¹ Batuna nindo ang tawo nga maluya ang pagtuo, kag ayaw siya pagdebatiha sa iya mga panghunahunà. ² May mga nagatuo nga nagapati nga puydi magkaon ng abir ano, kag may mga nagatuo nga maluya ang inda pagtuo kung sa diin ang inda ginakaon hay utan lang. ³ Ang nagatuo nga nagakaon ning abir ano hay indì niya dapat pakababaon ang nagatuo nga ang ginakaon hay utan lang, kag ang nagatuo nga utan lang ang ginakaon indì da dapat manghusga sa nagakaon ng abir ano. Kay sinda nga duha hay pareho nga ginabaton ng Dios, ⁴ kag sa Dios sinda manabat. Nganì sin-o ka nga manghusga sa kabulig ng iban? Ang iya lang gid amo ang makahambay kung maayo o malain ang iya ginahuman. Kag mahuhuman gid niya ang maayo, kay kaya ng Ginoo nga mabulig sa iya para maghuman ning maayo.

⁵ May mga tawo nga ginakabig nga may adlaw nga mas importante kaysa sa iban nga adlaw. Kag may nagakabig da nga ang tanan nga adlaw hay pare-pareho lang. Ang kada isa hay dapat konbesiydo gid sa iya sarili nga isip nga ang iya ginahuman hay tamà. ⁶ Ang tawo nga may ginapalabi nga adlaw, ginahuman niya ini para sa Ginoo. Kag ang tawo nga nagakaon ning abir ano, ginahuman da niya ini para sa Ginoo, tungod nagapasalamat siya sa Dios sa iya ginakaon. Ang iban nga wayà nagakaon ng iban nga pagkaon, ginahuman niya ini para da sa Ginoo, kag nagapasalamat da siya sa Dios. ⁷ Kay wayà ning abir sin-o sa aton nga mga nagatuo ang nabubuhì o namamatay para sa aton kaugalingon. ⁸ Kung nabubuhì kita, nabubuhì kita para sa Ginoo; kag kung mamamatay kita, para da sa Ginoo. Nganì kung nabubuhì kita o namamatay, kita hay sa Ginoo. ⁹ Ini ang kabangdanan kung basì si Kristo hay namatay kag nabanhaw, agud maging Ginoo siya ng mga buhì kag mga patay. ¹⁰ Nganì indì nindo husgahan o pakababaon ang indo mga kauturan kay Kristo. Kay kita tanan magaatubang sa Dios, kag siya ang magahusga kung maayo o malain ang aton ginghuman. ¹¹ Kay nakasulat sa Kasulatan,

¹² Nganì ang kada isa sa aton hay manabat sa Dios sa aton mga ginghuman diri sa kalibutan.

¹³ Nganì indì na kita manghusga sa isa kag isa. Kundì, likawan ta ang mga butang nga maging kabangdanan nga makasalà ang aton utod kay Kristo. ¹⁴ Tungod ako hay nagpakig-isa sa Ginoong Hesus, sayod ko kag kombinsido gid ako nga wayà ning pagkaon nga mahigkò sa panirò ng Dios. Pero ang abir sin-o nga nagapatì nga may pagkaon nga indì dapat kaunon, ini hay dapat indì niya kaunon. ¹⁵ Niyan, kung nagalain ang buot ng imo utod tungod sa imo ginakaon, ayaw na ini pagkauna. Kung ipadayon mo ini nga kaunon, wayà mo siya ginahigugmaa. Namatay da si Kristo para sa iya, nganì ayaw pagsiraa ang iya pagtuo tungod sa imo ginakaon. ¹⁶ Ayaw nindo pagpabay-i nga maghambay ning malain ang iban tungod sa indo ginaisip nga maayo. ¹⁷ Kay ang paghaharì ng Dios hay bukon parti sa pagkaon kag pag-inom, kundì parti sa matarong nga kabuhì, maayo nga relasyon sa isa kag isa, kag kalipay nga halin sa Espiritu Santo. ¹⁸ Ang abir sin-o nga nagaserbisyo kay Kristo sa ini nga paagi hay imaw ang nagustuhan ng Dios kag ginatahod ng mga tawo.

¹⁹ Nganì tinguhaon ta gid ang paghuman ng mga butang nga nagadaya ning maayo nga relasyon kag nagapalig-on sa pagtuo ng isa kag isa. ²⁰ Ayaw pagsiraa ang pagtuo ng gingluwas ng Dios tungod lang sa pagkaon. Puydi makaon ang tanan nga klase ng pagkaon, pero bukon maayo nga magkaon ng pagkaon nga maging kabangdanan nga makasalà ang iban. ²¹ Ang maayo nga humanon, indì ka magkaon ng karne o mag-inom ng mga ilimnanon o maghuman ning abir ano nga maging kabangdanan nga makasalà ang imo utod. ²² Nganì kung ano man ang ginapatihan mo parti sa ini nga mga butang, dapat ikaw na lang kag ang Dios ang nakakasayod. Malipay ang tawo nga wayà ginagulo ng iya konsinsya sa mga butang nga ginahuman niya kay para sa iya ini hay tamà. ²³ Pero kung nagaduhaduha siya sa iya pagkaon kag ginakaon niya ini, nagakasalà na siya kay ang iya ginahuman hay bukon basi sa iya ginatuuhan. Kasal-anan ang abir ano nga ginahuman ta nga bukon basi sa aton ginatuuhan.