9
Ang Bulig para sa mga Nagatuo
1 Nganì indì na kahinangyan nga sulatan ko pa kamo parti sa indo pagbulig sa nagakahinangyan nga mga nagatuo nga banal nga tawo ng Dios sa Jerusalem, 2 kay nasayuran ko nga gusto gid nindo magbulig. Ginapakadakò ko nganì kamo sa mga nagatuo nga mga taga-Macedonia. Nagahambay ako sa inda nga kamo dirà sa Acaya hay preparado na nga magbulig tunà pa nang nagligad nga tuig. Nang pagkabatì ninda adto, natandog gid ang tagipusuon ng kadamuan sa inda. 3 Nganì ginapauna ko dirà ini nga mga kauturan para makapreparar na kamo ng indo inugtao, pareho ng akon ginghambay. Ini ang magapatunay nga matuod ang akon pagpakadakò parti sa indo. 4 Kay basì kung may mga taga-Macedonia nga magnunot sa akon kung magkarà na ako dirà kag madiskobre ninda nga wayà pa da galì kamo makapreparar ng indo inugtao, mapapahuyà kami. Kay gingpahambog na namon kamo tungod dakò ang amon pagsalig sa indo. (Kag indì dapat na kami maghambay nga labi nga mapahuyà kamo.) 5 Nganì naisip ko nga kahinangyan ipangabay ini nga mga kauturan nga mag-una dirà, agud bago ako mag-abot matipon na ninda ang indo inugtao nga gingpangakò. Kag sa ini nga paagi magaluwas nga nagtao kamo tungod kay gusto nindo kag bukon napilitan lang.
6 Tandaan naton ini: ang mga tawo nga maisot lang nga binhì ang ginatanom, maisot lang da ang aanihon. Pero ang nagatanom ning madamò, madamò da ang aanihon. 7 Ang kada isa hay dapat magtao sunò sa iya gusto nga itao. Wayà nagatao nga may kalisod o napipilitan lang, kay nalilipay ang Dios sa tawo nga nagatao ning may kalipay. 8 Kag kaya ang Dios nga itao sa indo ng subra pa kaysa sa indo mga kahinangyanon, agud indì gid kamo pagkuyangon kag permi pa kamo makabulig sa iban. 9 Pareho ng nakasulat sa Kasulatan:
“Nagapanao siya sa mga pubre;
ang iya matarong nga ginahuman hay pagadumdumon hasta san-o.”a
10 Kag ang Dios nga nagatao ning binhì sa miyugpanguma kag ning pagkaon para may pagakaunon, hay imaw da ang Dios nga magatao ng indo kahinangyan kag magapadamò sa indo binhì. Kag paagi diri, magadugang pa gid ang indo pagbulig sa iban. 11 Pakamaayuhon niya kamo sa tanan nga butang para permi kamo makabulig sa iban. Kag madamò ang magapasalamat sa Dios tungod sa indo ginapadaya sa inda nga bulig paagi sa amon. 12 Kay sa ini nga indo pagtao, bukon lang mabubuligan nindo ang nagakahinangyan nga mga banal nga tawo ng Dios sa Jerusalem, kundì paagi da diri subra-subra gid ang pagpasalamat ng madamò sa Dios. 13 Kay ang indo bulig hay nagapamatuod nga nagatuman kamo sa Maayo nga Balità parti kay Kristo nga indo ginatuuhan. Nganì dayawon ng mga tawo ang Dios, bukon lang kay nagbulig kamo sa mga taga-Jerusalem kundì nakabulig da kamo sa madamò. 14 Kag magapangamuyò sinda para sa indo nga may dakò nga paghigugmà tungod sa indì mapantayan nga pagpakamaayo ng Dios sa indo. 15 Nganì magpasalamat kita sa Dios tungod sa iya gingtao sa aton nga indì gid maisplikar.