10
1 Mga kauturan, dakò gid ang akon handom nga maluwas ang akon mga kapareho nga Judio, kag ini hay ginapangamuyò ko sa Dios. 2 Makapamatuod ako nga mahugod sinda sa pagserbisyo sa Dios, pero ang inda pang-intindi diri hay bukon tamà. 3 Kay wayà sinda kasayod ng paagi ng Dios kung pauno niya ibilang nga matarong ang tawo. Ang inda ginahuman, nagatinguhà sinda sa inda kaugalingon nga paagi kag wayà ninda ginasunod ang paagi ng Dios. 4 Wayà sinda makaintindi nga paagi kay Kristo, ang tanan nga Kasuguan hay natuman na. Kay ang kada isa nga nagatuo sa iya hay imaw lang ang ginabilang nga matarong.
Ang Kaluwasan Para sa Tanan
5 Imaw ini ang gingsulat ni Moises parti sa kung pauno ginabilang nga matarong paagi sa pagtuman ng Kasuguan: “Ang tawo nga nagatuman sa Kasuguan ning kumpleto, imaw ang makabaton ning kabuhì nga wayà katapusan.”a 6 Pero imaw ini ang nakasulat sa Kasulatan parti sa kung pauno ginabilang nga matarong ang tawo paagi sa pagtuo, “Indì ka maghambay sa imo kaugalingon, ‘Sin-o ba ang mapa-langit?’ ” (gusto hambayon, agud ibabà si Kristo paidayom). 7 “Indì ka da maghambay, ‘Sin-o ang manaog sa idayom ng duta?’ ” (gusto hambayon, agud buy-on si Kristo halin sa mga patay). 8 Kundì tiyad ini ang nakasulat sa Kasulatan,
“Malapit sa imo ang hambay, yarà sa imo mismo babà kag tagipusuon.”b
Kag ining hambay ng Dios wayà ning iban kundì ang parti sa pagtuo nga amon ginawali: 9 kung ihambay mo sa iban nga tawo nga si Hesus imaw ang Ginoo kag nagatuo ka sa imo tagipusuon nga gingbanhaw siya ng Dios halin sa kamatayon, maluwas ka. 10 Kay ang tawo hay ibilang nga matarong ng Dios kung nagatuo siya ning hugot sa iya tagipusuon. Kag kung nagahambay siya nga nagatuo siya, maluwas siya. 11 Kay nakasulat sa Kasulatan, “Ang nagatuo sa iya indì gid mapahuyà.”c 12 Kag ini nga pangakò hay para sa tanan nga tawo, Judio man o bukon, kay ang Ginoo hay Ginoo ng tanan, kag nagatao siya ning abunda nga mga pagpakamaayo sa tanan nga nagatawag sa iya. 13 Kay nakasulat sa Kasulatan, “Ang abir sin-o nga nagatawag sa Ginoo hay maluwas.”d
14 Pero pauno sinda makatawag sa iya kung indì sinda magtuo? Kag pauno sinda makatuo sa iya kung wayà ninda mabatii ang parti sa iya? Kag pauno sinda makabatì kung wayà ning may magbalità sa inda? 15 Kag pauno sinda makapanaw kag makabalità kung wayà sinda pagsugua? Sunò sa Kasulatan, “Mauno kaayo nga siruon ang nagaabot nga mga mensahiro nga nagapasayod ng Maayo nga Balità.”e 16 Pero bukon tanan hay nagbaton ng Maayo nga Balità. Pareho ng ginghambay ni Isaias, “Ginoo, sin-o ba ang nagpati sa amon mensahe?”f 17 Niyan nasayuran naton nga ang pagtuo hay halin sa pagpamatì, kag makapamatì lang ang mga tawo kung may magapasayod ng mensahe parti kay Kristo. 18 Niyan, nakabatì ba arà ang mga Israelita sa ini nga mensahe? Indì puydi nga wayà sinda nakabatì. Kay nakasulat sa Kasulatan, “Ang inda bosis hay umabot sa bilog nga kalibutan, ini nga mensahe hay nasayuran abir diin nga lugar.”g 19 Imaw pa ini ang isa ko nga pangutana, “Wayà ba arà sinda nakaintindi?” Indì puydi nga wayà sinda nakaintindi. Kay sa gingsulat ni Moises naghambay ang Dios sa inda, “Paimunon ko kamo sa iban nga nasyon. Pahangiton ko kamo paagi sa pagpakamaayo sa buang-buang nga nasyon.”h 20 Naghambay da ang Dios sa inda paagi kay Isaias. Kag nang paghambay ni Isaias ini, wayà gid siya nahadlok sa mga tawo,
“Nakità ako ng mga tawo nga wayà nagapangità sa akon.
Nagpakilaya ako sa inda abir wayà sinda nagapangutana parti sa akon.”i
21 Pero parti sa mga Israelita, hambay ng Dios, “Nagapinaabot ako nga magbalik sa akon ang mga matugas ning uyo kag mga rimulon nga akon katawuhan.”j