nagsugò sa akon. ²² Ginatao ko sa inda ang padungog nga imo gingtao sa akon, agud magakaisa gid sinda pareho naton nga nagakaisa. ²³ Ang gusto silingon, nagapakig-isa ako sa inda kag ikaw sa akon, agud maging isa gid sinda. Paagi diri masasayuran ng mga tawo nga wayà relasyon sa imo nga ikaw ang nagsugò sa akon kag ginahigugmà mo ang mga nagatuo sa akon pareho ng paghigugmà mo sa akon.

²⁴ “Amay nakon sa langit, gusto ko gid makaibahan didto mismo sa langit ini nga mga tawo nga gingtao mo sa akon, agud makità da ninda ang himayà. Gingtao mo ini nga himayà sa akon kay gingpalanggà mo ako bago nahuman ang kalibutan.

²⁵ “Amay nga matarong, wayà ka nakilaya ng mga tawo nga wayà relasyon sa imo. Pero kilaya ko gid ikaw kag sayod ng mga tawo nga magatuo sa akon nga ikaw ang nagsugò sa akon. ²⁶ Gingpakilaya ko ikaw^d sa inda kag ipakilaya pa gid, para ang imo paghigugmà sa akon hay mabatyagan da ninda, agud ako hay permi ninda kaibahan.”