¹ Kung parti sa mga butang nga indo gingsulat sa akon: “Maayo kuntà sa lyaki nga indì na mag-ubay.” ² Pero kay madamò ang nagahuman ning imoralidad kag agud malikawan nindo ini, ang kada lyaki hay dapat mag-ubay gid sa iya asawa kag ang kada babayi hay mag-ubay gid sa iya asawa. ³ Kahinangyan tumanon ng lyaki ang iya obligasyon sa iya asawa, kag ang babayi hay dapat da nga tumanon niya ang iya obligasyon sa iya asawa. ⁴ Kay ang lawas ng babayi hay sa iya na asawa, bukon sa iya sarili; kag ang lawas da ng lyaki hay sa iya na asawa, bukon sa iya sarili. ⁵ Nganì indì kamo magpaindì sa isa kag isa sa pag-ubay, puyra lang nga nagkasugot kamo nga mag-asawa nga indì anay mag-ubay sa matag-od lang nga tiyempo, kay gusto nindo nga gamiton ang indo oras para mangamuyò. Pero pagkatapos kahinangyan mag-ubay kamo liwat, basì kung indì kamo makapugong ng indo nababatyagan, kag matintar kamo ni Satanas.

⁶ Ang ginahambay ko hay bukon sugò, kundì ginatugutan ko kamo sa indo gusto. ⁷ Gusto ko kuntà kamo tanan hay maging pareho sa akon nga wayà ning asawa. Pero ang kada isa hay bukon pareho ang pagkatawag sa aton ng Dios: kay may iba nga gingtaw-an ning abilidad nga indì mag-asawa, kag may iba nga wayà.

⁸ Kamo nga wayà pa ning asawa kag kamo mga bayo nga babayi, mas maayo pa kung magpadayon kamo sa pagkabuhì nga isa lang pareho sa akon. ⁹ Pero kung indì na kamo makapugong ng indo nababatyagan, mag-asawa na lang kamo. Kay maayo pa inà kaysa sa mag-antos kamo tungod sa indo madakò nga handom nga may kaubay.

^10,11 Sa mga mag-asawa, imaw ini ang ginasugò mismo ng Ginoo, bukon sa akon: ang asawa nga babayi hay indì dapat magbuyag sa iya asawa, kag ang asawa nga lyaki hay indì da magbuyag sa iya asawa. Pero kung may babayi nga magbuyag sa iya asawa, dapat magpabilin siya nga wayà ning asawa, o magbalik na lang siya sa iya asawa.

¹² Kung parti naman sa iban, imaw ini ang gusto ko ihambay (ini hay sa akon lang, wayà ning may ginghambay ang Ginoo parti diri): kung ang nagatuo nga lyaki may asawa nga wayà nagatuo pero gusto gihapon nga mag-iba sa iya, indì niya dapat pagbuyagan. ¹³ Kag kung ang nagatuo nga babayi hay may asawa nga wayà nagatuo pero gusto gihapon nga mag-iba sa iya, indì da niya dapat pagbuyagan. ¹⁴ Kay ang wayà nagatuo nga asawa nga lyaki hay mapapalapit sa Dios tungod sa iya nagatuo nga asawa; kag ang wayà nagatuo nga asawa nga babayi hay mapapalapit da sa Dios tungod sa iya nagatuo nga asawa. Kay kung indì, patì ang inda mga ongà hay pareho da sa mga ongà ng wayà nagatuo sa Dios. Pero ang matuod, mapapalapit da sinda sa Dios. ¹⁵ Pero kung gusto ng wayà nagatuo nga magbuyag, tuguti. Hilway ka na sa ini nga butang, kay gingtawag kita ng Dios sa malinong nga pagkabuhì. ¹⁶ Kay ikaw nga nagatuo, pauno mo masiguro nga maluwas mo ang imo asawa?

¹⁷ Ugaling lang ang kada isa hay dapat magkabuhì sunò sa kamutangan nga gingtao ng Ginoo sa iya. Dapat magpabilin siya sa iya kamutangan nang siya hay gingtawag ng Dios nga magtuo. Imaw ini ang pagsulundan nga akon ginatudlò sa tanan nga nagatuo. ¹⁸ Halimbawà, kung may lyaki nga napaltak na nang wayà pa siya gingtawag ng Dios, indì na niya pagtilawan nga ilisan pa ang iya kamutangan. Kag kung igwa da ning bukon paltak nang wayà pa siya gingtawag, indì na kahinangyan nga magpapaltak pa siya. ¹⁹ Kay bukon importante kung paltak ang tawo o bukon. Ang importante hay ang pagtuman sa mga sugò ng Dios. ²⁰ Nganì magpabilin ang kada isa sunò sa iya kamutangan nang siya hay gingtawag ng Dios. ²¹ Kung ikaw isa ka ulipon nang gingtawag ng Dios, dì bali. Pero kung may tsansa nga makahilway ka sa pagkaulipon, tinguhaa inà nga tsansa. ²² Kay ang tawo nga ulipon nang gingtawag siya ng Ginoo, niyan hilway na sa panirò ng Ginoo. Kag ang tawo nga bukon ulipon nang siya hay gingtawag, niyan ulipon na ni Kristo. ²³ Gingbakay kamo kag bayad na, nganì indì kamo basta-basta nga magpaulipon lang sa mga tawo. ²⁴ Nganì mga kauturan kay Kristo, magpabilin ang kada isa sa Dios sunò sa iya kamutangan nang gingtawag siya nga magtuo.

