¹ Sayod nindo nga napapakusog ang indo tagipusuon tungod sa pakig-isa nindo kay Kristo kag napapalipay da kamo tungod sa iya paghigugmà para sa indo. May maayo da kamo nga relasyon sa Espiritu Santo kag naluluoy kamo nga magbulig sa isa kag isa. ² Tungod kay tanan ini hay matuod nga natatabò sa indo, magkaisa kamo sa hunahunà, magkaisa kamo sa paghigugmà, magkaisa kamo sa indo mga handom kag mga plano, para makumplito gid ang akon kalipay. ³ Indì kamo maghinakog o maghinambog, kundì magpakababà kamo kag mas palabihon nindo ang kaayuhan ng iban kaysa sa indo sarili. ⁴ Bukon lang ang indo kaugalingon nga kaayuhan ang indo isipon, kundì ang kaayuhan da ng iban. ⁵ Ang ugalì nga dapat igwa kamo hay pareho ng kay Kristo Hesus:

¹² Nganì mga pinalanggà ko, kumpara ng indo pagsunod nang kaibahan nindo ako nang una, mas kahinangyan nga maging masinundanon kamo niyan nga wayà na ako dirà. Tinguhai gid nga magkabuhì ning maayo, nga may pagtahod kag pagsunod sa Dios nga hugot sa tagipusuon, para maipakità nga kamo hay nakabaton na ning kaluwasan. ¹³ Kay ang Dios imaw ang nagahuman ning paagi sa indo. Ginataw-an niya kamo ning handom kag abilidad nga makasunod sa iya para malipay siya.

¹⁴ Himua ang tanan nga bagay nga wayà ning riklamo kag diskusyon, ¹⁵ agud wayà ning malain nga maihambay laban sa indo, maging malimpyo kamo kag wayà ning kapintasan nga mga ongà ng Dios sa tungà ng mga tawo nga malain kag makasasalà. Dapat ang indo maayo nga pagkabuhì hay daw pareho ng mga bituon sa langit nga nagahayag sa kalibutan, ¹⁶ mintras nagapadayon kamo sa pagpati sa hambay ng Dios nga nagatao ning kabuhì. Agud maipakadakò ko gid kamo sa adlaw nga magbalik si Kristo, kay imaw ini ang pamatuod nga napuslan gid ang akon pagpangabudlay sa indo.

¹⁷ Pero abir mamatay pa ako para sa pagserbisyo ng indo pagtuo, daw pareho sa dugò ng hayop nga ginabubò sa pagsakripisyo, ako hay nalilipay kag padayon nga nalilipay kaibahan nindo. ¹⁸ Kag imaw da kamo, dapat kamo magkalipay nga kaibahan ko nga nalilipay.

¹⁹ Nagalaom ako sa Ginoong Hesus nga mapakarà ko si Timoteo nga daan dirà sa indo, agud ako da hay malipay pag mabalitaan ko ang indo maayo nga kamutangan dirà. ²⁰ Kay wayà ning kapareho ko, puyra lang sa iya nga nagakabayaka ning matuod para sa indo kaayuhan. ²¹ Tungod ang ginatinguhà ng kadamuan hay para lang sa inda sarili nga kaayuhan, bukon ang kabubut-on ni Hesu-Kristo. ²² Pero sayod nindo kung pauno ni Timoteo gingpakità nga siya hay masaligan. Kay pareho sa relasyon ng ongà sa iya tatay, nagserbisyo siya kaibahan ko para magwali ng Maayo nga Balità. ²³ Nganì ako hay nagaplano nga pakaraon ko siya nga daan dirà, pag masayuran ko ang akon magiging kamutangan diri. ²⁴ Pero nagasalig ako sa Ginoo nga ako mismo hay makakarà gid nga daan dirà sa indo.

²⁵ Naiisip ko nga kahinangyan nga papaulion dirà sa indo si Epaprodito, ang aton utod sa pagtuo. Siya hay kaibahan ko nga miyugserbisyo kag kapareho ko nga sundalo ng Dios. Siya ang indo gingsugò agud magdaya ng akon kahinangyan kag agud makabulig ko da diri. ²⁶ Ginalangkag na gid siya sa indo kag gusto na gid niya kamo makità kay nabatian kuno nindo ang iya pagkasakit. ²⁷ Matuod gida nga siya hay nagkasakit kag isutan lang mamatay. Pero gingkaluy-an siya ng Dios kag bukon lang siya kundì patì ako, kay kung wayà siya nag-ayo, magadugang pa gid ang akon kalisod. ²⁸ Nganì gusto ko gid nga makabalik na siya dirà, kay sayod ko nga malipay kamo nga makità siya liwat kag para maduyà ang akon kabayaka. ²⁹ Nganì batuna nindo siya nga may kalipay bilang utod sa Ginoo. Ang tawo nga pareho sa iya hay angay gid nga tahuron. ³⁰ Kay isutan lang siya mamatay para sa pagserbisyo kay Kristo, gingtayà niya ang iya kabuhì, agud ang indo mga kakuyangan sa pagserbisyo sa akon hay mapun-an niya.