¹ Ako si Pablo nga apostol^a ni Kristo Hesus sunò sa sugò ng Dios nga aton Manluluwas kag ni Kristo Hesus nga imaw ang aton sigurado nga paglaom.^{b 2} Nagapangamusta ako sa imo, Timoteo, ikaw nga akon matuod nga ongà sa pagtuo.

Kabay pa nga mabaton mo ang grasya, kaluoy kag katawhayan halin sa Dios nga Amay kag kay Kristo Hesus nga aton Ginoo.

³ Gusto ko nga dirà ka lang sa Efeso pareho ng akon gingbilin sa imo nang nagapakadto ako sa Masedonya. Kay may iban nga mga tawo dirà nga salà ang inda ginatudlò, nganì kahinangyan nga hambayi sinda nga magpara sa inà nga ginatudlò. ⁴ Hambayan mo sinda nga indì sinda mag-uyak ng inda oras sa mga isto-istorya nga paliwat-liwat basì sa listahan ng mga kalulo-lulohan. Imaw ini ang kabangdanan kung basì nagadinibatihan ang mga tawo. Kag ini nga mga bagay indì gid makabulig agud masayuran ninda ang plano ng Dios parti sa pagluwas sa tawo. Masayuran lang naton ini paagi sa pagtuo kay Hesus. ⁵ Ang rason kung basì kahinangyan nga hambayon mo sinda nga magpara sa inà nga salà nga ginatudlò, agud magahigugmaanan ang mga nagatuo nga may malimpyo nga tagipusuon kag konsinsya, kag matuod nga pagtuo. ⁶ Ang iban dirà nagtalikod na sa ini nga kaayo nga mga pagkabuhì kag nagadiniskusyon sa mga bagay nga wayà ning puyos. ⁷ Gusto ninda nga kilay-on sinda nga maging mayad sa pagpanudlò ng Kasuguan ng Dios, kag kombinsido gid sinda sa inda ginapangtudlò, pero wayà ninda naintindihi kung ano ang inda ginapanghambay.

⁸ Nasayuran naton nga ang Kasuguan hay maayo kung tamà lang ang paggamit. ⁹ Dapat da naton dumdumon nga ang Kasuguan hay wayà ginghuman para sa mga matarong, kundì para sa mga wayà nagasunod sa mga kasuguan, mga masuwayon, mga wayà nagasunod sa Dios, mga makasal-anan, bukon mga diosnanon, nagahigugmà sa kalibutanon nga mga butang, mga nagapangpatay ng inda tatay o nanay, mga miyugpatay ng inda isigkatawo, ¹⁰ mga nagapangawatan o naga-iba nga wayà pa makasay, mga nagaubay nga lyaki sa lyaki o babayi sa babayi, mga nagapangkidnap, mga pusong, mga tawo nga nagatistigo ning bukon matuod kag sa mga nagahuman ning bisan ano nga nagakuntra sa tamà nga pagpanudlò. ¹¹ Ang tamà nga pagpanudlò hay sunò sa Maayo nga Balità nga parti sa mahimayaon kag malipayon nga Dios nga gingsalig sa akon agud itudlò sa mga tawo.

¹² Ginapasalamatan ko si Kristo Hesus, ang aton Ginoo nga nagtao sa akon ning kusog sa pagserbisyo para sa iya, kay gingbilang niya ako nga masaligan. Nganì gingpilì niya ako nga magserbisyo sa iya, ¹³ abir matuod nga nang una naghambay ako ning malain kuntra sa iya, puyra pa dirà gingpanakit^c gid kag gingpakahuy-an ko ang mga nagatuo sa iya. Pero gingkaluy-an ako ng Dios, kay dati anay wayà pa ako nagatuo, nganì wayà ako makasayod nga salà ang akon ginahuman. ¹⁴ Subra-subra gid ang kabuot ng aton Ginoo nga nagpatawad sa akon tanan nga salà kag gingtaw-an niya ako ning pagtuo kag paghigugmà paagi sa akon pakig-isa kay Kristo Hesus. ¹⁵ Ini nga hambayanon hay matuod kag ang tanan dapat gid nga batunon kag tuuhan sa bilog nga tagipusuon: nag-abot si Kristo Hesus diri sa kalibutan agud luwason ang mga makasal-anan. Kag nang una ako gid ang pinakamakasasalà sa tanan nga makasal-anan. ¹⁶ Pero gingkaluy-an ako agud maipakità ni Kristo Hesus ang iya subra nga pagkamapinasinsyahon sa akon nga pinakamakasasalà. Ang ginghuman ni Kristo sa akon nagatao ning halimbawà sa iban agud magatuo sinda sa iya kag magabaton ning kabuhì nga wayà katapusan. ¹⁷ Padunggan kag dawayon hasta sa wayà katapusan ang Harì nga nagaharì nga wayà katapusan, nga wayà ning kamatayon, nga indì makikità ng tawo kag isa lang nga Dios! Kabay pa.

¹⁸ Timoteo, nga akon ginakabig nga ongà, ini ang akon ginabilin sa imo: Dumduma ang mga ginghambay ng mga mensahiro ng Dios nang una parti sa imo, agud makalaban ka ning maayo sa mga nagakuntra sa kamatuuran. ¹⁹ Siguraduhon mo nga permi matibay ang imo pagtuo kag maayo ang imo konsinsya. Ang iban wayà nagapamatì sa inda konsinsya, nganì naduyà ang inda pagtuo, ²⁰ pareho kana Heminiyo kag Alihandro. Gingpabay-an ko na ini nga mga tawo kay Satanas^d agud masayuran ninda nga indì dapat maghambay ning malain kuntra sa Dios.