¹ Ako si Pablo nga ulipon ni Kristo Hesus. Gingpilì ako ng Dios nga maging apostol^a kag ginglain para magpasayod ng Maayo nga Balità halin sa Dios.

² Ining Maayo nga Balità hay gingpangakò ng Dios nang una kung sa diin gingpasulat sa iya mga propeta^b sa mga Banal nga Kasulatan. ^3,4 Ini hay parti sa iya Ongà, nga si Hesu-Kristo nga aton Ginoo nga ging-ongà sa inapo ni Haring David sunò sa kinaugalì ng tawo; pero sunò sa banal nga kinaugalì ng Dios,^c gingpakità ng Dios nga siya hay iya Ongà sa makagagahom nga paagi nang gingbanhaw siya ng Dios. ⁵ Paagi kay Kristo nabaton namon ang pribilihiyo nga maging apostol agud makumbinsi ang mga tawo sa tanan nga nayson nga magtuo kag magsunod sa iya. Ginahuman namon ini bilang pagserbisyo kay Kristo agud dayawon siya. ⁶ Kamo nga mga nagatuo dirà sa Roma hay kaibahan da sa mga tawo nga gingtawag ng Dios agud magpakig-isa kay Hesu-Kristo.

⁷ Ginasulat ko ini para sa indo dirà sa Roma nga ginahigugmà ng Dios kag gingtawag nga maging iya mga tawo.

Kabay pa nga mabaton nindo ang grasya kag katawhayan halin sa Dios nga aton Amay kag kay Hesu-Kristo nga Ginoo.

⁸ Una sa tanan nagapasalamat ako sa aton Dios paagi kay Hesu-Kristo para sa indo tanan, kay ang indo pagtuo hay nababatian sa bilog nga kalibutan. ⁹ Padayon ako nga nagapangamuyò para sa indo, kag sayod ini ng Dios nga akon ginaserbisyuhan sa bilog ko nga tagipusuon, sa akon pagpasayod ng Maayo nga Balità parti sa iya Ongà. ¹⁰ Permi ko ginapangamuyò sa Dios nga kung ini hay iya gusto, tugutan niya ako para makakarà dirà sa indo. ¹¹ Dakò gid ang akon handom nga makità ko kamo, agud maipasa ko sa indo ang mga pagpanudlò nga gingpasayod ng Epiritu ng Dios sa akon para mapalig-on ang indo pagtuo. ¹² Ang gusto ko hambayon, nga magbinuligan kita mintras yarà ako sa indo para mapalig-on ko ang indo pagtuo kag mapakusog da nindo ang akon pagtuo.

¹³ Mga kauturan, gusto ko nga masayuran nindo nga pila na gid ako ka beses nagplano nga magkarà dirà sa indo, pero may nagaharang sa akon hasta arinyan. Gusto ko nga makakarà dirà, agud makabulig ako sa pila ka mga tawo nga magtuo kay Kristo, pareho ng nahuman ko sa iban nga mga bukon Judio nga akon gingkadtuan. ¹⁴ Kay may obligasyon ako nga magwali sa tanan nga tawo: sa mga nagaistar sa siyudad kag mga nagaistar sa kaguyangan;^d sa mga madamò ning tinun-an kag wayà. ¹⁵ Nganì dakò gid ang akon handom nga makapasayod da ng Maayo nga Balità dirà sa indo sa Roma.

¹⁶ Wayà ko ginakahuyà ining Maayo nga Balità. Kay paagi diri, ipakità ng Dios ang iya gahom para maluwas ang kada isa nga magtuo, una ang mga Judio, kag imaw da ang mga bukon Judio. ¹⁷ Kay ginapasayod sa Maayo nga Balità nga ibilang nga matarong ng Dios ang mga tawo paagi lang gid sa pagtuo. Sunò sa Kasulatan, “Ang tawo nga gingbilang nga matarong ng Dios tungod sa iya pagtuo hay magkaigwa ning kabuhì nga wayà katapusan.”^e

