¹ Ako si Pablo nga naging apostol^a ni Kristo Hesus paagi sa kabubut-on ng Dios. Nagapangamusta ako kag si Timoteo nga aton utod sa pagtuo ² sa mga banan nga tawo ng Dios kag matutom nga mga kauturan sa pakig-isa kay Kristo sa siyudad ng Colosas.

Kabay pa nga mabaton nindo ang grasya kag katawhayan halin sa Dios nga aton Amay.

³ Nagapasalamat permi kami sa Dios nga Amay ng aton Ginoong Hesu-Kristo sa pangamuyò namon para sa indo, ⁴ tungod nabatian namon ang indo pagtuo kay Kristo Hesus kag ang paghigugmà nga ginapakità nindo sa tanan nga banal nga tawo ng Dios. ⁵ Ginahuman nindo ini tungod sa ginalauman nga gingtagana para sa indo sa kalangitan nga nabatian nindo nang una ang paglaom nang nabaton ang matuod nga mensahe parti sa Maayo nga Balità, ⁶ nga gingwali sa indo. Niyan ginapalapnaag ini sa bilog nga kalibutan. Ini hay nagatao ning padayon nga pagpakamaayo sa mga tawo abir diin nga lugar. Pareho ng natabò sa indo, tunà nang nabatian nindo kag naintindihan ang kamatuuran parti sa kaluoy ng Dios.

⁷ Natun-an nindo ini kay Epafras, ang aton palanggà kag amon kapareho nga ulipon ni Hesus, kag siya hay matutom nga miyugserbisyo ni Kristo bilang amon saklì para sa indo. ⁸ Gingpasayod da ni Epafras sa amon ang indo paghigugmà sa mga kauturan paagi sa bulig ng Espiritu.

⁹ Nganì tunà nang nabatian namon ini, padayon kami nga nagapangamuyò para sa indo. Nagapangabay kami sa Dios nga mapunò kamo ng tanan nga espirituhanon nga kamayad kag pang-intindi agud masayuran nindo ang kabubut-on ng Dios. ¹⁰ Paagi diri, magakabuhì kamo nga nagugustuhan ng Ginoo, para makakapalipay sa iya ang tanan nindo nga pagkabuhì, maging mabinungahon ang tanan nindo nga maayo nga ginahuman kag magadugang ang indo pagkakilaya sa Dios.

¹¹ Ginapangamuyò da namon nga palig-unon niya kamo paagi sa bulig ng iya makatitingaya nga gahom, agud abir ano ang matabò makatiis kag makaagwanta kamo nga may kalipay. ¹² Magpasalamat kamo sa Dios nga aton Amay kay gingpapasa niya kamo nga makaibahan ng iya mga banal nga tawo, agud makabaton sa panublion ng gingharian niya nga may subra kahayag.

¹³ Gingluwas niya kita halin sa gahom ng kaduyom kag gingsaylo sa gingharian ng iya palanggà nga Ongà. ¹⁴ Paagi sa pakig-isa sa iya Ongà, kita hay gingtubos kag gingpatawad sa aton mga salà.

¹⁵ Si Kristo mismo ang kapareho ng Dios, paagi sa iya makikità naton kung sin-o ang Dios nga indì makità. Siya hay yari na bago pa nagtunà ang tanan, siya ang pinakaimportante kag pinakamakagagahom sa tanan nga ginghuman.^{b 16} Kay paagi sa iya, ginghuman ng Dios ang tanan nga butang sa kalangitan kag sa dutà, nakikità man o indì. Ini hay ang mga nagaharì, mga miyugdumaya, mga pinunò kag mga may otoridad sa espirituhanon. Ang tanan hay ginghuman paagi kay Kristo kag para sa iya. ¹⁷ Siya hay yari na bago pa nahuman ang tanan nga bagay kag paagi sa iya ang tanan hay naibutang sa tamà nga lugar.

¹⁸ Kag siya ang uyo ng iya lawas, nga imaw ang mga nagatuo sa iya. Siya ang ginahalinan ng tanan kag siya ang Ongà nga panganay ng Dios, nga una nga nabuhì liwat sa mga patay,^c agud siya ang pinakauna sa tanan. ¹⁹ Kay ang gusto ng Dios ang iya tanan nga pagka-Dios hay yarà kay Kristo ²⁰ kag paagi kay Kristo, mapabalik ng Dios sa iya ang tanan nga ginghuman niya. Nganì nagkaigwa liwat ning maayo nga relasyon sa iya ang tanan nga ginghuman sa dutà kag sa kalangitan, paagi sa pagkamatay ni Kristo sa krus. ²¹ Dati, kamo hay wayà relasyon sa Dios kag kaaway niya tungod sa indo malain nga mga ginghunahunà kag mga ginghuman. ²² Pero niyan, gingbaton kamo liwat ng Dios nga iya mga amigo paagi sa pagkamatay ng lawas ni Kristo. Agud kamo hay maging wayà ning kasal-anan, wayà ning kapintasan kag wayà ning may maiakusa sa atubangan ng Dios, ²³ kung nagapadayon kamo nga may malig-on kag matutom sa pagtuo kag indì kamo mapalayò sa paglaom sa Maayo nga Balità. Ini hay indo nabatian kag ginawali sa bilog nga kalibutan, kag ako, si Pablo hay naging miyugserbisyo nga nagawali sa ini nga Maayo nga Balità.

²⁴ Niyan ang mga kahugaan nga natatabò para sa indo hay nagatao ning kalipay sa akon kay paagi sa ini nga kahugaan sa akon lawas, ginakumplituhan ko ang kakuyangan ng mga pagpasakit nga tiison ni Kristo para sa iya lawas, nga imaw ang mga nagatuo sa iya. ²⁵ Ako hay naging miyugserbisyo para sa mga nagatuo kay gingsalig sa akon ang trabaho ng Dios nga iwali ang bilog niya nga mensahe para sa indo ikakaayo. ²⁶ Ini nga mensahe nga wayà masayuri ng mga tawo hay gingtagò tunà pa nang una nga mga tiyempo. Pero niyan, gingpasayod niya ini sa iya mga banal nga tawo. ²⁷ Niyan ang gusto ng Dios hay ipasayod sa indo nga mga bukon Judio kung mauno kaabunda kag makatitingaya nga kaayo nga dati anay hay wayà gingpasayuran. Kag ang mensahe hay imaw ini: si Kristo hay nagaistar sa indo kabuhì kag ini ang kasiguruhan ng indo paglaom nga makabaton kamo ning makatitingaya nga kaayo sa kahimayaan ng Dios sa paabuton.

²⁸ Nganì ginawali namon nga may bug-os nga kamayad si Kristo paagi sa pagpaandam kuntra sa salà kag pagtudlò ning tamà sa kada isa, agud madaya namon sa atubangan ng Dios ang kada isa nga perpikto sa inda pakig-isa kay Kristo. ²⁹ Nagatinguhà ako ning tudo paagi sa makusog nga gahom nga ginatao sa akon ni Kristo.