¹ Kalaom ba nindo hay ginadayaw na naman namon ang amon kaugalingon? Bukon kami pareho sa iban nga nagakahinangyan pa ning mga sulat ng rekomendasyon para sa indo o halin sa indo, agud batunon sinda. ² Kung sa bagay, kamo mismo hay imaw ang amon sulat ng rekomendasyon tungod sayod gid namon sa amon mga tagipusuon ang indo pagkabuhì. Kag ini hay pareho sa sulat nga nasasayuran kag nababasa ng kada isa. ³ Klaro nga paagi sa indo pagkabuhì, kamo hay pareho ng sulat ni Kristo nga gingsulat paagi sa amon. Ang ginggamit sa pagsulat hay bukon sa tintà kundì sa Espiritu ng Dios nga buhì, kag bukon da gingsulat sa mga bato nga pantay kundì sa mga tagipusuon ng tawo.

⁴ Nahahambay namon ini nga may kasiguraduhan tungod sa amon pagsalig sa Dios paagi sa amon relasyon kay Kristo. ⁵ Kay kung sa amon lang kaugalingon, wayà gid kami ning kakayahan sa ini nga trabaho, pero ginataw-an kami ng Dios ning abilidad. ⁶ Siya gid ang nagtao sa amon ning kakayahan bilang mga miyugserbisyo nga nagatudlò sa bag-o nga kasugtanan nga iya ginghuman, agud ang mga tawo hay makapalapit sa iya. Ini hay bukon sa sulat, kundì paagi sa Espiritu Santo. Kay ang resulta ng nakasulat hay parusa nga kamatayon, pero ang sa Espiritu hay nagatao ning kabuhì.

^7 aNang gingtao ng Dios kay Moises ang Kasuguan nga iya gingpasulat sa mga bato nga pantay, ang mga Israelita hay indì makasirò sa hitsura ni Moises kay ginasilawan gid sinda. (Pero adtong himayà nga kahayag sa iya hitsura hay amat-amat nga naduduyà.) Niyan kung gingpakità ng Dios ang iya himayà nang gingtao niya ang Kasuguan nga nagaresulta ning kamatayon, ⁸ mas subra pa diri ang iya ipakità nga himayà nga kahayag kung ang Espiritu Santo na ang maghikot. ⁹ Kay kung mahimayaon ang naitao ng Kasuguan nga gahusga ning kamatayon, dì ba mas subra pa gid nga mahimayaon ang maitatao ng bag-o nga kasugtanan nga ang resulta hay pagpakamatarong sa tawo! ¹⁰ Sa matuod lang, ang himayà ng lumà nga kasugtanan hay bukon na mahayag nga siruon tungod mas mahayag ining bag-o nga kasugtanan. ¹¹ Kay kung may himayà nga kahayag ang gingpakità dati, nga amat-amat naduduyà, mas subra pa nga himayà ang iya ginapakità sa ining bag-o nga paagi nga nagapadayon abir san-o!

¹² Kag tungod imaw ini ang amon ginalauman, nganì wayà namon ginatagua ang abir ano nang magbalità kami ng mensahe halin sa Dios. ¹³ Bukon kami pareho sa ginghuman ni Moises nga nagtabon ning bilo sa iya hitsura, agud indì makità ng iya mga kapareho nga Israelita ang amat-amat nga naduduyà nga kahayag sa iya hitsura. ¹⁴ Sa matuod lang, wayà sinda makaintindi ning maayo sa gusto hambayon ng lumà nga kasugtanan kay matugas ang inda uyo. Hasta nganì niyan nga ginasulat ko ini, daw nagatabon gihapon ang akon mga kasimanwa ning bilo pag ginapamatian ang lumà nga kasugtanan. Mabubuoy lang ini nga tabon pag nagapakig-isa na ang isa ka tawo kay Kristo. ¹⁵ Huo, hasta nganì niyan pag ginapamatian ninda ang mga gingpasulat ng Dios kay Moises, indì sinda makaintindi kay daw may bilo nga nagatabon sa inda mga hunahunà. ¹⁶ Pero ang bilo hay mabubuoy pag magpalapit ang tawo sa Ginoo. ¹⁷ Niyan, ang Ginoo nga ginamitlang diri hay ang Espiritu Santo, kag ang Espiritu ng Ginoo imaw ang nagatao ning kahilwayan sa tawo. ¹⁸ Nganì, tanan kita, nabuoy na ang nagatabon sa aton hunahunà, nakikità naton ang himayà ng aton Ginoo. Kag inà nga himayà nga halin sa Ginoo, imaw ang Espiritu Santo, kung sa diin imaw ang nagapadayon sa pagbag-o sa aton, para mas labi pa nga magiging kapareho kita sa iya nga mahimayaon gid!