¹ Pagkatapos pangamuyò ni Hesus, nagpanaw siya kaibahan ang iya mga disipulo kag nagtabok sinda sa kabuak ng sapà ng Kidron. Didto sinda nagkadto sa lugar nga may mga tanom nga kahoy nga olibo.

² Niyan si Judas nga imaw ang magatraidor sa iya hay kabisado da adto nga lugar kay permi didto nagatipon si Hesus kag ang iya mga disipulo. ³ Nganì nagkadto didto si Judas kaibahan ang madamò nga sundalo kag ang mga guwardya ng templo, nga gingsugò ng mga pinunò nga parì ng mga Judio kag ng mga Pinunò ng Relihiyon nga matutom sa Kasuguan^a. Igwa sinda ning daya nga mga muron, baybag kag armas.

⁴ Sayod ni Hesus ang tanan nga matatabò sa iya, nganì gingsumpong niya nga daan adto nga mga tawo kag gingpangutana, “Sin-o ang indo ginapangità?”

⁵ Nagsabat sinda, “Si Hesus nga taga-Nazaret.”

Nagsabat naman siya, “Ako si Hesus.”

Yadto da si Judas nga nagatraidor sa iya nga nagatindog kaibahan ninda. ⁶ Pagkasiling niya nga ‘Ako si Hesus’, napaatras sinda tanan kag nagkatumba sa dutà.

⁷ Nganì gingpangutana sinda liwat ni Hesus, “Sin-o gid ba ang ginapangità nindo?”

Nagsabat sinda, “Si Hesus nga taga-Nazaret.”

⁸ Nagsiling si Hesus, “Ginghambay ko na nganì sa indo nga ako si Hesus. Niyan kung ako ang indo ginapangità, pabay-i lang nga makahalin ining akon mga kaibahan.” ⁹ Imaw ini ang iya ginghambay agud matabò ang iya gingsiling dati sa Dios, ‘Indì ko gid pabay-an ang mga gingtao mo sa akon, para wayà ning may maduyà abir isa.’

¹⁰ Niyan, si Simon Pedro^b hay may daya nga maisot nga sundang. Ginggabot niya ini kag ginglabò ang tuo nga talinga ng ulipon ng Pinakapunò ng mga Parì kag nautod ini. Ang pangayan ng ulipon hay si Malkos. ¹¹ Nagsiling si Hesus kay Pedro, “Balikan sa tagob ang imo sundang! Sayod mo nga dapat ko antuson ang kasakit nga gingtao ng akon Amay sa akon.”

¹² Pagkatapos, gingdakop kag ginggapos si Hesus ng mga sundalo nga ginapamunuan ng inda kapitan, kaibahan ang mga guwardya ng templo nga gingsugò ng mga Judio. ¹³ Gingdaya anay siya kay Anas nga panugangan ni Kaipas nga imaw ang Pinakapunò ng mga parì adto nga tuig. ¹⁴ (Si Kaipas imaw ang naglaygay dati sa mga Judio, ‘Mas maayo nga isa lang ang mamatay para sa mga tawo.’)

¹⁵ Niyan si Simon Pedro kag ang isa pa nga disipulo hay nagsunod kana Hesus. Ini nga disipulo hay kilaya ng Pinakapunò ng mga parì, nganì nakasuyod siya sa dya-ag ng bayay ng Pinakapunò ng mga parì, kaibahan nina Hesus. ¹⁶ Pero si Pedro hay nabilin nga nagatindog sa luwas ng puwertahan. Nganì nagbalik adtong iya kaibahan nga disipulo kag nagpamuhon sa babayi nga miyugbantay ng puwertahan, tapos gingpasuyod niya si Pedro. ¹⁷ Gingpangutana ng babayi si Pedro, “Dì ba disipulo ka da ng inà nga tawo?”

Nagsabat si Pedro, “Bukon.”

¹⁸ Tiglalamig adto, nganì may gingpabaga nga uling. Nagatindog ang mga ulipon kag ang mga guwardya ng templo palibot para magpainit-init. Si Pedro hay nagpalapit da kaibahan ninda nga nagatindog kag nagapadangga da.

¹⁹ Niyan gingpangutana si Hesus ng Pinakapunò ng mga parì parti sa iya mga disipulo kag sa iya ginatudlò. ²⁰ Nagsabat si Hesus, “Permi ako nagahambay sa atubangan ng tanan, kay nagatudlò ako sa sinagoga kag sa templo kung sa diin nagatipon-tipon da ang tanan nga mga Judio. Kag wayà ako ning may ginahambay nga pasekrito. ²¹ Basì ginapangutana mo ako? Pangutan-a ang mga nakabatì sa akon kay sayod ninda kung ano ang akon ginghambay.”

