¹ Kung ang isa sa indo hay may reklamo kuntra sa iya kapareho nga nagatuo, basì wayà siya nahuhuyà kag ginadaya pa niya inà sa mga wayà makakilaya sa Dios para husgahan? Basì wayà niya inà ginadaya sa mga nagatuo nga imaw ang mga banal nga tawo ng Dios agud husayon ang problema? ² Dì ba sayod nindo nga sa ulihi nga mga adlaw kita nga mga banal nga tawo ng Dios imaw ang magahusga sa mga tawo sa kalibutan? Nganì kung kamo ang magahusga sa mga tawo sa kalibutan, basì indì nindo kaya maghusay ng tiyad inà kaisot nga butang? ³ Dì ba sayod nindo nga abir nganì ang mga anghel hay aton pagahusgahan? Indì ba nindo kaya nga husayon ang mga butang sa ini nga pagkabuhì? ⁴ Nganì kung may mga kaso kamo sa isa kag isa sa ini nga pagkabuhì, basì ginadaya pa nindo inà sa mga huwis nga wayà nganì ginakilay-a ng mga nagatuo sa Dios? ⁵ Dapat mahuyà kamo! Ano, wayà gid ba dirà sa indo ning mayad nga antigo maghusay ng problema sa indo kapareho nga mga nagatuo? ⁶ Pareho kamo nga mga nagatuo, pero kamo da mismo ang nagainakusahan, kag didto pa mismo sa atubangan ng mga wayà nagatuo.

⁷ Sa indo pag-inakusahan sa korte, kamo mismo ang perdi. Mas maayo pa nga pabay-an na lang nindo ang nagahuman ning malain kag nagapangdayà sa indo. ⁸ Pero ang indo ginahuman, kamo mismo ang nagapangdayà kag nagahuman ning malain abir pa sa indo mga kauturan sa Ginoo. ^9,10 Dì ba sayod nindo nga ang mga tawo nga nagahuman ning malain hay wayà ning lugar sa gingharian ng Dios? Nganì ayaw nindo pagdayaa ang indo kaugalingon! Kay wayà gid ning lugar sa gingharian ng Dios ang mga nagahuman ning imoral nga pakipag-relasyon, ang mga nagasamba sa mga dios-diosan, ang mga nagapangingbabayi o mga nagapanginglyaki, ang mga lyaki nga nagabaligyà ng inda lawas para sa iban nga lyaki, ang mga lyaki nga nagaasawa sa pareho ninda nga lyaki, ang mga miyugpangawat, ang mga hakog, ang mga nagabinayong, ang mga nagahambay ning malain kuntra sa mga tawo, kag ang mga tulisan. ¹¹ Ang iban sa indo hay tiyad ini dati. Pero nalimpyo na kamo sa indo mga salà, ginglain na kamo ng Dios nga maging iya, kag gingdiklara na kamo nga matarong tungod sa pangayan^a ng Ginoong Hesu-Kristo kag tungod sa Espiritu ng aton Dios.

¹² May magahambay, “Puydi ako maghuman ning bisan ano.” Pero ang ginahambay ko, bukon tanan nga mga butang hay mapuslan nindo. Nganì bisan ginatugot sa akon ang maghuman ning abir ano, indì ako magpaulipon sa abir ano nga mga butang. ¹³ May magahambay da, “Ang pagkaon hay ginghuman para sa tiyan kag ang tiyan hay ginghuman para sa pagkaon.” Matuod inà, ugaling magaabot ang adlaw nga ang tiyan kag ang pagkaon hay pagasiraon ng Dios. Pero bukon matuod nga ginghuman ang lawas ng tawo para maghuman ning imoral nga pakipag-relasyon, kundì ginghuman ini para magserbisyo sa Ginoo; kag ang Ginoo imaw ang nagadipara sa lawas. ¹⁴ Kag sa ulihi, ining aton lawas hay buhion liwat ng Dios paagi sa iya gahom, pareho ng ginghuman niya sa aton Ginoo.

¹⁵ Dì ba sayod nindo nga ang aton lawas hay parte ng lawas ni Kristo? Puydi ba nga ang parte ng lawas ni Kristo hay gamiton ta para maging kaparte sa babayi nga nagabaligyà ng iya lawas? Indì gid puydi! ¹⁶ Dì ba sayod nindo nga kung ang lyaki nagaiba sa tiyad ini babayi, sinda nga duha hay maging isa na ka lawas? Kay nakasulat sa Kasulatan parti sa mag-asawa, “Sinda nga duha hay maging isa.”^{b 17} Pero ang nagpakig-isa sa Ginoo hay kaisa na sa iya Espiritu.

¹⁸ Nganì likawi gid nindo ang imoral nga pakipag-relasyon! Ang iban nga mga salà nga ginahuman ng tawo hay indì makaapikto sa lawas ning grabi, pero ang tawo nga nagahuman ng imoralidad hay nagapakasalà kuntra sa iya kaugalingon nga lawas. ¹⁹ Dì ba sayod nindo nga ang indo lawas hay templo ng Espiritu Santo nga gingtao ng Dios, kag siya hay nagaistar sa indo? Nganì ining indo lawas hay bukon indo kundì sa Dios. ²⁰ Kay gingbakay kamo kag bayad na, nganì gamita nindo ang indo lawas para madayaw ang Dios.