¹ Nganì, wayà ka na ning maibalibad. May maghambay dirà sa indo nga angay parusahan ng Dios adtong malain nga mga tawo. Pero ikaw nga nagahambay inà ginahusgahan mo da ang imo kaugalingon, kay kung ano ang inda ginahuman imaw da ang imo ginahuman. ² Nasayuran ta nga matarong ang paghusga ng Dios sa mga tawo nga nagahuman ning malain. ³ Ikaw nga nagahusga sa iban nga nagahuman ning malain, kalaom mo ba parusahan ng Dios ang iban kag ikaw hay indì nga imaw da ang imo ginahuman? ⁴ Wayà mo ba naiisip kung mauno kaayo, kamatiniison, kag kamapinasinsyahon ang Dios sa imo? O wayà ka ning labot! Wayà mo ba nakikità nga ginataw-an ka niya ning tsansa nga magtalikod sa imo salà? ⁵ Pero tungod matugas ang imo uyo kag indì ka magtalikod sa salà, ginadugangan mo ang imo parusa sa adlaw nga parusahan ka ng Dios pag ipakità niya ang iya matarong nga paghusga. ⁶ Kay magabayos ang Dios sa kada isa sunò sa iya mga ginghuman.^{a 7} Ang mga tawo nga nagapadayon sa paghuman ning maayo kay ginahandom ninda ang pagdayaw, padungog kag kabuhì nga wayà kamatayon halin sa Dios, sinda hay taw-an ning kabuhì nga wayà katapusan. ⁸ Pero ang mga tawo nga makasarili kag wayà nagasunod sa kamatuuran kundì nagahuman ning kalainan hay makakabaton gid ning parusa kag kaugot ng Dios. ⁹ Kay ang abir sin-o nga nagahuman ning malain hay makakabaton gid ning kasakit kag kahugaan, labi na ang mga Judio kag imaw da ang mga bukon Judio. ¹⁰ Pero ang abir sin-o nga nagahuman ning maayo hay makakabaton ning pagdayaw, padungog halin sa Dios, kag katawhayan, labi na ang mga Judio kag imaw da ang mga bukon Judio. ¹¹ Kay pare-pareho ang tanan nga tawo sa panirò ng Dios.

¹² Ang abir sin-o nga nagahuman ning salà hay maparusahan,^b abir wayà sinda kasayod ng Kasuguan ni Moises. Pero ang paghusga sa inda hay bukon basi sa Kasuguan. Kag ang abir sin-o naman nga nakasayod ng Kasuguan pero nagapadayon sa paghuman ning salà, hay pagahusgahan ng Dios sunò sa Kasuguan. ¹³ Kay ang mga ginabilang nga matarong ng Dios hay adto lang ang nagatuman ng Kasuguan kag bukon ang nagapamatì lang. ¹⁴ Ang mga bukon Judio nga wayà ning Kasuguan, pero ginahuman ninda ang ginapangayò ng Kasuguan sunò sa inda kinaugalì ng tawo, abir wayà sinda ning Kasuguan, ini hay naging kasuguan para sa inda. ¹⁵ Ang inda ginahuman hay nagapakità nga ang ginatudlò ng Kasuguan hay yarà sa inda tagipusuon. Ginapakità da ng inda konsinsya nga ini hay matuod, tungod ang inda hunahunà hay kung kaisa ginaakusar sinda kag kung kaisa ginatugutan sinda. ¹⁶ Ini hay matatabò nang adto nga adlaw pag husgahan ng Dios ang mga tinagò sa hunahunà ng mga tawo, paagi kay Kristo Hesus sunò sa Maayo nga Balità nga akon ginapasayod.

¹⁷ Niyan, ikaw nga akon kapareho nga Judio, nagasalig sa Kasuguan, kag nagapahambog pa nga may relasyon sa Dios. ¹⁸ Sayod mo kung ano ang kabubut-on ng Dios kag kung ano ang pinakamaayo nga humanon nga natun-an mo halin sa Kasuguan. ¹⁹ Nagapati ikaw nga miyugtuytoy ka sa mga tawo nga buta sa kamatuuran parti sa Dios kag makatao ning kahayag sa mga tawo nga naduyman ang inda hunahunà. ²⁰ Nagapati da ikaw nga miyuglaygay ka sa mga tawo nga maluya ang pang-intindi kag manunudlò sa mga tawo nga lapsag pa parti sa Dios. Imaw inà ang imo hunahunà kay sayod mo kuno ang tamà nga kamayad kag kamatuuran halin sa Kasuguan. ²¹ Nagatudlò ikaw sa iban, pero wayà mo ginatudlui ang imo sarili. Nagawali ka nga indì magpangawat, pero nagapangawat ka. ²² Nagahambay ikaw nga indì magpanginbabayi o magpanginlyaki, pero imaw da inà ang imo ginahuman. Ginalainan gid ikaw sa mga rebulto nga ginasamba ng mga bukon Judio, pero nagapangawat ikaw sa inda mga templo. ²³ Nagapakadakò ikaw nga yarà sa imo ang Kasuguan, pero ginapakahuy-an mo ang Dios tungod sa imo pagsuway sa Kasuguan. ²⁴ Nakasulat sa Kasulatan, “Tungod sa indo nga mga Judio, may nahahambay nga malain ang mga bukon Judio sa Dios.”^c

²⁵ Nagapati ikaw nga gingpilì ka ng Dios tungod sa imo pagiging paltak. Ang pagiging paltak hay may puyos lang kung ginatuman mo ang Kasuguan. Pero kung wayà mo ginatuman ini, pareho lang ikaw sa mga bukon Judio nga bukon paltak. ²⁶ Kag imaw da sa mga tawo nga bukon paltak: kung sinda nagatuman sa Kasuguan, ginakabig da sinda ng Dios nga mga pinaltak, abir sinda hay bukon paltak. ²⁷ Nganì ang mga bukon paltak nga nagatuman sa Kasuguan hay pagahusgahan ang mga Judio nga mga pinaltak. Abir yarà sa inda ining gingsulat nga Kasuguan, pero wayà sinda nagatuman. ²⁸ Bukon matuod nga Judio ang isa ka tawo kay ang iya ginikanan hay Judio o tungod siya hay paltak sa panluwas. ²⁹ Ang matuod nga Judio hay ang tawo nga nagbag-o ang iya kabuhì paagi sa bulig ng Espiritu Santo kag bukon tungod sa napaltak siya sunò sa Kasuguan. Ang tawo nga tiyad inà hay ginadayaw ng Dios abir wayà siya ginadayaw ng mga tawo.