¹ Hayos indì gid ako makapati sa gingbalità sa akon nga igwa dirà sa indo ning nagaiba sa pangaduha nga asawa ng iya tatay. Ini nga pag-iba hay subra pa sa ginahuman ng mga wayà nagatuo sa Dios, kay wayà nganì ninda inà ginahumana. ² Kag abir may naghuman nga tiyad inà nga imoralidad sa indo, nahuman pa nindo nga magpahambog! Wayà kamo nagpangalisod kag dapat kuntà isikway nindo sa indo grupo ang lyaki nga naghuman inà. ^3,4 Bisan wayà ako dirà sa indo sa lawas, ginadumdom ko kamo sa akon tagipusuon. Kag sa pangayan^a ng aton Ginoong Hesus, ginghusgahan ko na ang naghuman inà nga salà. Nganì sa indo pagtipon-tipon, kabiga nindo nga yarà ako kaibahan nindo sa espiritu. Kag sunò sa gahom nga gingtao sa aton ng aton Ginoong Hesus, ⁵ itugyan nindo inà nga tawo kay Satanas agud kastiguhon ang iya lawas para maluwas ang iya espiritu sa adlaw ng paghusga sa tanan nga tawo ng Ginoo.^b

⁶ Bukon maayo nga nagapahambog kamo. Dì ba sayod nindo ang hambayanon nga nagahambay, ‘Ang maisot nga pangpaalsa sa arina hay napapaalsa ang bilog nga arina?’ ⁷ Nganì buy-a nindo ang indo dati nga mga salà pareho sa lumà nga pangpaalsa, agud maging malimpyo kag bag-o kamo. Ang matuod, hilway na kamo sa ini nga pangpaalsa, kay si Kristo hay ginghalad na para sa aton. Pareho siya sa karnero nga ginahalad kung Pista ng Pagligad ng GINOO.^{c 8} Nganì magselebrar kita ng inà nga Pista, kag magkaon ning tinapay nga wayà ning lumà nga pangpaalsa, nga ang gusto hambayon hay talikuran ta na ang aton mga salà kag indì na kita maghuman ning mga malain. Kundì magkabuhì kita nga malimpyo na sa salà kung sa diin sinsero gid ang aton pagsunod sa kamatuuran.

⁹ Ginghambay ko sa akon una nga sulat nga indì kamo magkaibahan sa mga nagahuman ng imoral nga pakipag-relasyon. ¹⁰ Ang gusto ko hambayon, bukon ang mga tawo nga wayà pa makakilaya sa Dios nga mga imoral o mga hakog kag mga tulisan mga nagasamba sa mga dios-diosan. Kay kung sinda tanan indo likawan, kahinangyan maghalin kamo sa ini nga kalibutan. ¹¹ Ang akon gusto hambayon hay adtong mga tawo nga nagapakilaya nga sinda da hay mga kauturan sa Ginoo pero mga imoral, mga hakog, mga nagasamba sa mga dios-diosan, mga nagahambay ning malain sa mga tawo, mga nagabinayong, kag mga tulisan. Indì kamo dapat magkaibahan sa inda abir sa pagkaon.

^12,13 Kung sa bagay ano ang aton labot sa paghusga sa mga wayà nagatuo? Ang Dios lang ang magahukom sa inda. Pero kahinangyan gid nga obserbahan ta kung maayo o malain ang ginahuman ng aton kapareho nga nagatuo, kay nakasulat sa Kasulatan, “Isikway nindo sa indo grupo ang malain nga tawo.”^d