¹ Tungod kami hay kaibahan ng Dios nga nagatrabaho, nagapangabay gid kami sa indo nga indì nindo pag-ibaliwayà ang pagpakamaayo nga indo nabaton sa iya. ² Kay hambay niya,

³ Wayà kami nagahuman ng abir ano nga magiging kabangdanan para maglain ang buot ng mga tawo, agud wayà ning malain nga maihambay sa amon pagserbisyo sa Dios. ⁴ Kundì sa tanan namon nga ginahuman, ginapakità namon nga kami hay mga miyugserbisyo ng Dios. Ginatiis gid namon ang madamò nga mga kaguluhan, kahugaan kag kasakit. ⁵ Naagihan namon nga kami hay gingsinumbag, gingpriniso, ging-inatake gid kami ng mga tawo. Naagihan da namon ang subra gid nga trabaho, kung kaisa wayà kami ning tuyog kag wayà ning makaon. ⁶ Ginapakità namon nga kami hay miyugserbisyo ng Dios paagi sa amon malimpyo nga pagkabuhì kag kamayad. Naging mainantuson kami sa tanan nga butang kag mabinuligon sa amon isigkatawo. Nasayuran da ng mga tawo nga ang Espiritu Santo hay imaw ang nagatuytoy sa amon, kag ang amon paghigugmà sa amon isigkatawo hay halin gid sa amon tagipusuon. ⁷ Wayà kami ning iban nga ginawali kundì ang kamatuuran, kag ginabuligan kami ng Dios paagi sa iya gahom. Ang amon pagkabuhì nga matarong hay imaw ang amon mga armas sa pag-ataki sa amon kaaway kag imaw da ang amon panagang para sa amon kaugalingon. ⁸ Bilang mga miyugserbisyo ng Dios, kung kaisa ginadayaw kami ng mga tawo kag kung kaisa ginainsulto. May mga tawo nga nagahambay ning malain parti sa amon, pero igwa da ning may nagahambay ning maayo. May nagahambay nga kami kuno hay mga bakakon, pero ang tanan namon nga ginabalità hay matuod gid. ⁹ Wayà kami ginakilay-a ng iban nga nagatuo dirà, pero sa matuod lang, ginakilaya kami ng mga nagatuo abir diin. Ginaisip ng iba mamamatay na kami, pero buhì pa da gihapon. Ginadisiplinà kami ng Dios pero wayà kami ginapatay. ¹⁰ Sa mga natatabò sa amon, kami hay permi gihapon malipay abir sa tungà ng mga kalisod. Pubre pero madamò ang amon ginataw-an ning espiritwal nga manggad. Parti sa mga bagay diri sa kalibutan, wayà kami ning makabig nga amon, pero sa matuod lang, kami ang tag-iya ng tanan nga bagay.

¹¹ Mga pinalanggà ko nga taga-Corinto, wayà kami ning may ginatagò sa amon paghambay sa indo, kay dakò gid ang amon paghigugmà sa indo. ¹² Wayà kami nagkuyang sa amon paghigugmà sa indo, kundì kamo ang nagkuyang ng indo paghigugmà sa amon. ¹³ Ginairgo ko kamo nga daw akon gid mga ongà. Nganì higugmaa nindo kami pareho ng amon paghigugmà sa indo.

¹⁴ Ayaw gid kamo magpakig-imaw sa mga wayà nagatuo kay Kristo. Kay indì puydi nga magkipag-kaibahan ang maayo sa malain; kag indì gid puydi nga magdungan ang kahayag sa kaduyom. ¹⁵ Kag puydi ba si Kristo kag si Belial^b magkinasugtanan? Kag ano ang pagkakapareho ng nagatuo kag ang wayà nagatuo? ¹⁶ Kag dì ba ginabawal nga ibutang ang mga dios-diosan sa templo ng Dios? Kay kita hay imaw ang templo ng Dios nga buhì! Imaw ini ang naghambay ang Dios,