²² Pagkasiling adto ni Hesus, tinampa siya ng isa sa mga guwardya ng templo nga nagatindog malapit sa iya kag ginghambayan siya, “Basì sin-o ka! Basì tiyad ka kung magsabat sa Pinakapunò ng mga parì?”

²³ Nagsabat si Hesus, “Kung salà ang akon gingsiling, ihambay mo kung diin didto! Pero kung tamà ang akon ginghambay, basì gingtampa mo ako?”

²⁴ Pagkatapos adto, gingpadaya ni Anas si Hesus nga nakagapos gihapon kay Kaipas nga Pinakapunò ng mga parì.

²⁵ Mintras nagatindog gihapon didto si Simon Pedro kag nagapainit-init, may nagpangutana sa iya, “Dì ba disipulo ka da ng inà nga tawo?”

Nagpinusong liwat si Pedro, “Bukon!”

²⁶ Niyan gingpangutana naman si Pedro ng isa sa mga ulipon ng Pinakapunò ng mga parì nga hali ng tawo nga ang talinga ging-utod niya, “Dì ba, ikaw adtong nakità ko nga kaibahan niya didto sa lugar nga may mga tanom nga kahoy nga olibo?”

²⁷ Pero nagpinusong na naman si Pedro, “Bukon!” Kag adto da nga daan nagtuktuyaok ang suyog.

²⁸ Pagkaimbestigar kay Hesus sa bayay ni Kaipas, gingdaya siya ng mga pinunò ng Judio sa palasyo ng gobernador. Adto hay bago magsubat ang adlaw. Wayà sinda magsuyod sa palasyo, kay sunò sa inda mga layi, kung magsuyod sinda sa bayay ng bukon Judio, indì na sinda pagtugutan nga magkaon ng ihapon nga para sa Pista ng Pagligad ng Anghel^c. ²⁹ Nganì nagluwas si Pilato sa iya palasyo, kag iya sinda gingpangutana, “Ano ang akusasyon nindo kuntra sa ini nga tawo?”

³⁰ Nagsabat sinda, “Kung wayà siya ning ginghuman nga malain, wayà namon siya pagday-a diri sa imo.”

³¹ Nagsiling si Pilato, “Day-a nindo siya kag husgahan sunò sa indo Kasuguan.”

Nagsabat ang mga Judio, “Pero wayà kami ning otoridad nga magsintinsya ning kamatayon abir kanin-o.” ³² Natabò ini agud matuman ang ginghambay ni Hesus kung pauno siya mamatay.

³³ Nganì nang nabatian adto ni Pilato, nagsuyod siya liwat sa palasyo. Gingpatawag niya si Hesus kag gingpangutana, “Ikaw ba ang harì ng mga Judio?”

³⁴ Nagsiling da siya ni Hesus, “Imo gid ba inà pangutana o may iban nga nagbalità sa imo parti sa akon?”

³⁵ Nagsabat si Pilato, “Basì? Ano ba ang kalaom mo sa akon, Judio? Ang imo mga kasimanwa kag ang mga pinunò nga parì ng mga Judio ang nagdaya sa imo diri sa akon. Ano ba ang imo nahuman?”

³⁶ Nagsabat si Hesus, “Ang akon gingharian hay bukon diri sa kalibutan. Kung diri sa kalibutan ang akon gingharian, nagbatò kuntà ang akon mga tagasunod agud indì ako maitugyan sa mga Judio. Pero ang akon gingharian hay bukon sa ini nga kalibutan.”

³⁷ Siling ni Pilato, “Kung imaw, harì ka galì?”

Nagsabat si Hesus, “Ikaw ang naghambay nga harì ako. Imaw ini ang kabangdanan kung basì ako natawo kag nagkari diri sa kalibutan agud magpamatuod parti sa kamatuuran. Ang abir sin-o nga gusto magsunod sa kamatuuran hay nagapamatì sa akon hambay.”

³⁸ Nagsiling liwat si Pilato, “Ano ba nganì ang kamatuuran?”

Pagkahambay adto ni Pilato, nagluwas siya liwat kag naghambay sa mga Judio, “Wayà ako ning may nakità nga salà sa ini nga tawo. ³⁹ Pero sunò sa indo tradisyon, kahingyan ko magpaluwas ning isa ka priso sa Pista ng Pagligad ng Anghel. Gusto ba nindo nga buhian ko ang Harì ng mga Judio para sa indo?”

⁴⁰ Pero nagsinggit sinda liwat, “Indì! Bukon inà nga tawo! Si Barrabas ang gusto namon!” (Si Barrabas hay isa ka rebeldi.)