¹ Kung tiyad ini, may bintaha ba ang Judio o may puyos ba ang pagiging paltak? ² Sa matuod lang, madamò ang bintaha. Una sa tanan, gingsalig sa mga Judio ang hambay ng Dios. ³ Matuod nga may pila nga mga Judio nga wayà nagapati, pero puydi ba nga indì da pagtumanon ng Dios ang mga gingpangakò niya nang una? ⁴ Indì inà puydi! Abir ang kada tawo hay bakakon, ang Dios hay masaligan gihapon sa iya mga hambay, pareho ng nakasulat sa Kasulatan parti sa iya,

⁵ Kung ang aton makakasalà nga kinaugalì hay nagapakità nga matarong ang Dios, makahambay ba kita nga bukon matarong ang Dios kay siya ang nagaparusa sa aton? (Ini hay lawasnon lang nga rason.) ⁶ Indì inà puydi! Kay kung ang Dios hay bukon matarong, pauno niya pagahusgahan ang mga tawo sa kalibutan? ⁷ Kung paagi sa akon pagpinusong, nagapakità nga bukon bakakon ang Dios kag tungod sa ini madayaw siya, basì parusahan ako bilang makasasalà? ⁸ May mga nagahambay, “Maghuman kita ning malain agud magaluwas ang maayo!” Imaw kuno ini ang amon ginatudlò, sunò sa mga tawo nga gusto magsirà sa amon. Inà nga mga tawo hay dapat gid parusahan ng Dios!

⁹ Niyan, ano ang aton mahambay? Kita ba nga mga Judio hay mas maayo kaysa sa mga bukon Judio? Bukon inà matuod! Gingpamatuuran ko na nga ang tanan nga tawo, Judio man o bukon hay makasasalà. ¹⁰ Kay imaw ini ang nakasulat sa Kasulatan:

¹⁹ Niyan, sayod naton kung ano ang nakasulat sa Kasulatan, ginahambay ini sa mga Judio nga nagakabuhì sa idayom ng Kasuguan. Nganì wayà na kita ning maibalibad nga indì kita parusahan. Ang tanan hay manabat sa Dios tungod sa inda mga salà. ²⁰ Wayà gid ning tawo nga ibilang nga matarong sa panirò ng Dios paagi sa pagtuman ng Kasuguan, kay paagi sa Kasuguan makikilaya ng tawo nga siya hay makasal-anan.

²¹ Pero niyan gingpasayod na kung pauno ibilang nga matarong ng Dios ang tawo. Ini hay bukon paagi sa pagtuman sa Kasuguan. Ang Kasuguan mismo kag mga propeta^h ang nagapamatuod diri. ²² Ibilang nga matarong ng Dios ang tawo paagi sa pagtuo kay Hesu-Kristo. Ang abir sin-o nga nagatuo hay ibilang nga matarong ng Dios kay siya hay wayà ning may ginapalabi. ²³ Kay ang tanan hay nagpakasalà kag wayà gid nakaabot sa iya pagkadios. ²⁴ Pero tungod sa pagpakamaayo niya, gingbilang kita nga matarong kag ini hay regalo ng Dios paagi kay Kristo Hesus nga nagtubos sa aton. ²⁵ Gingsugò siya ng Dios agud ihalad ang iya kabuhì para sa aton agud paagi sa aton pagtuo sa iya pagkamatayⁱ, ang aton mga salà hay mabuoy kag indì na kita parusahan ng Dios. Ginghuman ini ng Dios para ipakità nga siya hay matarong. Nang una, pinalampas niya ang kasal-anan ng mga tawo, kay siya hay mapinasinsyahon. ²⁶ Pero arinyan ginghikot niya ang kasal-anan ng mga tawo agud ipakità niya nga siya hay matarong, kag ibilang niya nga matarong ang abir sin-o nga nagtuo kay Hesus.

²⁷ Nganì wayà gid ning abir sin-o nga makapahambog, kay ibilang kita nga matarong ng Dios bukon paagi sa aton pagtuman sa Kasuguan, kundì paagi sa aton pagtuo kay Hesu-Kristo. ²⁸ Kay nagapati kita nga ibilang nga matarong ng Dios ang tawo paagi sa pagtuo kag bukon sa pagtuman ng Kasuguan. ²⁹ Matuod nga ang Dios hay Dios ng mga Judio kag imaw da ng mga bukon Judio. Simpre siya hay Dios ng tanan, ³⁰ kay may isa lang nga Dios. Kag ginabilang niya nga matarong ang mga Judio kung sinda magtuo kay Hesus, kag imaw da ang mga bukon Judio kung magtuo da sinda kay Hesus. ³¹ Bukon ini gusto hambayon nga ginabaliwayà naton ang Kasuguan tungod sa pagtuo, kundì ginatuman pa naton ini.