4
Si Abraham Bilang Halimbawà Kung Pauno Ibilang nga Matarong ng Dios ang Tawo
1 Bilang halimbawà ng kung pauno ginabilang nga matarong ng Dios ang tawo, ano ang amon mahahambay parti kay Abraham nga amon kalulo-lulohan sunò sa kinaugalì ng tawo? 2 Kung gingbilang siya nga matarong ng Dios tungod sa iya maayo nga mga ginghuman, may maipapahambog siya. Pero ang matuod, wayà siya ning may maipahambog sa Dios. 3 Nasayuran naton ini kay nakasulat sa Kasulatan,
“Nagtuo si Abraham sa Dios, kag tungod diri gingbilang siya nga matarong ng Dios.”a
4 Ang tawo nga nagatrabaho hay ginasuhuyan. Ang suhoy hay indì mabilang nga regalo kay iya ini gingpangabudlayan. 5 Pero ang tawo hay ginabilang nga matarong ng Dios, bukon paagi sa iya maayo nga mga ginghuman, kundì paagi sa iya pagtuo sa Dios nga nagapatawad sa makasasalà. 6 Imaw da ini ang gusto hambayon ni David nang naghambay siya nga gingpakamaayo ang tawo nga gingbilang nga matarong ng Dios bukon paagi sa iya maayo nga mga ginghuman. 7 Naghambay siya,
“Gingpakamaayo ang mga tawo nga ang inda mga pagsuway hay gingpatawad,
kag ang inda mga salà hay ginglimot na ng Dios.
8 Gingpakamaayo ang tawo nga ang iya salà hay wayà na ginadumduma ng Ginoo.”b
9 Ini nga pagpakamaayo nga ginghambay ni David hay bukon lang para sa mga Judio, kundì para da sa mga bukon Judio. Ang ginahambay namon hay pareho ng nakasulat sa Kasulatan,
“Nagtuo si Abraham sa Dios kag tungod sa iya pagtuo, gingbilang siya nga matarong ng Dios.”
10 Kasan-o ba ini natabò? Pagkatapos siya mapaltak o bago siya mapaltak? Gingbilang na siya nga matarong bago siya mapaltak. 11 Gingpaltak siya nang ulihi bilang tandà nga gingbilang na siya nga matarong ng Dios tungod sa iya pagtuo nang wayà pa siya mapaltak. Imaw inà nga si Abraham hay gingbilang nga tatay ng tanan nga wayà napaltak pero nagatuo sa Dios. Kag tungod sa inda pagtuo, gingbilang sinda nga matarong ng Dios. 12 Si Abraham hay tatay da ng mga pinaltak, bukon lang tungod sa inda pagiging paltak, kundì tungod nagatuo sinda pareho sa pagtuo ng amon tatay nga si Abraham nang wayà pa siya mapaltak.
Ang Pangakò ng Dios hay Nabaton Paagi sa Pagtuo
13 Nang una, nagpangakò ang Dios kay Abraham kag sa iya mga inapo nga ang kalibutan hay maging inda. Gingpangakò ini bukon tungod sa pagtuman ni Abraham sa Kasuguan, kundì gingbilang siya nga matarong paagi sa iya pagtuo. 14 Kung ang mga nasakop sa Kasuguanc imaw lang ang makabaton ng gingpangakò ng Dios, wayà ning puyos ang aton pagtuo sa Dios, kag gingbaliwayà na ang pangakò ng Dios. 15 Ang Kasuguan imaw ang kabangdanan ng parusa ng Dios. Kay kung wayà ning kasuguan, wayà da ning pagsuway.
16 Nganì ang pangakò ng Dios hay ginabasi sa pagtuo, agud maging regalo ng Dios kag maging pamatuod nga ini hay mabaton ng tanan nga inapo ni Abraham, bukon lang sa mga Judio nga nasakop sa Kasuguan, kundì sa mga bukon Judio nga nagatuo da pareho kay Abraham. Kay si Abraham imaw ang tatay ng tanan nga nagatuo, Judio man o bukon. 17 Nakasulat sa Kasulatan,
“Ginghuman ko ikaw nga tatay ng madamò nga mga nasyon.”d
Ini nga pangakò hay sigurado gid kay ang Dios ang naghuman ini. Kag ang Dios nga gingtuuhan ni Abraham imaw da ang Dios nga nagatao ning kabuhì sa mga pataye kag nagahuman ng mga butang nga wayà pa. 18 Abir wayà na gid ning paglaom nga makaongà, nagtuo gihapon si Abraham nga siya hay maging tatay ng madamò nga mga nasyon. Nganì sa iya pagtuo, natuman ang pangakò ng Dios. Sunò gid sa ginghambay ng Dios sa iya,
“Pareho kadamò sa mga bituon ang imo mga inapo.”f
19 Nang nagpangakò ang Dios kay Abraham, mga 100 na ka tuig ang iya edad. Sayod niya nga maguyang na siya kag imposibli na nga makaongà pa. Sayod da niya nga ang iya asawa hay indì na makaongà kay baog si Sara. Pero wayà nagpangluya ang iya pagtuo sa Dios. 20 Wayà gid siya nagduda sa pangakò ng Dios, kundì nagtuo siya. Nganì gingpakusog siya ng Dios tungod sa iya pagtuo. Kag gingdayaw niya ang Dios 21 kay nagsalig gid siya nga mahuhuman ng Dios ang iya gingpangakò. 22 Nganì tungod sa iya pagtuo, gingbilang siya nga matarong ng Dios. 23 Pero ang nakasulat sa Kasulatan nga “gingbilang siya nga matarong” hay gingsulat ini bukon lang para kay Abraham, 24 kundì para da sa aton. Ibilang da kita nga matarong kung nagatuo kita sa Dios nga nagbanhaw kay Hesus nga aton Ginoo. 25 Gingpapatay si Hesus tungod sa aton mga salà, kag gingbanhaw siya agud ibilang kita nga matarong.