¹ Niyan, parti naman sa mga pagkaon nga ginghalad sa mga dios-diosan, kung makakaon man kita ini o indì, bisan mahambay naton nga kita tanan hay may nasayuran na, dumdumon ta nga ang nasayuran ng tawo kung kaisa imaw ang ginahalinan ng pagpahambog. Mas importante nga may paghigugmà kita, kay ini hay makapatibay sa iban. ² Ang tawo nga nagahunahunà nga may nasayuran na siya hay nagapakilaya lang nga kuyang pa gid ang dapat niya masayuran. ³ Pero ang tawo nga nagahigugmà sa Dios imaw ang ginakilaya ng Dios nga iya.

⁴ Nganì kung parti sa pagkakaon ng mga pagkaon nga ginghalad sa mga dios-diosan, nakasayod kita nga ang mga dios-diosan sa kalibutan hay bukon matuod, kay may isa lang gid nga Dios. ⁵ Bisan nagahambay ang iban nga may mga dios sa langit kag sa dutà, kag madamò ang ginatawag nga “mga dios” kag “mga ginoo,” ⁶ pero sa aton may isa lang nga Dios, ang aton Amay nga nagahuman ng tanan nga butang, kag nagakabuhì kita para sa iya. Kag may isa lang gid nga Ginoo, si Hesu-Kristo. Paagi sa iya, nahuman ang tanan nga butang kag paagi da sa iya naging ongà kita ng Dios.

⁷ Pero may mga nagatuo nga wayà nasayuri ini. Kag tungod dati anay hay nagasamba sinda sa mga dios-diosan, imaw inà nga hasta niyan kung magkaon sinda ng pagkaon nga ginghalad sa mga dios-diosan, sa inda hunahunà daw kaibahan na sinda nga nagasamba sa mga dios-diosan. Nganì tungod kuyang pa ang inda nasayuran, nakonsinsya sinda, kay para sa inda bukon tamà ang inda ginahuman. ⁸ Kung sa bagay, ang pagkaon hay wayà ning labot sa aton relasyon sa Dios. Wayà ning may maduyà sa aton relasyon sa Dios kung indì kita magkaon ini, kag wayà da ning may madugang kung magkaon kita.

⁹ Pero bisan hilway kamo, mag-andam kay basì kung imaw inà ang maging kabangdanan nga magkasalà ang mga tawo nga maluya ang inda pagtuo. ¹⁰ Halimbawà, may iban nga wayà pa ning nasasayuran, kag ikaw nga may nasayuran na. Nakità niya nga nagakaon sa templo ng mga dios-diosan, indì ba makaingganyo ini sa iya nga magkaon da ng pagkaon nga ginghalad sa mga dios-diosan, bisan sa iya pagkaintindi hay salà inà? ¹¹ Nganì ang imo utod nga maluya ang pagtuo kung sa diin namatay si Kristo hay madidisgrasya tungod sa imo kamayad. ¹² Sa ini nga paagi nakasalà ka kay Kristo, kay nakasalà ka sa imo utod nga maluya ang pagtuo, sa imo pagkaingganyo sa iya sa paghuman ng butang nga kuntra sa iya konsinsya. ¹³ Nganì para sa akon, kung ang akon ginakaon maging kabangdanan nga magkasalà ang akon utod, indì na lang gid ako magkaon ning karne hasta san-o, agud indì magkasalà ang akon utod tungod sa akon.