¹ Ako si Pablo nga naging apostol^a ni Kristo Hesus sunò sa kabubut-on ng Dios. Ako kag si Timoteo nga aton utod kay Kristo hay nagapangamusta sa indo nga nagatuo sa Dios dirà sa Corinto, kag sa tanan nga banal nga tawo ng Dios dirà sa bilog nga probinsya ng Acaya.

² Kabay pa nga mabaton nindo ang grasya kag katawhayan halin sa Dios nga aton Amay kag sa Ginoong Hesu-Kristo.

³ Dayawon ang Dios, nga imaw ang Dios ng aton Ginoong Hesu-Kristo kag iya da Amay. Maluluy-on siya nga Amay, kag Dios nga permi nagadamay sa aton. ⁴ Ginadamayan niya kita sa tanan ta nga mga kahugaan, agud makadamay da kita sa mga may iba-iba nga kahugaan, paagi sa pagdamay nga nabaton naton halin sa iya. ⁵ Kay kung mauno kadamò ang aton naagihan nga mga kasakit sa aton pakig-isa kay Kristo, imaw da nga pagdamay ang aton nababaton paagi sa iya. ⁶ Niyan kung nagaagi man kami sa mga kahugaan, ini hay para kamo madamayan kag maluwas. Kag kung ginadamayan kami, ini hay para da madamayan kamo agud matiis nindo ang mga kasakit nga pareho ng amon ginatiis. ⁷ Nganì matibay ang amon paglaom parti sa indo, kay sayod namon nga kung pauno kamo nagatiis ng mga kasakit pareho sa amon, ginadamayan da kamo ng Dios pareho sa amon.

⁸ Mga kauturan kay Kristo, gusto namon nga masayuran nindo ang natabò sa amon nga kahugaan sa Asya,^b kay ang amon naagihan hay subra-subra gid nga kahugà nga daw indì na gid kaya ng amon kusog, hasta nga nabuy-an na gid kami ning paglaom nga mabuhì pa. ⁹ Kalaom nganì namon imaw na adto ang katapusan ng amon kabuhì. Pero natabò adto agud indì kami magsalig sa amon kaugalingon, kundì sa Dios nga imaw ang nagabuhì liwat sa mga patay. ¹⁰ Gingtabangan niya kami sa makahiyadlok nga kamatayon, kag padayon nga pagaluwason. Siya lang gid ang amon ginalauman nga imaw gihapon ang magatabang sa amon. ¹¹ Paagi sa bulig ng indo mga pangamuyò, mababaton namon ang pagpakamaayo halin sa Dios bilang sabat sa madamò nga nagapangamuyò, agud madamò da ang magapasalamat sa iya para sa amon.

¹² Imaw ini ang amon ginapakadakò: ginapamatuuran ng amon konsinsya nga paagi sa bulig ng Dios, ang amon pagkabuhì hay matarong kag wayà gid ning kasawayan parti sa amon mga motibo sa tanan nga tawo, kag labi na gid sa indo. Nahuman namon ini paagi sa pagpakamaayo ng Dios kag bukon sa amon lawasnon nga kamayad. ^13,14 Wayà kami nagasulat ning mga butang nga wayà nindo maintindihi mintras ginabasa ini. Abir indì pa nindo kami maintindihan, nagalaom ako nga magaabot ang tiyempo nga maiintindihan gid nindo kami ning maayo, agud sa adlaw ng pag-abot ng aton Ginoong Hesus, maipahambog nindo kami kag kamo hay maipahambog da namon.

¹⁵ Kag tungod sigurado ako nga naiintindihan nindo ako, nagplano ako dati nga magbisita sa indo, agud mabaton nindo ang isa pa gid nga pagpakamaayo ng akon duha ka beses nga pagbisita. ¹⁶ Gusto ko nga maagi anay dirà sa indo pag magkadto ako sa probinsya ng Macedonia, kag sa akon pagbalik maagi ako liwat dirà, agud mabuligan naman nindo ako sa akon pagkadto sa Judea. ¹⁷ Imaw kuntà adto ang akon plano. Pero tungod wayà ini madayon, kalaom ba nindo hay indì masaligan ang akon ginahambay? Basì mag-isip kamo nga pareho ako sa iban nga tawo diri sa kalibutan nga ang inda ginaplano hay ang para lang gid sa inda pangsarili nga kaayuhan? Nagahambay sinda “Huo,” pero adto galì “Indì.” ¹⁸ Pero kung pauno nga ang Dios hay masaligan, masaligan da nindo ang amon mensahe sa indo. Bukon ini “Huo,” pero pagkatapos hay “Indì.” ¹⁹ Ang Ongà ng Dios nga si Hesu-Kristo, nga amon ginawali sa indo nina Silas kag Timoteo, hay bukon “Huo” pero pagkatapos hay “Indì.” Siya hay masaligan kag paghumanon gid niya ang iya gingpangakò. ²⁰ Tungod kay Kristo, natuman ang tanan nga gingpangakò ng Dios. Nganì makahambay kita ng “matuod gid” paagi sa iya para sa kahimayaan ng Dios. ²¹ Ang Dios imaw ang nagapalig-on sa amon kaibahan kamo sa pakig-isa kay Kristo. Gingpilì niya kita para magserbisyo sa iya. ²² Gingbutang niya ang Espiritu Santo sa aton mga tagipusuon bilang tatak nga sa iya na kita, kung sa diin ini ang katibayan nga pagabatunon ta ang iya mga gingpangakò sa aton.

²³ Testigo ko ang Dios, nga nagabalità ako ning matuod kung wayà ako nagkarà sa indo sa Corinto, agud malikawan ko nga disiplinahon kamo. ²⁴ Wayà namon ginadiktahe ang parti sa indo pagtuo, kay malig-on na da kamo sa pagtuo. Gusto lang kuntà namon nga buligan kamo agud magiging malipayon kamo.