¹ Ako si Pablo, kaibahan sina Silas kag Timoteo hay nagasulat sa indo nga yarà sa siyudad ng Tesalonica nga nagatuo kay Hesu-Kristo kag nagakaisa sa aton Dios nga Amay kag kay Hesu-Kristo nga aton Ginoo. Nagapangamusta kami sa indo tanan.

Kabay pa nga mabaton nindo permi ang grasya kag katawhayan halin sa aton Dios.

² Nagapasalamat kami permi sa Dios tungod sa indo tanan kag ginasambit namon kamo sa amon mga pangamuyò ³ kay nadumduman namon ang indo mga ginahuman nga maayo tungod sa indo pagtuo. Kada pangamuyò namon, ginapasalamatan namon ang indo paghigugmà sa indo isigkatawo nga nakità namon paagi sa indo pagserbisyo sa Dios kag sa pagtiis ng mga kahugaan tungod sa indo paglaom sa pagbalik ng aton Ginoong Hesu-Kristo.

⁴ Nasayuran namon, mga kauturan nga ginahigugmà ng Dios, nga gingpilì niya kamo nga maging iya. ⁵ Kay ang Maayo nga Balità nga amon gingwali sa indo hay bukon sa hambay lang, kundì nabatyagan nindo ang gahom ng Espiritu Santo, nganì sayod nindo nga matuod gid ini. Nasayuran da nindo nga ang amon pagkabuhì nang yarà pa kami sa indo hay para gid sa indo kaayuhan. ⁶  Gingpatuyaran nindo kami kag patì ang aton Ginoo. Gingpatihan nindo nga may kalipay nga halin sa Espiritu Santo ang Maayo nga Balità abir ginahingabot kamo. ⁷ Nganì gingpatuyaran kamo ng tanan nga nagatuo kay Hesu-Kristo didto sa probinsya ng Macedonia kag Acaya ⁸ kay ang mensahe ng Ginoo hay gingpamalità nindo bukon lang sa Macedonia kag Acaya kundì sa iba pa nga lugar. Nganì indì na kahinangyan pa nga maghambay kami sa mga tawo parti sa indo pagtuo. ⁹ Kay sinda na ang nagbalità ng mainit nga pagbaton nindo sa amon nang nagkarà kami sa indo. Nagbalità pa sinda nga wayà na gid kamo nagasamba sa mga diosdiosan kundì sa matuod kag buhì nga Dios. ¹⁰ Kag gingbalità pa gid ninda nga nagahuyat kamo sa pagbalik halin sa langit ng Ongà ng Dios nga iya gingbanhaw. Siya si Hesus nga aton Manluluwas sa paabuton nga parusa ng Dios.