¹ Ako si Pablo kag ang kaibahan ko hay si Timoteo, nga mga ulipon ni Kristo Hesus. Nagapangamusta kami sa indo nga mga gingpabanal ni Kristo Hesus dirà sa siyudad ng Filipos, imaw da sa mga miyugdumaya kag sa mga miyugserbisyo sa mga nagatuo.

² Kabay pa nga mabaton nindo ang grasya kag katawhayan halin sa Dios nga aton Amay kag sa Ginoong Hesu-Kristo.

³ Nagapasalamat gid ako sa Dios kada ko kamo madumduman. ⁴ Ang akon mga pangamuyò para sa indo tanan hay permi gid may kalipay, ⁵ tungod sa indo pagbulig sa pagpalapnaag ng Maayo nga Balità parti kay Kristo, tunà pa nang gingbaton nindo ini hasta arinyan. ⁶ Sigurado gid ako nga ang Dios nga nagtunà ng maayo nga mga ginghuman sa indo hay magapadayon gid hasta matapos sa adlaw ng pagbalik ni Kristo Hesus.

⁷ Dapat lang gid nga tiyad ini ang akon ginahunahunà para sa indo tanan kay palanggà ko gid kamo. Kaibahan nindo ako tunà pa nang una sa pagdipinsa ko kag pagpamatuod ng Maayo nga Balità. Kaparte ko pa kamo sa prebilihiyo nga gingtao ng Dios sa akon, abir arinyan nga ako hay nakapriso. ⁸ Sayod gid ng Dios nga ang akon kalangkag sa indo tanan hay pareho ng paghigugmà sa indo ni Kristo Hesus. ⁹ Ginapangamuyò ko nga magainit pa gid ang indo paghigugmaanan sa isa kag isa kag madugangan pa gid ang indo pagkasayod kag pagkaintindi sa mga kamatuuran, ¹⁰ para indo mapilì kung ano ang pinakamaayo nga mga butang, agud maging malimpyo ang indo kabuhì kag wayà ning malain nga maihambay kuntra sa indo hasta sa adlaw ng pagbalik ni Kristo. ¹¹ Paagi sa bulig ni Hesu-Kristo, ang indo pagkabuhì hay punò gid ning matarong nga pamatasan agud mapadunggan kag madayaw ng mga tawo ang Dios.

¹² Mga kauturan, niyan gusto ko nga masayuran nindo, ang mga bagay nga natabò sa akon hay mas nakabulig ning dakò para maiwali ang Maayo nga Balità. ¹³ Nganì, nasayuran ng mga guwardya diri sa palasyo kag ng iban da nga mga tawo diri nga ako hay napriso tungod sa akon pagserbisyo kay Kristo. ¹⁴ Tungod sa akon pagkapriso, labi nga naglig-on ang pagtuo ng kadamuan nga mga kauturan sa Ginoo, kag labi pa sinda nag-isog nga iwali ang hambay ng Dios.

¹⁵ Matuod gid nga ang iban nagawali parti kay Kristo tungod sa kaili kag pagdibati, pero ang iban naman nagawali nga tama ang mutibo. ¹⁶ Nagawali sinda kay ginahigugmà ninda ako, sayod ninda nga ako hay gingbutang diri ng Dios para dipinsahan ang Maayo nga Balità. ¹⁷ Pero ang mga tawo nga naiili kag bukon tamà ang mutibo sa pagwali parti kay Kristo, ang kalaom ninda labi pa ako nga mahuhugaan mintras yari sa prisuhan. ¹⁸ Hay ano gid? Abir ano pa man nga paagi, pakuno-kuno man o matuod, ang importante hay ginawali si Kristo. Nalilipay pa nganì ako sa natabò.

Kag padayon ako nga nalilipay ¹⁹ kay sayod ko nga paagi sa indo mga pangamuyò kag sa dakò nga bulig ng Espiritu ni Hesu-Kristo hay makaluwas gid ako diri sa prisuhan.

²⁰ Ang akon madakò nga handom kag paglaom hay indì ako mapahuyà, kundì may kaisog pareho nang una hasta niyan agud paagi sa tanan ko nga ginahuman, mabuhì man o mamatay, hay madayaw ko si Kristo. ²¹ Kay para sa akon, ang mabuhì para kay Kristo kag ang mamatay mas pakinabang. ²² Pero kung ako hay buhì, mas maayo da agud maipadayon ko ang pinakamaayo nga dapat humanon, nganì indì ko masayuran kung ano ang akon pilion. ²³ Niyan naiipit ako sa duha nga kaisipan: Gusto ko nga magpanaw na sa ini nga kabuhì para makaibahan si Kristo, kay para sa akon, imaw ini ang pinakamaayo. ²⁴ Pero kung buhì pa ako, maayo da kay para ini sa indo kaayuhan. ²⁵ Imaw ini ang akon nasisiguro: Sayod ko nga indì pa ako mamatay, makakaibahan ko pa kamo para mabuligan kamo tanan nga mapalig-on ang indo espirituhanon nga kabuhì kag maging malipay kamo sa indo pagtuo. ²⁶ Agud kung makaibahan ko na kamo liwat, labi pa gid nindo nga dayawon si Kristo Hesus tungod sa ginghuman niya sa akon.

²⁷ Dapat ang indo pagkabuhì hay sunò lang gid sa Maayo nga Balità parti kay Kristo. Agud makakarà man ako kag makità kamo o indì, sayod ko nga kamo hay matibay nga nagakaisa sa espiritu kag may isa nga handom nga dipinsahan ang Maayo nga Balità nga aton ginatuuhan. ²⁸ Ayaw kamo mahadlok sa mga nagakuntra sa indo kay ini ang palatandaan nga ang destinasyon ninda hay sa impyerno, pero kamo pagaluwason, kag ini hay humanon gid ng Dios! ²⁹ Kay gingtao ng Dios sa indo ang prebilihiyo paagi kay Kristo: bukon lang ang magtuo sa iya, kundì ang magtiis da kaibahan niya. ³⁰ Magkaibahan na kita sa mga pakipaglaban tungod sa Maayo nga Balità. Nakità nindo ini nang una sa akon kag niyan nabatian nindo nga ako hay nagatiis gihapon.