²⁵ Kung parti sa mga wayà pa ning asawa, wayà ako ning sugò halin sa Ginoo. Pero bilang tawo nga masaligan tungod sa kaluoy ng Dios, yari ang akon laygay.

²⁶ Tungod sa mga kahugaan niyan, ang akon naiisip hay mas maayo pa kung magpabilin na lang kita sa aton kamutangan. ²⁷ Nganì kung may asawa ka na, ayaw siya pagbuyagi. Kag kung wayà ka ning asawa, ayaw na lang mag-asawa. ²⁸ Pero kung ang lyaki hay mag-asawa gida, bukon ini salà. Kag kung ang dalaga hay mag-asawa, bukon da ini salà. Pero kung mag-asawa kamo, may mga kahugaan sa indo kabuhì. Nagahambay ako nga kuntà makalikaw kamo sa mga kahugaan.

²⁹ Ang gusto ko hambayon, mga kauturan, matag-od na lang ang tiyempo nga nabilin. Nganì tunà niyan, ang mga may asawa dapat magkabuhì nga daw wayà ning asawa. ³⁰ Ang mga nagapangalisod hay dapat magkabuhì nga daw wayà nagapangalisod, kag ang mga nagakalipay magkabuhì nga daw wayà nagakalipay. Ang mga nagapamakay dapat indì magsalig nga magapabilin sa inda ang inda mga gingpamakay. ³¹ Kag ano man ang aton mga nagagamit diri sa kalibutan, dapat indì mawili sa inà nga mga butang. Tungod maduduyà nga daan ang tanan nga butang sa ini nga kalibutan.

³² Gusto ko kuntà nga mahilway kamo sa mga kabayak-on. Ang wayà ning asawa nga lyaki hay wayà ning iban nga ginakabayak-an kundì ang mga butang para sa Ginoo kag kung pauno siya makatao ning kalipay sa iya. ³³ Pero ang lyaki nga may asawa hay nagakabayaka parti sa mga bagay diri sa kalibutan kag kung pauno siya makatao ning kalipay sa iya asawa. ³⁴ Imaw inà nga natungà permi ang iya panghunahunà. Ang mga babayi nga bayo kag ang mga dalaga hay wayà ning iban nga ginakabayak-an kundì ang mga butang para sa Ginoo, kay gusto ninda nga ihalad ang inda bilog nga kabuhì para magserbisyo sa iya. Pero ang babayi nga may asawa hay nagakabayaka parti sa mga bagay diri sa kalibutan kag kung pauno siya makatao ning kalipay sa iya asawa.

³⁵ Ginahambay ko ini para sa indo kaayuhan. Wayà ko kamo ginabawali nga mag-asawa, kundì gusto ko lang nga kaayo-ayo, dibuto kag wayà ning makagulò sa indo pagserbisyo sa Ginoo.

³⁶ Niyan, parti sa magnubyo kag magnubya: kung ginaisip ng lyaki nga bukon tamà ang iya pagtrato sa iya nubya kay indì na siya makapugong ng iya nababatyagan, kag gusto niya mag-asawa; dapat nga magpakasay na sinda. Maayo pa nga magpakasay na lang sinda. Bukon ini salà. ³⁷ Pero kung desidido ang isa ka lyaki nga indì na niya pag-asawahon ang iya nubya, kag para sa iya bukon pa kahinangyan nga mag-asawa, kag mapupunggan pa niya ang iya kaugalingon nga handom, maayo ang iya ginahuman. ³⁸ Niyan maayo kung pangasaw-on ng nubyo ang iya nubya; pero mas maayo pa gid ang indì mag-asawa.

³⁹ Ang babayi hay dapat magapabilin sa iya asawa mintras buhì pa ang iya asawa. Pero kung patay na ang iya asawa puydi na siya mag-asawa liwat sa abir sin-o nga iya nagustuhan nga asawahon. Pero kahinangyan nagatuo ang pilion niya. ⁴⁰ Kung sa akon lang, mas malipayon siya kung indì na siya mag-asawa. Ini hay laygay ko lang, pero nagapati ako nga ang Espiritu ng Dios nga yari sa akon hay imaw ang nagtudlò sa akon.