¹ Nganì ang pangutana ko, “Gingsikway na ba ng Dios ang iya katawuhan nga Israelita?” Wayà gid! Kay ako mismo isa ka Israelita, inapo ni Abraham, kag halin sa inapo ni Benjamin. ² Wayà gingsikway ng Dios ang iya katawuhan nga gingpilì na niya nang una pa. Wayà ba nindo nadumdumi ang nakasulat sa Kasulatan parti kay Elias? Dì ba nagreklamo siya sa Dios parti sa ginahuman ng Israelita? ³ Hambay niya, “Ginoo, gingpangpatay ninda ang imo mga propeta,^a kag ginggubà ninda ang imo mga altar^b nga ginahalaran ng mga hayop. Ako na lang nga isa ang nabilin kag ginatinguhà da ninda ako nga patyon.”^{c 4} Pero nagsabat ang Ginoo sa iya, “May gingbilin ako para sa akon nga 7,000 nga mga Israelita nga wayà nagluhod sa imahen ni Baal.”^{d 5} Imaw da ini niyan sa aton tiyempo. May nabilin pa nga malakà nga mga Israelita nga nagatuo sa Dios, kay gingpilì niya sinda tungod sa iya dakò nga kaluoy. ⁶ Ang pagpilì sa inda hay bukon tungod sa inda maayo nga ginahuman kundì sunò sa kaluoy ng Dios kay kung ginabasi sa maayo nga ginahuman, indì na ini matawag nga kaluoy.

⁷ Niyan, mahambay naton nga ang mga Israelita wayà nakabaton ng inda ginahandom nga maging matarong. Ang gingpilì lang ng Dios imaw ang nakabaton ng inda ginahandom, pero ang iban hay gingpatugas ang inda uyo. ⁸ Imaw ini ang nakasulat sa Kasulatan parti sa inda, “Daw sa gingpatuyog ng Dios ang inda espiritu ning hamuok, kag hasta niyan indì ninda maintindihan ang inda nakità kag nabatian.”^{e 9} Naghambay da si David nga harì parti sa inda, “Kabay pa nga ang inda punsyon^f imaw ang maging siod nga makapagpasuyaod kag makadakop sa inda, kag maparusahan sinda ng Dios. ¹⁰ Kabay pa nga magduyom ang inda hunahunà agud indì ninda maintindihan ang kamatuuran kag kabay pa da nga ang kabug-at kag kahugaan hay magpadayon sa inda.”^g

¹¹ Napasuyaod ang mga Judio kay wayà sinda nagtuo kay Kristo. Nganì ini ang pangutana ko. “Ang gusto ba hambayon padayon gid ang inda pagkakadusmò?” Bukon gid! Kundì tungod sa inda pagsuway, nataw-an ning tsansa ang mga bukon Judio nga maluwas. Kag paagi diri mapaili ang mga Judio. ¹² Niyan, kung ang pagsuway kag ang kakuyangan ng mga Judio hay nagdaya ng madamò nga pagpakamaayo sa mga tawo sa bilog nga kalibutan, daw ano pa gid nga mga pagpakamaayo ang maging resulta kung makumpleto ang bilang ng mga Judio nga dapat magtuo sa iya.

¹³ Niyan, nagahambay ako sa indo nga mga bukon Judio. Ginghuman ako ng Dios nga apostol para sa indo agud ibalità ko sa indo ang parti kay Kristo. Kag ginakabig ko nga importante gid ini nga ministeryo nga gingtao sa akon kag ginahuman ko ang tanan sa abot ng akon abilidad, ¹⁴ agud basì pa paagi diri mapaili ko sa indo ang akon mga kapareho nga mga Judio, agud ang iban sa inda magtuo da kag maluwas. ¹⁵ Kay kung ang pagsikway ng Dios sa mga Judio naging kabangdanan nga ang iban nga mga tawo sa kalibutan nagkabalik sa Dios, daw ano pa gid ang maging resulta kung ang mga Judio batunon liwat ng Dios. Maging pareho sinda sa mga patay nga nabuhì.

¹⁶ Ang halimbawà ng mga Judio hay pareho diri, kung ang parte ng tinapay nahalad sa Dios, ang bilog nga tinapay hay sa Dios. Kag kung ang gamot ng kahoy sa Dios, ang mga sanga ng kahoy hay sa Dios.^{h 17} Ang mga Judio hay pareho sa mga sanga ng kahoy nga olibo nga gingpang-utod. Kag kamo nga mga bukon Judio hay pareho sa mga layas nga sanga ng olibo nga gingsugdong sa gingpang-utod nga mga sanga. Nganì nakaparte kamo ng mga kaayuhan nga gingtao ng Dios sa mga Judio. ¹⁸ Pero ayaw nindo pagpahambog sa mga sanga nga gingpang-utod. Dapat nindo isipon nga kamo hay mga sanga lang. Bukon kamo ang nagabuhì sa gamot, kundì ang gamot imaw ang nagabuhì sa indo.

¹⁹ Basì kung igwa sa indo ning maghambay, “Gingpang-utod sinda agud kami ang gingsugdong.” ²⁰ Tamà gid inà! Gingpang-utod sinda kay wayà sinda nagtuo kay Kristo kag kamo ang gingsugdong kay nagtuo kamo. Nganì ayaw kamo magpahambog, kundì mahadlok kamo. ²¹ Kay kung ginapang-utod ng Dios ang natural nga mga sanga nga imaw ang mga Judio, madalì ang pagpang-utod sa indo, kay kamo hay mga gingsugdong lang nga mga sanga. ²² Diri makità ang kaayo ng Dios kag ang iya pagkaestrikto. Estrikto siya sa mga tawo nga indì magtuo sa iya, pero maayo siya sa indo, kung nagapabilin kamo sa iya kaayo. Pero kung indì, pang-uturon da niya kamo. ²³ Kag kung indì na magpatugas ang mga Judio kundì magtuo da, isugdong niya liwat sinda sa punò, kay puydi inà sa Dios. ²⁴ Kay kamo nga mga bukon Judio hay pareho sa mga sanga ng layas nga olibo nga gingpang-utod kag gingpangsugdong sa natural nga olibo nga imaw ang mga Judio, abir pa nga bukon ini natural nga paagi. Kung ginghuman inà ng Dios, mas madalì para sa iya nga ibalik ang natural nga mga sanga sa iya ginghalinan nga punò.

²⁵ Mga kauturan ko kay Kristo, gusto ko nga masayuran nindo ining wayà gingpasayura nang una nga kamatuuran, agud indì kamo magpahambog. Ang pagpatugas ng tagipusuon ng mga Judio hay temporaryo lang kag hasta lang gid sa tiyempo nga makumpleto na ang bilang ng mga bukon Judio nga dapat magtuo sa iya. ²⁶ Pagkatapos ini, luwason ng Dios ang tanan nga Israelita, pareho ng nakasulat sa Kasulatan,

³³ Makatitingaya gid ang kaayo ng Dios! Indì ta maubos maisip ang iya kamayad kag ang iya nasasayuran! Sin-o ba ang makaintindi ng iya hunahunà kag ng iya mga pamaagi? ³⁴ Pareho ng nakasulat sa Kasulatan,