¹ Kabay pa nga matiisan nindo ako kung sa akon pagpakadakò hay daw isa ini nga kabuangan. Tiison lang nindo ako! ² Kay may diosnanon ako nga kaimon nga nababatyagan sa indo. Pareho kamo sa isa ka dalaga nga malimpyo ang pagkababayi, nga akon gingpangakò nga ipakasay sa isa ka lyaki nga imaw si Kristo. ³ Pero nababayaka ako kay basì kung madayà kamo, pareho ni Eva nga nadayà ng sawa, kung sa diin maduduyà ang indo sinsero kag debosyon nga pagsunod kay Kristo. ⁴ Kay ginabaton lang nindo ang bisan sin-o nga nagakarà dirà nga nagawali ng iba nga Hesus kaysa sa amon gingwali sa indo. Kag ginabaton da nindo ang iba nga klase ng espiritu kaysa sa indo gingbaton kag ang inda ginatawag nga maayo kuno nga balità nga iba kaysa sa indo nabaton sa amon.

⁵ Para sa akon, bukon ako ulihi sa mga nagahambay nga sinda gid ang pinakamaayo nga mga apostol. ⁶ Kung abir bukon gida ako pareho sa mga tawo nga gingtudluan para maghambay ning maayo, pero madamò ang akon nasayuran parti sa kamatuuran parti sa Dios. Sayod nindo inà kay nakità naman nindo mismo nga inà hay matuod sa tanan namon nga mga pagtudlò sa indo.

⁷ Wayà ako nagpabayad sa indo nang akon pagpasayod ng Maayo nga Balità nga halin sa Dios, kundì ako mismo hay nagpakababà agud mag-ayo ang indo espirituhanon nga kabuhì. Salà ba adtong akon ginghuman? ⁸ Daw gingkawatan ko ang iban nga mga nagatuo paagi sa pagbaton ning bulig sa inda agud nga makaserbisyo ako sa indo. ⁹ Nang yarà ako sa indo kag gingkuyang ako ng akon mga kahinangyanon, wayà da ako nagpangayò ning bulig abir kay sin-o sa indo. Ang mga kauturan halin sa Macedonia imaw ang nagtao sa akon ng akon mga kahinangyan. Ginglikawan ko nga magpabug-at sa indo, kag imaw gida ini permi ang akon paghumanon. ¹⁰ Ining akon ginapakadakò hay indì gid mapapara sa mga lugar sa indo palibot nga sakop ng probinsya ng Acaya. Kag tungod si Kristo yari sa akon, ang akon ginahambay hay matuod gid. ¹¹ Pero basì kung maghambay kamo nga wayà ako nagapangayò ning bulig sa indo kay bukon ko kamo palanggà? Sayod ng Dios nga palanggà ko gid kamo.

¹² Pero ipadayon ko ang akon ginahuman nga indì ako magbaton ning bulig halin sa indo, agud indì magkaigwa ning opurtunidad ang mga nagapamalità dirà nga ang pagpangabudlay ninda hay pareho sa amon ginahuman. ¹³ Inà nga mga tawo hay bukon matuod nga mga apostol, kundì mga miyugpangdayà sa inda ginahuman kag nagapakuno-kuno lang nga sinda hay mga apostol ni Kristo. ¹⁴ Kung sa bagay, bukon inà makatitingaya! Kay abir nganì si Satanas hay nagapakuno-kuno nga nagahayag nga anghel ng Dios. ¹⁵ Nganì bukon makatitingaya kung ang iya mga tagasunod hay nagapakuno-kuno da nga mga miyugserbisyo ng pagkamatarong. Pero magaabot ang adlaw nga ang pagadangatan ninda hay ang parusa nga angay sa inda mga ginahuman.

