¹ Ako si Pablo nga ang hambay ng iba hay mapainubuson lang pag kaatubang nindo pero maisog pag malayò. Pero ako mismo hay nagapangabay sa indo sa ngayan ni Kristo nga mapainubuson kag mabuot. ² Nagapangabay ako nga ayaw abi nindo ako pagpilita nga maghambay ning mabug-at pagkarà ko, pareho ng ipakità ko nga kaisog sa pila dirà nga nagahambay gihapon nga kami hay nagakabuhì sa lawasnon nga kinaugalì. ³ Abir kami hay nagakabuhì sa kalibutan, pero sa amon pakipag-away sa mga nagakuntra sa kamatuuran, wayà kami nagasalig sa amon lawasnon nga abilidad. ⁴ Kay ang mga armas nga amon ginagamit sa pakipag-away hay bukon paagi sa lawasnon kundì sa gahom ng Dios. Ginagubà namon ang mga salà nga rason ng mga tawo nga pareho sa mga matibay nga pader, ⁵ patì ang kada mahambog nga isip nga pareho sa mataas nga gingpatindog nga butang nga nagaharang para indì ninda makilaya ang Dios. Ginabihag namon ang kada hunahunà ninda agud maging matinumanon sinda sa mga sugò ni Kristo. ⁶ Kag kung makità namon nga nagatuman na gid kamo ng tanan, ang wayà nagatuman hay parusahan namon.

⁷ Ang mga butang lang nga panluwas ang ginasirò nindo. Hunàhunaa nindo ning maayo, kung igwa ning nagapati nga siya hay kay Kristo, dapat maintindihan niya nga kami da hay kay Kristo. ⁸ Abir daw subra na ang akon pagpakadakò parti sa otoridad nga gingtao sa amon ng Ginoo, wayà ako nahuyà, kay ini hay wayà ko ginagamit sa pagsirà ng indo pagtuo, kundì sa pagpalig-on. ⁹ Indì ko gusto nga hadlukon ko kamo paagi sa akon mga sulat. ¹⁰ Kay may iban nga nagahambay nga mabug-at kag maisog ang akon mga gingsulat, pero kung nagaatubang na hay maluya ako kag ang akon mga ginahambay hay wayà ning puyos. ¹¹ Dapat masayuran ng inà nga mga nagahambay ng tiyad inà, nga kung ano ang amon ginahambay sa mga sulat, imaw da inà ang amon humanon kung yarà na kami dirà.

¹² Indì kami mangahas nga maghakwat ng sarili namon nga bangkò o magkumpara sa iban dirà nga subra ang inda pagpadayaw ng inda sarili. Wayà gid sinda ning isip! Sinda-sinda hay nagasinukatan kag nagakinumparahan ng inda-inda mga kaugalingon nga kaayo. ¹³ Pero kami hay wayà nagapakadakò ning subra, kundì hasta lang gid sa tamà nga limitasyon nga gingtao ng Dios sa amon, kag kaibahan diri ang amon trabaho sa indo. ¹⁴ Kung wayà kami nakaabot dirà sa indo, puydi ninda mahambay nga nagapanunubra ang amon pagpakadakò. Pero ang matuod, kami ang una nga nakaabot dirà daya ang Maayo nga Balità parti kay Kristo. ¹⁵ Nganì bukon subra ang amon pagpakadakò kay wayà kami nagabuoy ng pinangabudlayan ng iban kag ipakadakò. May sigurado kami nga paglaom nga mintras nagadugang ang indo pagtuo, mas madamò pa gid ang amon mahuhuman dirà sa indo sunò sa duyunan nga ginapahuman ng Dios sa amon. ¹⁶ Pagkatapos dirà, madaya da namon ang Maayo nga Balità sa iban nga mga lugar sa unahan nindo. Kay indì namon gusto nga buy-on ang pinangabudlayan ng iban kag ipakadakò. ¹⁷ Pareho ng nakasulat sa Kasulatan, “Ang abir sin-o nga gusto magpakadakò, dapat ang ipakadakò lang gid niya hay ang ginghuman ng Ginoo.”^{a 18} Kay ang ginabilang nga maayo ng Ginoo hay bukon ang tawo nga nagadayaw ng iya kaugalingon, kundì ang tawo nga iya ginadayaw.