¹ Ang kada isa sa aton hay dapat magpasakop sa mga nagadumaya sa gobyerno, kay ang tanan nga otoridad ng gobyerno halin sa Dios kag ang mga miyugdumaya hay gingbutang ng Dios. ² Nganì ang mga nagakuntra sa gobyerno, nagakuntra sa kagustuhan ng Dios kag sinda hay pagaparusahan. ³ Ang mga nagahuman ning maayo, wayà ning dapat ikahadlok sa mga nagadumaya, pero ang mga nagahuman ning malain imaw ang mahadlok. Nganì agud indì kamo mahadlok sa mga nagadumaya, maghuman kamo ning maayo, kag dayawon pa kamo ninda. ⁴ Kay gingbutang sinda bilang miyugserbiyso ng Dios para sa aton kaayuhan. Pero kung nakahuman kamo ning malain, dapat mahadlok kamo sa inda, kay may otoridad sinda para magparusa. Kay gingbutang sinda bilang miyugserbiyso ng Dios agud parusahan ang mga nagahuman ning malain. ⁵ Nganì dapat magpasakop kita sa aton gobyerno; bukon lang tungod nahadlok kita sa parusa, kundì tungod nasayuran ta da nga imaw ini ang dapat naton nga humanon. ⁶ Imaw da ini ang rason kung basì nagabayad kita ng aton buhis, kay ang mga miyugdumaya hay mga miyugserbisyo ng Dios nga nagapangabudlay para gid sa ini nga butang. ⁷ Nganì dapat nindo bayaran ang indo iba-iba nga klase ng buhis. Tahura nindo kag padunggi ang mga may otoridad.

⁸ Kung kamo hay igwa ning utang, bayaran nindo nga daan. Kag ang isa ka butang nga dapat nindo humanon hay ini: maghigugmaanan kamo sa isa kag isa. Kay ang nagahigugmà sa iya isigkatawo imaw ang nagatuman sa Kasuguan. ⁹ Kay ang mga sugò hay, “Indì ka magpanginbabayi o magpanginlyaki, indì ka magpatay, indì ka magpangawat, indì ka maghinakog,”^a kag ang iban pa nga mga sugò hay gingpinsan lang sa isa ka sugò nga nagahambay, “Higugmaon mo ang imo isigkatawo pareho ng paghigugmà mo sa imo kaugalingon.”^{b 10} Kung ginahigugmà ta ang aton isigkatawo, wayà kita nagahuman ning malain sa inda. Imaw inà nga kung may paghigugmà kita, ginatuman ta ang bilog nga Kasuguan.

¹¹ Dapat nindo humanon ini, kay nasayuran nindo nga oras na nga dapat kamo magbatì. Kay ang kabilugan ng aton kaluwasan mas malapit na kaysa sa una nga nagtuo kita kay Hesus. ¹² Ang gab-i hay madalì na lang maduyà kag ang adlaw hay madalì na gid mag-abot. Nganì ubahon na naton ang malain nga mga ginahuman sa kaduyom, kag isuksok naton ang tamà nga pagkabuhì pareho ng pangprotekta kag mga armas nga ginagamit sa kahayag. ¹³ Kay kita hay sa kahayag, dapat kita magkabuhì ning tamà. Indì kita magbinayong o magsunod sa mga mahigkò nga pagkinalipay. Indì kita maghuman ning imoral nga pagpakigrelasyon o magpagusto sa paghuman ng kalainan. Indì kita mag-inaway o magkasina. ¹⁴ Kundì, dapat magkabuhì kamo pareho ng pagkabuhì ng Ginoong Hesu-Kristo, agud maprotektahan niya kamo kag ini hay daw igwa kamo ning mga armas. Kag indì nindo pagtaw-an ning tsansa ang indo lawasnon nga handom para maghuman ning malain.