¹⁶ Pareho ng akon ginghambay dati, ayaw kamo maghunahunà nga buang-buang ako; pero kung imaw inà ang ginaisip nindo sa akon, wayà problema, basta pabay-i lang nindo ako nga magpakadakò da abir maisot lang. ¹⁷ Kung sa bagay, kung ginapakadakò ko ang akon kaugalingon, bukon ini halin sa Ginoo, kag daw ako ang sa buang-buang. ¹⁸ Pero tungod madamò dirà ang nagapakadakò parti sa inda sarili nga ang basehan hay kung ano ang importante sa kalibutan, ako hay mapahambog da. ¹⁹ Nagahunahunà kamo nga mga mayad, pero nagatiis kamo nga may kalipay nga magpamatì sa mga buang-buang! ²⁰ Ginatiis nindo kung ulipunon kamo, buy-on ang indo pagkabutang, lukuhon, pakamaisuton kag pakahuy-an. ²¹ Makahuhuyà da nga akuon namon nga maluya kami, pero indì gid namon mahuman inang inda ginahuman sa indo.

Kung may magpahambog ng abir ano, ako da (abir ining akon pagpakadakò hay daw sa buang-buang ako). ²² Kung sinda hay nagapakadakò nga sinda hay mga Hebrews kag mga inapo ni Israel, imaw da ako. Inapo ba sinda ni Abraham, imaw da ako. ²³ Kung nagahambay sinda nga sinda hay mga miyugserbisyo ni Kristo, mas maayo ako nga miyugserbisyo ni Kristo kaysa sa inda (abir ining akon pagpakadakò hay daw sa buang-buang ako). Kay mas subra ang akon pagpangabudlay kung ikumpara sa inda. Kag mas madamò ka beses ako napriso. Permi gid ako gingbunay, kag kapila gid ako ka beses nga isutan lang mamatay. ²⁴ Lima gid ka beses ako ginglatigo ng akon kapareho nga mga Judio ning tig-39 ka latigo. ²⁵ Tuyo ka beses ako ginghaplit ng mga Romano.^a Kag isa ka beses ako gingbugoy nga hayos ikamatay ko. Tuyo ka beses ako nakaagi nga malunod ang akon ginasakyan, kag isa ka beses, isa ka adlaw kag isa ka gab-i ang akon paglutaw-lutaw sa lawod. ²⁶ Sa akon permi pagbiyahe sa iba-iba nga lugar, ang akon kabuhì hay nabubutang sa peligro sa akon pagtabok sa mga subà, sa mga tulisan, sa akon kapareho nga mga Judio, sa mga bukon Judio, sa siyudad, sa malangkag nga lugar, sa dagat, kag sa mga tawo nga nagapakuno-kuno nga sinda hay mga kauturan da sa Ginoo. ²⁷ Naagihan ko da ang mga kabudlay kag mga kahugaan tungod sa akon trabaho, kag kung kaisa wayà nganì ako katuyog. Kung kaisa nagihan ko ang tagutom, kag bisan nganì ning mainom wayà gid. May mga beses nga wayà gid ako ning may makaon. Naagihan ko da ang kalamig kag kuyang gid ning barò. ²⁸ Puyra pa ang akon mga naagihan nga nasambit ko, nagapangalibog pa ako adlaw-adlaw sa kamutangan ng tanan nga nagatuo. ²⁹ Kung igwa ning maluya sa pagtuo, maluya ako. Kag kung igwa ning nagakasalà, mas labi gid ang akon kahangit.

³⁰ Kung kahinangyan gida nga magpakadakò ako, ipakadakò ko na lang ang mga butang nga nagapakità ng akon kaluyahon. ³¹ Wayà ako nagapinusong kag inà hay sayod ng Dios kag Amay ng aton Ginoong Hesus. Dayawon siya hasta sa wayà katapusan! ³² Nang yadto ako sa Damascus, gingpabantayan ng gobernador nga sakop ni Haring Aretas ang puwertahan ng siyudad agud dakpon ako. ³³ Pero gingbutang ako ng akon mga kaibahan sa bangkat, kag gingpaagi sa bukas nga bintanà, tapos gingtunton sa kabuak ng pader, nganì nakadyagan ako sa iya malain nga plano.