¹ Gusto ko nga masayuran nindo kung mauno kadakò ang akon pagtinguhà para sa indo kag sa mga taga-Laodicea kag sa iban nga wayà pa nakakakità sa akon. ² Ginahuman ko ini agud mapakusog ko ang inda tagipusuon kag magkaisa sinda sa inda paghigugmà. Kag para magkaigwa sinda ning kumplito nga pagsalig kay naintindihan ninda ang plano ng Dios nga wayà gingpasayura nang una, nga imaw si Kristo. ³ Si Kristo ang lyabi para maabrihan ang nakatagò nga manggad ng tanan nga kamayad kag pang-intindi parti sa Dios.

⁴ Ginghambay ko ini para wayà ning makapatayang sa indo abir pa sa inda mga hambay nga nakakaingganyo. ⁵ Maskin wayà ako dirà sa indo, ginadumdom ko kamo sa akon tagipusuon. Kag nalilipay gid ako nang nabatian ko nga kamo hay disiplinado ning maayo kag malig-on ang indo pagtuo kay Kristo.

⁶ Tungod kay gingbaton na nindo si Kristo Hesus bilang Ginoo, dapat magpadayon kamo sa pagkabuhì nga nagapakig-isa sa iya. ⁷ Ang indo pagtuo sa iya hay pareho sa tanom nga madayom ang gamot kag sa bayay nga matibay ang pundasyon sa dutà. Sunda nindo ang gingtudlò sa indo, agud makapadayon kamo nga magalig-on sa pagtuo kay Kristo, nga may kadakò-dakò nga pagpasalamat sa Dios.

⁸ Mag-andam kamo basì kung mabihag kamo ng bisan sin-o paagi sa inda mga kalibutanon nga kamayad kag sa pagpatayang nga wayà puyos, kay ini hay sunò sa tradisyon ng mga tawo. Ini nga mga pagpanudlò hay bukon halin kay Kristo kundì halin sa malain nga mga espiritu nga nagagahom sa ini nga kalibutan. ⁹ Pag naging tawo si Kristo, makità nga siya hay Dios kay yarà sa iya ang tanan nga pagka-Dios. ¹⁰ Kag tungod sa indo pakig-isa sa iya, nagkaigwa kamo ning kumplito nga kabuhì. Siya ang pinakagamhanan sa tanan nga espiritu nga nagagahom kag may otoridad.

¹¹ Tungod sa indo pakig-isa kay Kristo, napaltak na kamo. Ini nga pagpaltak hay bukon sa lawas, kundì paagi sa himò ni Kristo nga pagbuoy ng malain nga kinaugalì ng tawo. ¹² Nang kamo hay gingbawtismuhan, ginglubong ang indo malain nga kinaugalì kapareho sa paglubong kay Kristo kag gingbuhì kamo liwat kapareho sa iya, paagi sa indo pagtuo sa gahom ng Dios nga nagbuhì liwat kay Kristo.

¹³ Kamo hay dati patay^a tungod sa indo mga kasal-anan kag kamo hay mga bukon Judio nga wayà relasyon sa Dios. Pero niyan, gingbuhì kamo liwat ng Dios sa espirituhanon kapareho ni Kristo nang gingpatawad ng Dios ang indo^b tanan nga salà. ¹⁴ Gingpayà niya ang nakasulat nga utang sa listahan sunò sa layi kuntra sa aton. Kag gingbuoy niya ini paagi sa pagpalangsang sa krus. ¹⁵ Gingbuy-an ng Dios ning gahom ang mga espiritu nga nagagahom kag may otoridad, kag gingpakahuy-an niya sinda pareho ng paagi sa pagparada para maipakità sa publiko nga gingperdi na niya sinda.

¹⁶ Nganì indì na kamo magpadikta sa mga tawo nga nagahusga sa indo kung ano indo kaunon o inumon, parti sa pagtahod sa mga pista, silibrasyon sa kamatyanan ng bulan o Adlaw nga Inugpahuway. ¹⁷ Ini tanan nga pagsulundan hay anino lang ng mga bagay nga ginapaabot, nga imaw si Kristo. ¹⁸ Ayaw nindo magpabay-i nga makawat ang indo premyo ng mga tawo nga naluluyag magpakuno-kuno nga mapainubuson kag nagasamba sa mga anghel. Nagapakadakò nga sinda hay labaw sa indo kay nakakakità kuno sinda ning panan-awon, pero wayà ning basihan kay paagi lang sa inda tawhanon nga panghunahunà. ¹⁹ Wayà sinda nagapasakop sa pagdumaya ni Kristo, nga imaw ang uyo. Pero kita nga iya lawas hay nagapasakop sa iya. Pareho sa uyo nga nagatao ng tanan nga mga kahinangyan ng luta-luta kag busog-busog, nganì ang kada parte ng lawas hay nagakaisa kag nagadakò, sunò sa pauno kabahoy nga gusto ng Dios.

²⁰ Namatay na ang indo dati nga kinaugalì nang namatay si Kristo kag ginghilway na kamo sa malain nga mga espiritu nga nagagahom sa ini nga kalibutan. Basì nagakabuhì pa kamo sunò sa kalibutan nga nagapasakop sa idayom ng mga layi? ²¹ Pareho ng: “Ayaw magtandoga ini, ayaw magtilawi inà, ayaw maghawiri dirà.” ²² Ini tanan nga layi hay sunò lang sa mga sugò kag mga pagpanudlò ng mga tawo. Ini hay parti lang sa mga butang kag pagkaon nga madalì masirà mintras ginagamit ini. ²³ Ini nga mga layi hay daw nagatao ning kamayad kay seryuso sinda sa pagsamba sa luwas, naluluyag magpakuno-kuno nga mapainubuson kag taw-an ning subra nga pagpahugà sa lawas. Pero wayà gid ini ning ipikto para mapugong ang mga malain nga handom ng aton lawas.