¹ Ining aton dutan-on nga lawas hay pareho sa bayay nga aton ginaistaran. Sayod naton nga pag namatay ini nga lawas nga pareho sa bayay nga nagubà, may itatao ang Dios sa aton nga mas matibay nga bayay sa langit nga indì na gid magubà. Ini nga langitnon nga lawas hay bukon himò ng tawo kundì ng Dios. ² Sa niyan, nagaagunta kita sa ining aton dutan-on nga lawas kay ginahandom naton nga mailisan na ng langitnon nga lawas pareho ng bag-o nga barò. ³ Imaw ini ang amon gusto kay kung mailisan na ang dutan-on nga lawas, bukon na kita pareho sa nakauba kay bukon kita espiritu lang nga wayà lawas. ⁴ Mintras yari pa kita nagaistar sa ini nga lawas, nagaagunta kita tungod sa kabudlay. Indì nga gusto ta nga mamatay^a na, kundì gusto ta nga mailisan ng lawas nga langitnon, agud ining lawas nga may kamatayon hay mailisan ng bag-o nga lawas nga mabubuhì hasta san-o. ⁵ Ang Dios ang nagpreparar sa aton agud mabaton ta ining bag-o nga lawas. Kag gingtao niya ang Espiritu Santo sa aton agud masiguro ta nga ini hay humanon gid niya sa aton.

⁶ Nganì permi nga pakusugon ang aton tagipusuon abir sayod ta nga mintras nagakabuhì pa kita diri sa kalibutan, bukon pa kita kaibahan ng Ginoo. ⁷ Kay sa niyan nagakabuhì kita sa pagtuo kag bukon sunò sa aton nakikità. ⁸ Sigurado gid kami, kag gusto na kuntà namon bayaan ini nga lawas kag makaibahan ang Ginoo. ⁹ Nganì nagdisisyon na kami nga makalipay sa Dios, abir yari pa kami o yadto na sa iya. ¹⁰ Kay tanan kita hay kahinangyan gid mag-atubang kay Kristo kag ang kada butang parti sa aton hay masasayuran gid agud pagahusgahan. Kag ang kada isa sa aton hay magabaton ning bayos sunò sa aton ginghuman, maayo man o malain, nang nagakabuhì pa kita diri sa kalibutan.

¹¹ Nganì tungod dapat lang kami magtahod sa Ginoo bilang magahusga sa tanan nga tawo, ginatinguhà namon nga kumbensihon ang mga tawo nga magtuo sa iya. Nasayuran ng Dios ang amon pagkatawo, kag nagasalig ako nga ini hay sayod da nindo. ¹² Bukon ini pagpakadakò liwat ng amon kaugalingon, kundì gusto lang namon nga mataw-an kamo ning rason nga makapahambog parti sa amon, agud may isabat da kamo sa mga tawo nga nagapahambog ng mga butang nga nakikità ng mga mata kag bukon sa tagipusuon. ¹³ Kung daw buang kami, ini hay para sa Dios; kag kung maayo ang amon panghunahunà, inà hay para sa indo. ¹⁴ Tungod sa paghigugmà ni Kristo nga nagagahom sa amon, indì puydi nga indì namon paghumanon ang iya gusto. Kay sayod namon nga si Kristo hay namatay para sa tanan, nganì ang tanan makakabig na nga patay.^{b 15} Namatay siya para sa tanan, agud nga ang mga tawo nga gingtaw-an ning bag-o nga kabuhì hay indì na magkabuhì para sa inda kaugalingon, kundì para sa iya nga namatay kag nabanhaw para sa inda.

¹⁶ Nganì niyan, wayà na kami nagasirò sa tawo pareho ng pagsirò ng tawo nga wayà makakilaya sa Dios. Nang una, tiyad inà ang amon pagkakilaya kay Kristo. Pero niyan hay bukon na. ¹⁷ Ang abir sin-o nga nagpakig-isa kay Kristo hay bag-o na nga tinuga. Wayà na ang iya dati nga pagkatawo, kundì siya hay bag-o na. ¹⁸ Ang Dios mismo ang naghuman ini tanan! Gingsugò niya si Kristo agud magkaigwa kami ning bag-o nga relasyon sa iya. Kag gingtaw-an niya kami ning trabaho para ipasayod nga ginapabalik na niya ang mga tawo sa iya. ¹⁹ Imaw ini ang amon ginapasayod: Ginapabalik na ng Dios ang mga tawo sa iya paagi kay Kristo. Wayà na niya ginaisipa ang inda mga salà. Kag gingsalig niya ining kaayo-ayo nga balità sa amon.

²⁰ Nganì nagabalità kami bilang mga gingsugò para kay Kristo. Kag paagi sa amon, nagapangabay ang Dios sa indo para kay Kristo nga magbalik na kamo sa iya! ²¹ Si Kristo hay wayà gid ning salà, pero siya imaw ang gingparusahan ng Dios tungod sa aton mga salà, agud mabilang kita nga matarong ng Dios kay magpakig-isa kita kay Kristo.