¹ Matuod ang hambayanon: Kung may gusto nga maging miyugdumaya ng mga nagatuo, nagahandom siya ng kagalang-galang nga trabaho. ² Nganì ang miyugdumaya ng mga nagatuo hay kahinangyan wayà ning kapintasan, isa lang ang iya asawa, antigo magpugong ng iya kaugalingon, magkabuhì ning tamà, ginatahod, madiparahon sa mga bisita, kag maayo magtudlò. ³ Dapat bukon siya manginginom kag bukon mapintas, kundì mabuot kag bukon palaaway. Kahinangyan bukon da siya hakog sa kuwarta. ⁴ Kung parti naman sa iya panimayay, dapat maayo siya magdumaya, ginatahod siya kag ginatuman ng iya mga ongà. ⁵ Kay pauno ang iya pagdumaya sa mga nagatuo sa Dios kung indì niya kaya maasikaso ang iya kaugalingon nga panimayay? ⁶ Kahinangyan da nga bukon siya bag-o nga nagatuo, kay basì kung magpahambog siya kag mahuyog sa parusa nga pareho ng gingparusa kay Satanas. ⁷ Kag kahinangyan da nga ang mga tawo nga wayà nagatuo sa Dios hay may maayo nga ginahambay parti sa iya, agud indì siya mahambayan ning malain nga maging kabangdanan nga mahuyog sa siod ni Satanas.

⁸ Kung parti naman sa mga miyugserbisyo nga nagabulig sa mga nagatuo, dapat ginatahod sinda, masaligan sa inda ginahambay, bukon manginginom kag bukon hakog sa kuwarta. ⁹ Kag kahinangyan sinda permi matibay sa kamatuuran nga may malimpyo nga konsinsya parti sa pagtuo kay Kristo nga gingpasayod na niyan. ¹⁰ Nganì dapat usisaon anay sinda kag kung wayà ning kapintasan nga makità sa inda, puydi na sinda makaserbisyo. ¹¹ Ang mga babayi^a hay dapat ginatahod da, wayà nagapanglibak, antigo magpugong ng inda kaugalingon kag masasaligan sa tanan nga bagay. ¹² Parti naman sa mga miyugserbisyo nga nagabulig sa mga nagatuo, dapat isa lang ang asawa, kag maayo sinda magdumaya sa inda mga ongà kag sa inda bilog nga panimayay. ¹³ Ang mga miyugserbisyo nga nagabulig sa mga nagatuo nga maayo ang inda pagserbisyo hay ginatahod ng mga tawo kag wayà sinda mahadlok maghambay parti sa inda pagtuo kay Kristo Hesus.

¹⁴ Nagaasa ako nga makakarà dirà nga daan agud magpakigkità sa imo. Pero ginasulat ko pa gid ini nga mga bagay, ¹⁵ para kung maatraso ako, masayuran mo kung pauno magkabuhì ang mga nagatuo sa Dios bilang iya pamilya. Kita nga mga nagatuo imaw ang iglesya ng buhì nga Dios nga iya gingsaligan nga nagatudlò ning tamà agud ang kamatuuran indì magabag-o. Ang kamatuuran hay gingpapareho sa bayay kag kita ang mga haligi kag pundasyon ng ini nga bayay. ¹⁶ Ini nga kamatuuran nga gingpasayod niyan ng Dios sa aton parti kay Hesus hay makatitingaya gid: