¹ Nganì tinguhai gid nindo ang paghigugmà, pero handuma da nindo nga mataw-an kamo ning mga abilidad halin sa Espiritu Santo, labi na gid ang pagbalità ng mensahe halin sa Dios. ² Ang tawo nga nagahambay sa iban nga lingguahe nga wayà niya nasayuri hay wayà nagapakig-istorya sa mga tawo kundì sa Dios, tungod ang mga tawo hay indì makaintindi sa iya. Ang Espiritu Santo imaw ang nakapahambay sa iya ng mga butang nga indì makaintindi ang mga tawo. ³ Pero ang nagabalità ng mensahe halin sa Dios hay nagahambay sa mga tawo agud makapalig-on sa inda pagtuo, makapakusog sa inda tagipuson, kag makalipay sa inda kaugalingon. ⁴ Ang tawo nga nagahambay sa iban nga lingguahe nga wayà niya nasayuri hay nagapalig-on ng iya kaugalingon, pero ang nagabalità ng mensahe halin sa Dios hay nagapalig-on sa mga nagatuo. ⁵ Gusto ko kuntà kamo tanan hay makahambay sa iban nga lingguahe nga wayà nasayuri, pero mas maayo gid kung makabalità kamo ng mensahe halin sa Dios. Tungod ang tawo nga nagabalità ng mensahe halin sa Dios hay mas importante pa kaysa sa tawo nga nagahambay sa iban nga lingguahe, puyra lang kung isaylo da niya ang gusto hambayon ng iya ginahambay agud mapalig-on ang mga nagatuo.

⁶ Niyan, mga kauturan, ano baya ang mapupuslan nindo kung magkarà ako dirà sa indo kag maghambay sa iban nga lingguahe nga indì nindo maintindihan? Siyempre wayà gid! Kahinangyan may ibalità ako sa indo sa gingpasayod ng Dios sa akon, o may iisplikar ako nga kamayad ng Dios, o may ibalità ako nga mensahe halin sa Dios, o may itudlò ako nga hambay ng Dios.

⁷ Bisan sa halimbawà ng mga instrumento nga wayà ning kabuhì pareho sa plauta o alpa, kung bukon klaro ang pagpatunog ng mga nota, pauno masayuran ng nagapamatì kung ano nga kanta ang ginapatunog? ⁸ Kag bisan sa miyugtrumpeta ng mga sundalo, kung bukon klaro ang pagpatunog, wayà ning may magpreparar para sa inaway. ⁹ Imaw da ini sa indo, kung nagahambay ka sa iban nga lingguahe nga indì maintindihan, pauno ang pagkaintindi ng nagapamatì ng imo ginahambay? Wayà gid ning puyos ang imo ginahambay. ¹⁰ Madamò nga mga lingguahe diri sa kalibutan kag ang kada isa hay may gusto hambayon. ¹¹ Pero kung indì ko maintindihan ang ginahambay ng isa ka tawo kag indì da niya maintindihan ang akon ginahambay, magiging daw estranghiro kami, kag indì kami mapupuslan ng kada isa. ¹² Nganì tungod nagahandom kamo nga makabaton ning mga abilidad nga halin sa Espiritu Santo, handuma gid nindo nga mabaton ang mga abilidad nga makapalig-on sa mga nagatuo.

¹³ Nganì ang tawo nga nagahambay sa iban nga lingguahe nga wayà niya nasayuri dapat magpangamuyò nga taw-an da siya ng abilidad nga isaylo kung ano ang gusto hambayon ng iya ginahambay. ¹⁴ Kay kung nagapangamuyò ako sa iban nga lingguahe nga wayà ko nasayuri, bisan matuod nagapangamuyò ang akon espiritu, pero indì ini mapupuslan ng akon paghunahunà. ¹⁵ Nganì ano ang akon dapat humanon? Magapangamuyò o magakanta ako sa akon espiritu, kag magapangamuyò o magakanta da ako nga maintindihan ng akon hunahunà. ¹⁶ Kung magpasalamat ka sa Dios sa imo espiritu lang, kag indì maintindihan ng iban nga wayà ng abilidad, pauno ang pagsiling ninda “matuod gid” sa imo pagpasalamat? Kay wayà nganì sinda makaintindi kung ano ang imo ginahambay. ¹⁷ Bisan ang imo pagpasalamat sa Dios hay kaayo-ayo, pero ang inda pagtuo hay indì mapalig-on.

¹⁸ Nagapasalamat ako sa Dios nga wayà ning may makalabaw sa akon kung parti sa paghambay ning iban nga mga lingguahe nga wayà nasayuri. ¹⁹ Pero sa mga pagtipon-tipon ng mga nagatuo, mas maayo pa maghambay ako ning lima lang ka hambay nga maintindihan, agud matudluan ko sinda, kaysa sa maghambay ako ng libo-libo ka hambay sa lingguahe nga indì maintindihan.

