¹ Niyan nagdisisyon ako nga indì ako magkarà dirà kung magatao lang da ako liwat sa indo ning kalisod. ² Kay kung ako ang magiging rason ng paglain ng indo buot liwat, sin-o na lang ang magatao sa akon ning kalipay? Wayà na! Kay kamo lang ang makatao ning kalipay sa akon nga nataw-an ko ning kalisod nang una. ³ Nganì nagsulat anay ako sa indo, agud kung magkarà ako dirà, indì ako mapalisod ng mga tawo nga imaw kuntà ang dapat magtao ning kalipay sa akon. Kag nagapati ako sa indo tanan nga kung malipay ako, magiging malipay da kamo tanan. ⁴ Pagsulat ko dati sa indo, dakò gid ang akon kahugaan kag kalisod, nganì ako hay napatangis gid. Indì ko gusto nga maglain ang indo mga buot, kundì gusto ko lang nga masayuran nindo nga palanggà ko gid kamo.

⁵ Niyan, igwa dirà nakatao ning kalisod, bukon lang ako ang iya gingtaw-an ning kalisod, kundì kamo da tanan hay nalisod abir pauno. Ginghambay ko nga abir pauno kay indì ko gusto nga magpanunubra ini. ⁶ Bastanti na ang parusa nga gingtao sa iya ng kadamuan sa indo. ⁷ Pero niyan patawara nindo siya kag damayan, kay basì kung maapektuhan na gid siya sa tudo nga kalisod. ⁸ Nganì nagapangabay ako sa indo nga ipakità nindo sa iya nga ginapalanggà gihapon nindo siya. ⁹ Imaw ini ang rason ng pagsulat ko sa indo, kay gusto ko masayuran kung masaligan ba kamo sa pagtuman ng tanan nga akon ginahambay sa indo. ¹⁰ Kung ginapatawad nindo ang tawo nga nakasalà, gingpatawad ko na da siya. Kay kung may nakahuman ning salà sa akon, gingpatawad ko na siya sa presinsya ni Kristo para sa indo kaayuhan. ¹¹ Dapat naton ini humanon agud indì kita madayà ni Satanas, kay nasayuran ta kung ano ang iya malain nga mga plano.

¹² Pag-abot ko didto sa siyudad ng Troas agud magpasayod ng Maayo nga Balità parti kay Kristo, nakità ko nga gingpreparar na ng Ginoo ang inda mga tagipusuon para magpamatì sa akon. ¹³ Pero indì ako mahimunong kay wayà didto si Tito nga akon utod kay Kristo. Nganì nagpamuhon ako sa mga nagatuo didto kag nagkadto sa probinsya ng Macedonia.

¹⁴ Salamat sa Dios, permi niya kita ginaparada sa pagdaog ni Kristo tungod sa aton pakig-isa sa iya. Ginagamit niya kami para ipakilaya siya sa mga tawo abir diin nga lugar, kag ining amon pagpasayod hay pareho sa pahumot. ¹⁵ Kay pareho kami ng mahumot nga halad ni Kristo sa Dios nga mahumutan ng mga tawo nga nagakaluwas, kag patì ng mga nagakamatay espiritwal.^{a 16} Sa mga tawo nga nagakamatay, kami nga nagapasayod ng kamatuuran hay pareho ng mabahò nga nagadaya ning kamatayon; pero sa mga tawo nga nagakaluwas, pareho kami ng mahumot nga nagadaya ning kabuhì. Kung tiyad ini, sin-o ang makakaya sa ini nga trabaho? ¹⁷ Pero kami ang makakaya tungod sa Dios. Bukon kami pareho ng iban nga ginawali ang hambay ng Dios agud makakwarta. Pero kami hay sinsero sa pagwali nga may otoridad ni Kristo. Kag sayod namon nga nagasirò ang Dios nga nagsugò sa amon mintras nagawali kami.