¹ Nganì nang indì na namon matiis ang amon kalangkag sa indo, naisip namon nga mas maayo kung magpabilin kami diri sa Atenas ² kag pakaraon si Timoteo dirà sa indo. Utod naton siya kay Hesu-Kristo kag kaibahan namon sa pagserbisyo sa Dios sa pagwali ng Maayo nga Balità. Gingpakarà namon siya sa indo para pakusugon ang indo buot kag buligan para magpadayon kamo sa indo pagtuo ³ agud wayà sa indo ning may magpangluya sa pagtuo kay Hesu-Kristo tungod lang sa ini nga mga pagtilaw. Kay sayod na nindo nga imaw ini ang kabubut-on ng Dios nga makaagi gid kita ng mga kahugaan. ⁴ Ginghambay na namon sa indo nang magkaibahan pa kita nga maaagihan gid naton ang mga kahugaan. Niyan nakità na nindo nga matuod kay imaw na gid ang natabò. ⁵ Nganì nang indì na ako makatiis, gingpakarà ko dirà sa indo si Timoteo para masayuran kag maibalità sa akon kung pauno na ang indo pagtuo. Ginalibugan gid ako kay basì baya kung nagdaog na si Satanas sa pagtintar sa indo kag naging wayà na puyos ang amon pagtudlò sa indo parti kay Hesu-Kristo.

⁶ Pero niyan nakabalik na diri si Timoteo. Maayo ang iya gingbalità parti sa indo pagtuo sa Dios kag sa indo paghigugmà sa isa kag isa. Gingbalità pa gid niya nga permi kuno nindo kami ginadumdom nga may kalipay kag ginalangkag kamo sa amon, kag imaw da kami sa indo. ⁷ Nganì mga kauturan, abir kadamò ang amon naaagihan nga kahugaan kag paghingabot, nagkusog ang amon buot kay nagapadayon kamo sa indo pagtuo sa Dios. ⁸ Niyan nabuhì ang amon paglaom kung ang indo pagtuo sa Ginoo hay nagapadayon gihapon. ⁹ Pauno baya namon mababayusan ang Dios tungod sa kadakò nga kalipay nga iya gingtao sa amon? Kay makusog ang indo pagtuo sa iya kag indì gid maubos-ubos ang kalipay nga nababatyagan namon. ¹⁰ Adlaw kag gab-i hay nagapangamuyò gid kami nga kabay pa nga magkinitaan kita liwat para madugangan pa namon kung ano ang kuyang sa indo pagtuo.

¹¹ Kabay pa nga ang aton Dios nga Amay kag ang aton Ginoong Hesu-Kristo hay maghuman ning paagi kung pauno kami makabalik dirà sa indo. ¹² Kag kabay pa nga padakuon gid kag pasubrahon pa ng aton Ginoo ang indo paghigugmà sa isa kag isa kag sa tanan nga mga tawo pareho ng amon paghigugmà sa indo. ¹³ Sa ini nga paagi, pakusogon ng Ginoo ang indo buot para magakabuhì kamo nga malayo sa tanan nga mga salà kag makaatubang kamo nga wayà ning kasawayan sa aton Dios nga Amay pag balik ng aton Ginoong Hesus kaibahan ang tanan nga iya gingpakabanal nga mga tawo.