¹⁸ Pero ginapasayod ng Dios nga sa langit ang iya parusa kuntra sa tanan nga kasal-anan kag kalainan nga ginahuman ng mga tawo. Ang inda ginahuman imaw ang nagaharang sa inda para makilaya ang kamatuuran. ¹⁹ Parusahan sinda ng Dios kay ang mga butang nga nasayuran ng mga tawo parti sa Dios hay gingpasayod na, tungod ang Dios imaw ang nagpasayod sa inda. ²⁰ Tunà pa nang ginghuman ang kalibutan, ang iya wayà katapusan nga gahom kag kinaugalì hay indì ta makità, pero paagi sa mga butang nga iya ginghuman, ang mga ini hay nasayuran na naton. Nganì wayà na sinda ning may ibalibad pa nga wayà sinda nakasayod parti sa Dios. ²¹ Abir nasayuran ninda nga may Dios, wayà sinda nagadayaw kag nagapasalamat sa iya. Kundì, wayà ning puyos ang inda mga ginarason parti sa Dios kag naduyman ang inda mga hunahunà nga indì makaintindi ng kamatuuran. ²² Nagahambay sinda nga mayad sinda, pero nagapakità lang nga sinda hay mga buang-buang. ²³ Kay wayà sinda nagasamba sa Dios nga wayà ning kamatayon, kundì ang inda ginasamba hay ang ginghuman nga mga dios-diosan, pareho ng mga tawo nga may kamatayon, mga sapat nga nagalupad, nagapanaw, kag nagakamang.

²⁴ Nganì gingpabay-an na sinda ng Dios sa paghuman ng malaw-ay nga mga handom ng inda tagipusuon, kag ang resulta, makahuhuyà ang ginahuman ng isa kag isa sa inda mga lawas. ²⁵ Ginabayluhan ninda ning kapusungan ang kamatuuran parti sa Dios. Ginasamba ninda kag ginaserbisyuhan ang mga ginghuman ng Dios, kag bukon ang Naghuman nga siya ang dapat dayawon sa wayà katapusan. Kabay pa!

²⁶ Tungod diri, gingpabay-an na sinda ng Dios nga maghuman ning makahuhuyà nga pagbinastos nga handom. Nagaubay ang mga babayi sa inda kapareho nga babayi imbes sa lyaki nga imaw ang natural. ²⁷ Imaw da ang mga lyaki, indì na sinda mag-ubay sa babayi, nga imaw ang natural. Ang ginahandom ng inda lawas hay sa inda kapareho nga lyaki. Makahuhuyà ang inda ginahuman sa lawas ng inda kapareho nga lyaki. Kag tungod sa ini nga malain nga ginahuman, parusahan sinda ng Dios ning parusa nga angay gid sa inda ginahuman nga bukon tamà.

²⁸ Tungod ginghungod ninda nga indì ninda pagkilay-on ang Dios, gingpabay-an na niya sinda sa inda malain nga hunahunà. Nganì ginahuman ninda ang mga butang nga indì dapat humanon. ²⁹ Napunò sinda ng tanan nga malain, malaw-ay, kahakog, kalain kag kaili. Gusto ninda ang pagpamatay, pag-inaway, pagdinayà, kag ang paghunahunà ning mga malain nga humanon sa inda isigkatawo. Nagapangtsismis sinda ³⁰ kag nagapanglibak sa inda isigkatawo. Hangit sinda sa Dios, wayà nagatahod sa inda isigkatawo, nagapinahambog, nagapinahadak, nagainimbinto ning malain, nagasinuway sa inda mga ginikanan, ³¹ nagahinunàhunà ning wayà kapuyos-puyos, indì sinda masaligan, wayà ning paghigugmà, kag wayà ning kaluoy sa inda isigkatawo. ³² Nasayuran ninda nga naghambay ang Dios nga ang mga tawo nga nagahuman ini nga mga salà hay angay nga purusahan hasta sa wayà katapusan, pero padayon gihapon ang inda paghuman. Kag bukon lang inà, kundì nalilipay pa gid ninda adtong mga nagahuman ng pareho sa inda ginahuman.