¹ Mga kauturan, gusto namon ibalità sa indo ang nahuman sa kabuhì ng mga nagatuo sa Macedonia paagi sa pagpakamaayo ng Dios, ² nga abir nag-agi sinda sa kahugaan kag ini hay isa ka grabe nga pagtilaw sa inda, kalipay-lipay gid sinda. Abir sinda hay kapubre-pubre, kaatag-atag gid sinda sa pagtao. ³ Makapamatuod ako sa indo nga ang inda pagtao hay bukon lang sunò sa inda makakaya kundì subra pa gid, kag ginghuman ninda ini nga buluntaryo. ⁴ Sinda gid mismo imaw ang nagpangabay sa amon nga kung puydi taw-an sinda ning prebilihiyo nga makabulig da sa nagakahinangyan nga mga banal nga tawo ng Dios sa Jerusalem. ⁵ Kag subra pa gid sa amon ginalauman, gingtao ninda una sa tanan ang inda kaugalingon sa Ginoo kag sa amon sunò sa kabubut-on ng Dios. ⁶ Tungod sa inda maayo nga ginghuman, nagpangabay kami kay Tito nga magbalik dirà sa indo para matapos ang iya gingtunaan sa ini nga trabaho parti sa indo pagtao. ⁷ Kamo dirà sa Corinto hay abunda sa tanan nga butang: may madakò kamo nga pagtuo sa Dios, maayo magtudlò, kag madamò ang nasayuran sa espiritwal nga mga butang. Mahugod kamo sa pagserbisyo sa Dios, kag dakò ang indo paghigugmà sa amon. Nganì gusto namon nga ipakità nindo nga wayà da kamo nagakuyang sa pagtao. ⁸ Wayà ko kamo ginasugua nga magtao, kundì ginabalità ko lang sa indo ang dakò gid nga handom nga pagbulig ng iban agud maipakità da nindo sa amon nga ang indo paghigugmà hay matuod gid. ⁹ Sayod nindo kung mauno kadakò ang pagpakamaayo ng aton Ginoong Hesu-Kristo, bisan manggaranon siya didto sa langit, nagpakapubre siya diri sa dutà tungod sa iya kaluoy sa aton; agud paagi sa iya kapubrehon magiging manggaranon kita. ¹⁰ Nganì imaw ini ang akon laygay sa indo: maayo kung padayunon nindo ang pagtao nga indo gingtunaan nang nagligad nga tuig. Bukon lang kamo ang nagtao, kundì gusto da gid nindo humanon ini. ¹¹ Niyan padayuna nindo inà hasta matapos. Tinguhai nindo nga matapos ang indo gingplano nga gusto gid nindo humanon, kag magtao kamo sunò sa indo makakaya. ¹² Kay kung gusto gid nindo magtao, batunon ng Dios ang indo makakaya. Wayà siya nagapaabot nga magtao kamo ng indì nindo makakaya. ¹³ Bukon sa gusto ko nga magaanan ang kamutangan ng iban kag kamo naman ang mabug-atan, kundì para magapareho ang aton kamutangan. ¹⁴ Sa niyan, abunda ang indo pangabuhì, nganì angay lang nga buligan nindo ang mga ginakuyang. Kung mag-abot ang adlaw nga kamo naman ang magakahinangyan, kag sinda hay maayo na ang kamutangan, sinda naman ang mabulig sa indo. Sa ini nga paagi, maging pareho ang kamutangan ng isa kag isa. ¹⁵ Pareho ng nakasulat sa Kasulatan:

¹⁶ Nagapasalamat kami sa Dios nga imaw ang nagbutang sa tagipusuon ni Tito ning pagkabayaka sa indo pareho da ng amon pagkabayaka sa indo. ¹⁷ Kay bukon lang siya ang nagsugot sa akon pangabay nga makarà dirà sa indo, kundì siya gid mismo ang nagprisinta nga magkarà dirà. ¹⁸ Panunton namon sa iya ang isa ka utod kay Kristo nga ginadayaw ng tanan nga nagatuo tungod sa iya pagserbisyo sa pagpasayod ng Maayo nga Balità. ¹⁹ Bukon lang inà, kundì siya gid nganì ang gingpilì ng mga nagatuo, nga magnunot sa amon para magdaya ng ining bulig para sa mga nagakahinangyan. Ginahuman namon ini agud madayaw ang Ginoo kag agud maipakità sa mga tawo nga gusto gid namon magbulig. ²⁰ Panunton namon ini nga utod kay Tito agud malikawan namon nga mabasoy kami ng abir sin-o sa amon pagtipon kag pagpanao ng ining dakò nga bulig. ²¹ Kay gusto namon nga maghuman ning maayo, bukon lang sa panirò ng Ginoo kundì sa panirò da ng tawo.

²² May isa pa gid ka utod kay Kristo nga panunton namon sa inda. Ini nga tawo hay makapila na namon naaprobahan sa iba-iba nga mga butang kag napamatuuran nga may handom gid siya sa pagbulig, kag labi na gid niyan kay dakò ang iya pagsalig sa indo. ²³ Kung parti kay Tito, siya hay kaibahan ko nga nagapangabudlay sa pagbulig sa indo. Kung parti da sa ining iban nga mga kauturan kay Kristo nga maganunot sa iya, sinda ang mga gingpadaya ng mga nagatuo. Ang inda kabuhì hay nagatao ning kadayawan kay Kristo. ²⁴ Nganì, ipakità nindo sa inda nga mahigugmaon kamo agud masayuran ninda nga matuod gid ang amon mga pagpakadakò sa indo, kag masayuran da ini ng mga nagatuo sa iban nga lugar paagi sa inda.