¹ Tungod sa kaluoy ng Dios, gingpilì niya kami para magbalità ng mensahe halin sa iya, nganì wayà kami mahadlok nga ibalità ini. ² Gingsikway namon ang makahuhuyà nga ginghuman sa sekrito. Wayà kami nagapangdayà sa mga tawo kag wayà da namon ginaliwat ang gusto hambayon ng hambay ng Dios. Nasayuran ng mga tawo nga klaro gid nga bukon sa sekrito ang amon pagbalità ng kamatuuran, kag sayod da ini ng Dios. ³ Pero kung indì maintindihan ang Maayo nga Balità nga amon ginaisplikar, indì lang ini maintindihan ng mga tawo nga nagakamatay espiritwal. ⁴ Indì sinda magtuo kay gingtabunan ang inda hunahunà ni Satanas nga imaw ang dios ng ini nga kalibutan. Gingtabunan niya ini agud indì sinda mahayagan ng Maayo nga Balità nga mahimayaon parti kay Kristo nga imaw gid ang kapareho ng Dios. ⁵ Ang amon ginawali hay bukon ang amon kaugalingon kundì si Hesu-Kristo bilang Ginoo. Nagaserbisyo kami sa indo para kay Hesus. ⁶ Ang Dios nga naghambay, “Halin sa kaduyom ang kahayag hay magasiga,” imaw da ang nagtao ning kahayag sa amon mga hunahunà agud maintindihan namon kung ano ang iya himayà nga gingpakità paagi sa hitsura ni Hesu-Kristo.

⁷ Kami hay pareho lang gid sa tibod nga baratuhon nga gingbutangan ng ining mamahayon nga butang, agud masayuran ng mga tawo nga ang gahom nga indì mapantayan nga yari sa amon mga lawas nga maluya hay bukon halin sa amon, kundì sa Dios. ⁸ Sa amon kabuhì, madamò nga kahugaan ang amon naagihan, pero wayà gid kami nadadaog. Kung kaisa, indì namon masayuran kung ano ang humanon, pero wayà kami naduduyai ning paglaom. ⁹ Madamò nga tawo ang nagapasakit sa namon, pero wayà gid kami pagpabay-i ng Dios. Matuod nga kadamò ang nagapangbalda ning subra sa amon, pero buhì pa gihapon kami. ¹⁰ Permi kami nabutang sa peligro ng kamatayon pareho ng natabò kay Hesus, agud paagi sa amon lawas, makità ng tanan ang kabuhì niya. ¹¹ Ang amon kabuhì hay permi sa peligro ng kamatayon tungod sa amon pagserbisyo kay Hesus, agud makità ng tanan nga siya hay buhì kay paagi sa iya bulig kita nga may lawas nga may kamatayon hay buhì gihapon. ¹² Nganì mintras kami hay permi sa peligro ng kamatayon tungod sa pagserbisyo kay Hesus, ang resulta hay nagakaigwa naman kamo ning kabuhì nga wayà katapusan.

¹³ Tungod igwa kami ning pagtuo nga pareho ng nakasulat sa Kasulatan, “Ako hay nagtuo, nganì naghambay ako,”^a imaw da ini ang amon padayon nga ginahuman, kami hay nagatuo sa Dios nganì ginahambay namon kung ano ang amon pagtuo. ¹⁴ Kay nasayuran namon nga ang Dios nga nagbanhaw sa Ginoong Hesus imaw da ang magabuhì liwat sa amon, pareho ng iya pagbanhaw kay Hesus, kag kami kaibahan kamo hay pagatipunon ng Dios sa iya atubangan. ¹⁵ Ang tanan namon nga pag-antos hay para sa indo kaayuhan, agud mintras nagadamò ang mga tawo nga nagabaton sa pagpakamaayo ng Dios, magadamò da ang magapasalamat, kag ang resulta hay madayaw ang Dios.

¹⁶ Nganì wayà kami mahadlok sa pagserbisyo sa Dios. Abir ining amon lawas hay nagaamat-amat pangluya, ang amon espiritu hay nagapadayon nga nagakusog adlaw-adlaw. ¹⁷ Ang amon mga kahugaan niyan hay temporaryo lang kag bukon ini mabug-at kung ikumpara sa mababaton nga mga bayos sa paabuton. Tungod sa amon mga pag-antos, ginatagana ng Dios para sa amon ang kaayo-ayo gid nga himayà nga wayà katapusan, kag wayà gid ini ning kapareho. ¹⁸ Nganì wayà namon ginapalabiha ang mga butang nga amon nakikità diri sa kalibutan, kundì ang ginapalabi namon hay ang mga butang nga indì makità. Kay ang mga butang nga nakikità hay nagaagi lang, pero ang mga butang nga indì makità hay magapadayon abir san-o.