2
Ang Maayo nga Pagsamba
1 Niyan, una sa tanan, nagapangabay ako nga tudluan mo ang mga nagatuo nga magpangamuyò sa Dios para sa tanan nga tawo. Ipangamuyò ang iban, ipangayò ang inda mga kahinangyanon kag dapat ang indo pagpangamuyò hay may kaibahan nga pagpasalamat. 2 Tudluan mo pa sinda nga ipangamuyò ang mga harì kag ang tanan nga may mataas nga katungdanan sa gobyerno para ang inda pagdumaya hay maayo agud ang aton pagpangabuhì hay maging selinsiyo, matawhay, sunò sa kagustuhan ng Dios kag maayo sa panirò ng mga tawo. 3 Ini nga pagpangamuyò sa tanan nga tawo hay maayo kag nalilipay ang Dios nga aton Manluluwas. 4 Gusto niya nga makasayod ng kamatuuran kag maluwas ang tanan nga tawo. 5 Kay may isa lang nga Dios kag may isa lang nga miyugpatungà sa Dios kag sa mga tawo. Wayà ning iban kundì si Kristo Hesus nga naging tawo. 6 Gingtao niya ang iya kabuhìa para pangtubos sa kasal-anan ng tanan nga tawo agud indì na maparusahan ng Dios. Imaw ini ang nagapamatuod nga gusto ng Dios luwason ang tanan nga tawo, kag ini hay gingpakità niya sa tiyempo nga iya mismo gingpilì. 7 Nganì gingbutang niya ako sa pwesto ng apostol sa mga bukon Judio para ibalità kag itudlò ang matuod nga pagpanudlò agud magtuo sinda kay Hesus. Nagabalità ako ning matuod sa indo kag wayà ako nagapinusong.
8 Sa abir diin nga lugar nga nagatipon ang mga nagatuo, gusto ko nga pag nagapangamuyò ang mga lyaki, dapat igwa ning malimpyo nga tagipusuon, pagtaas ng inda mga kamot kag wayà ning kahangit o kaaway.
9 Kung parti sa mga babayi, gusto ko nga magbarò sinda ning tamà nga angay siruon kag bukon malaw-ay. Kung magpaguwapa sinda, dapat indì magpangupyor ning subra-subra, o maggamit ng madamò nga mga alahas nga bulawan o perlas, o magsuksok ning kamahay-mahay nga mga barò. 10 Kundì ang matuod nga kaguwapa nga gusto ng Dios hay ang maayo nga mga bagay nga inda ginahuman. Ini nga mga bagay hay nagaangay sa inda ginapamatuod nga sinda hay nagatuo sa Dios. 11 Kag kung may nagatudlò, ang mga babayi hay dapat lang magpamatì kag magtuon nga may pagpasakop. 12 Wayà ko ginatuguti ang mga babayi nga magtudlò o magmandar sa mga lyaki. Kahinangyan magpamatì lang sinda. 13 Kay ang una nga ginghuman hay si Adan kag masunod lang si Eba. 14 Kag bukon si Adan ang naluko ni Satanas, kundì ang babayi ang naluko kag nagsuway sa sugò ng Dios.b 15 Pero ang mga babayi dirà maluwas sa parusa sa inda mga kasal-anan. Sa inda pagpangongà, kahinangyan gid ninda nga diparahon ang inda pamilyac. Dapat sinda magpadayon sa pagtuo kay Hesus, paghigugmà, pagsunod sa kabubut-on ng Dios kag tamà nga pamatasan.