¹ Mga pinalanggà, tungod tiyad ini ang mga promisa ng Dios sa aton, bayaan ta na ang tanan nga nagapahigkò sa aton lawas kag espiritu. Tahuron naton ang Dios kag ilain ta gid ang aton bilog nga kabuhì para sa iya.

² Batuna abi nindo kami sa indo mga tagipusuon kay wayà kami ning may malain nga ginghuman abir isa sa indo. Wayà da kami may ginghuman nga salà para masirà o madayà ang abir isa sa indo. ³ Wayà ko ini ginahambay agud husgahan kamo. Kay pareho ng akon ginghambay dati, ginapalanggà gid namon kamo kag abir ano ang matabò, mabuhì man o mamatay, magakaibahan gid kita. ⁴ Dakò gid ang akon pagsalig sa indo kag ginapakadakò ko gid kamo. Abir masyado kahugà ang amon naagihan, gingpakusog gid nindo ang akon tagipusuon kag napunò gid ning kalipay nang mabatian ko ang parti sa indo.

⁵ Nang pag-abot namon sa probinsya ng Macedonia, wayà gid ning pahuway ang amon lawas kay puro kahugaan ang amon naagihan abir diin. Sa luwas ging-away kami ng mga nagakuntra sa amon, kag sa suyod nahadlok da kami. ⁶ Pero ang Dios nga nagapalig-on sa mga nagakalisod imaw ang nagpalig-on sa amon tungod sa pag-abot ni Tito diri. ⁷ Bukon lang ang iya pag-abot ang nakatao ning kalig-on sa amon, kundì ang iya da gingbalità nga gingpalig-on nindo siya. Gingbalitaan niya kami nga dakò ang indo kalangkag sa akon, kag punò gid kamo ning kalisod sa natabò, kag tudo gid ang indo kabayaka sa akon. Nganì labi gid ako nga nalipay.

⁸ Abir ang akon sulat ang nagtao ning kalisod sa indo, wayà ako nagahinuysoy nga gingsulat ko adto. Nang una, matuod nga naghinuysoy ako kay nakità ko nga nang premiro nagkalisod kamo sa matag-od nga tiyempo. ⁹ Pero niyan nalilipay ako, bukon kay nalisod kamo, kundì tungod imaw adto ang naging paagi agud magbalik kamo sa Dios. Kay gingpalisod kamo sunò sa kabubut-on ng Dios, nganì wayà nagtao ning malain sa indo adtong amon gingsulat. ¹⁰ Kay ang kalisod nga sunò sa kabubut-on ng Dios hay nagadaya sa tawo para magtalikod sa salà, kag inà hay nagaresulta ng kaluwasan nga wayà ning dapat hinuysuyan. Pero ang kalisod ng mga tawo nga wayà relasyon sa Dios hay nagadaya sa inda sa kamatayon. ¹¹ Tan-awa nindo ang resulta ng kalisod nga nag-abot sa indo sunò sa kabubut-on ng Dios. Naging desidido gid kamo para ipakità nga kamo hay wayà ning salà sa butang nga akon ginahambay sa indo. Nahangit gid kamo sa nakahuman ng adto nga salà. Kag hinadlukan kamo kung ano adto ang magiging resulta. Kag nagakabayaka gid kamo sa akon. Gusto gid nindo nga magbalik liwat ang aton maayo nga relasyon. Kag gingparusahan nindo ang naghuman ng adto nga butang. Sa tanan nga paagi, gingpakità nindo nga kamo hay wayà gid ning salabton sa adto nga salà.

¹² Nganì adtong akon sulat hay bukon lang para sa naghuman ning salà o sa ginghumanan ning salà, kundì labi na gid para sa indo tanan agud maipakità gid nindo sa Dios nga kamo hay sinsiro sa amon. ¹³ Kag sa indo ginghuman, napakusog nindo ang amon tagipusuon.

Kag bukon lang inà, kundì nadugangan pa gid ang amon kusog kag kalipay nang makità namon ang kalipay ni Tito, kay matawhay na ang iya hunahunà parti sa indo tanan. ¹⁴ Gingpakadakò ko kamo nang una sa iya kag wayà gid ako napahuyà. Matuod gid ang tanan nga ginghambay namon sa indo, napamatuuran mismo ini nga matuod ang amon pagpakadakò sa iya parti sa indo. ¹⁵ Kag mintras nadudumduman ni Tito nga kamo tanan hay nagsunod sa iya ginghambay kag kung pauno nindo siya gingbaton nga may dakò nga pagtahod, ang paghigugmà niya sa indo hay labi pa gid nga nagadugang. ¹⁶ Kag ako hay nalilipay da kay masaligan ko gid kamo.