^1 *Ako si Pablo nga apostol hay nagasulat sa indo tanan nga nagatuo kay Hesu-Kristo nga yarà sa siyudad ng Tesalonica. Nagapangamusta kami nina Silas kag Timoteo sa indo tanan nga nagakaisa sa aton Dios nga Amay kag kay Ginoong Hesu-Kristo.

² Kabay pa nga mabaton nindo ang grasya^a kag katawhayan^b halin sa aton Dios nga Amay kag kay Ginoong Hesu-Kristo.

³ Mga kauturan, dapat gid nga permi kami magpasalamat sa Dios tungod sa indo kag tamà lang ina, kay nagadakò pa gid ang indo pagtuo kag imaw da ang indo paghigugmà sa isa kag isa. ⁴ Nganì, ginapakadakò gid namon kamo sa mga iglesya ng Dios nga yadto sa iban nga mga lugar. Ginabalità namon sa inda nga nagapadayon gihapon kamo sa indo pagtuo abir ano pa nga mga paghingabot kag mga kahugaan ang indo ginatiis para kay Hesu-Kristo.

⁵ Imaw ini ang nagapamatuod nga tamà gid ang paghusga ng Dios sa mga tawo, kay ang mga kahugaan nga indo ginatiis hay gamiton niya nga pagpamatuod nga kamo angay nga magsuyod sa iya gingharian. ⁶ Ang paghusga ng Dios hay permi tamà, nganì bayusan niya ning kahugaan kung sin-o ang nagatao ning kahugaan sa indo. ⁷ Kag kamo nga ginapahugaan, magaabot ang oras nga papahuwayon na kamo ng Dios kag kami da. Ini hay matatabò pagbalik ni Ginoong Hesus halin sa langit nga may kalayo nga nagadayab kaibahan ang iya gamhanan nga mga anghel. ⁸ Kag paparusahan niya ang tanan nga wayà nagakilaya sa Dios kag wayà nagatuman sa Maayo nga Balità. ⁹ Ang parusa sa inda hay wayà ning katapusan kag mabubuyag sinda sa Ginoo kag indì sinda makakakità ng iya makatitingaya nga gahom. ¹⁰ Matatabò ini pagbalik ng Ginoo para dayawon kag katingayahan siya ng tanan nga nagatuo sa iya nga ginglain para maging iya kag kamo da hay kaibahan didto kay ginasunod gid nindo ang gingpanudlò ng Dios nga amon gingbalità sa indo.

¹¹ Imaw ini ang rason nganì permi namon ginapangamuyò sa aton Dios nga buligan niya kamo para ang indo pagkabuhì hay angay sa mga gingpilì niya. Ginapangamuyò pa namon nga buligan niya kamo paagi sa iya gahom para matuman gid nindo ang tanan nga maayo nga gusto nindo humanon. Imaw ini ang bunga ng indo pagtuo kay Hesu-Kristo. ¹² Ginapangamuyò namon ini agud ang aton Ginoong Hesus hay pagadayawon tungod sa indo kag kamo da tungod sa iya, paagi sa grasya nga gingtao sa indo ng aton Dios kag ni Ginoong Hesu-Kristo.