²⁰ Mga kauturan, indì ko gusto nga maghunahunà kamo pareho ng ongà. Siyempre, kung parti sa malain, maging pareho kamo sa ongà nga wayà ning gusto sa malain. Pero sa indo hunahunà, maging maguyang kamo. ²¹ Nganì isipa ang nakasulat sa Kasulatan, naghambay ang Ginoo,

²³ Nganì, mintras magtipon-tipon ang mga nagatuo kag kung tanan kamo maghambay sa mga lingguahe nga wayà nasayuri, may mga nagatambong nga wayà pa nagatuo o wayà nakasayod kung ano ang indo ginahuman, indì ba arà sinda naghambay nga mga buang kamo? ²⁴ Pero kung tanan kamo magbalità ng mensahe halin sa Dios kag may nagatambong nga wayà pa nagatuo o wayà nakasayod kung ano ang indo ginahuman, makilaya niya nga siya galì hay makasasalà kag pagahugashan siya tungod sa tanan nga iya nabatian. ²⁵ Mabibisto patì ang mga sekrito nga iya ginahunahunà, pagkatapos magaluhod siya nga magahinuysoy kag magasamba sa Dios. Kag makahambay siya nga ang Dios hay yarà gid sa indo!

²⁶ Nganì, mga kauturan, imaw ini ang dapat nindo humanon kung magtipon-tipon kamo: ang iban magkanta, ang iban magtudlò, ang iban magbalità ng gingpasayod ng Dios sa iya, ang iban maghambay sa lingguahe nga wayà nasayuri, kag ang iban hay magsaylo ng adto nga lingguahe. Kag ang tanan nga ginahuman nindo sa indo pagtipon-tipon, himua nindo para sa pagpalig-on sa mga nagatuo. ²⁷ Kung igwa ning mga maghambay sa lingguahe nga wayà nasayuri, dapat duha lang o tuyo ang maghambay, pero dapat hay ilis-ilis, kag kahinangyan igwa ning mag-saylo ng adto nga lingguahe. ²⁸ Pero kung wayà gid ning may makasaylo, dapat maghipos sinda sa pagtipon-tipon kag maghambay na lang sa inda kaugalingon kag sa Dios. ²⁹ Kung igwa sa indo ning may abilidad sa pagbalità ng mensahe halin sa Dios, tuguti nindo nga maghambay ang duha o tuyo. Kag ang iban hay magpamatì kag isipon gid maayo kung halin sa Dios ang inda ginahambay. ³⁰ Niyan, kung may inughambay nga gingpasayod ng Dios sa isa sa mga nagapungkò didto, dapat maghipos ang una nga nagahambay agud makahambay da ang iba. ³¹ Sa ini nga paagi, tanan kamo hay makailis-ilis balità ng mensahe halin sa Dios, agud ang tanan hay makatuon kag makapakusog sa inda tagipuson. ³² Ang propeta^b nga nagabaton ng ini nga abilidad hay dapat magpugong sa paggamit ng iya abilidad. ³³ Kay ang Dios wayà nagatao ning kagulo kundì katawhayan.

Kung parti sa mga babayi, himua nindo ang ginahuman ng mga banal nga tawo ng Dios sa tanan nga iglesya. ³⁴ Dapat maghipos ang mga babayi sa indo mga pagtipon-tipon kay wayà sinda ginatuguti nga maghambay. Dapat magpasakop sinda sa otoridad pareho sa nakasulat sa kasuguan ng Judio. ³⁵ Kag kung ang babayi hay may gusto nga matun-an, maghuyat siya nga makabalik sa inda, kag didto sa inda bayay siya makapangutana sa iya asawa, tungod makahuhuyà nga maghambay ang babayi sa pagtipon-tipon ng mga nagatuo.

³⁶ Ano, nagahunahunà ba kamo nga ang hambay ng Dios naghalin sa indo? O kamo ba lang ang nakabaton ini? ³⁷ Kung igwa sa indo nagahunahunà nga siya hay propeta o ginatuytuyan siya ng Espiritu Santo, dapat kilayahon niya nga ang akon mga ginasulat sa indo hay sugò mismo ng Ginoo. ³⁸ Kag kung igwa ning wayà nagakilaya sa ining akon ginahambay, indì siya pagkilay-on!

³⁹ Nganì mga kauturan ko kay Kristo, maghandom gid kamo nga makabalità ning mensahe halin sa Dios, kag indì nindo pagpunggi ang iban nga maghambay sa mga lingguahe nga wayà nasayuri. ⁴⁰ Pero himua nindo ang tanan sa tamà kag may kaayusan nga paagi.